މީދޫ އަވަށުގެ ފުޓުބޯޅަ ދަނޑުގެ ލައިޓު ހަރުކޮށް، ކަރަންޓު ގުޅައި މަސައްކަތް ނިންމައިދޭނެ ފަރާތެއް ހޯދުމަށް އައްޑޫ ސިޓީ ކައުންސިލުން އިއުލާންކޮށްފި އެވެ.
މިމަސައްކަތް ކުރުމަށް މައުލޫމާތު ދިނުން އަންނަ އޮކްޓޫބަރު މަހުގެ 5 ވަނަ ދުވަހު އައްޑޫ ސިޓީ ކައުންސިލް އިދާރާގައި އަދި މީދޫ އަވަށު އޮފީހުގައި ކުރިއަށް ދާނެއެވެ. މައުލޫމާތު ދިނުން އޮންނާނީ ދެ ރަށުގައިވެސް ހެނދުނު 11:00 ގައެވެ.
މައުލޫމަތު ދިނުމުގެ ސެޝަނުގައި ބައިވެރިވެ މައުލޫމާތު ސާފުކުރި ފަރާތްތަކުގެ އަންދާސީހިސާބު ހުށައަޅަން ޖެހެނީ ކައުންސިލް އިދާރާއަށެވެ. އަންދާސީހިސާބު ބަލައިގަތުމަށް ހަމަޖެހިފައިވަނީ އޮކްޓޫބަރު މަހުގެ 10 ވަނަ ދުވަހު 11:00 ގައެވެ.
ނަމަވެސް މައުލޫމާތު ސާފުކުރުމުގެ ސެޝަނުގައި ބައިވެރިނުވާ ފަރާތްތަކަށް އަންދާސީހިސާބު ހުށައެޅުމުގެ ފުރުސަތު ނުލިބޭނެކަމަށް ކައުންސިލުން ވަނީ މައުލޫމާތު ދީފައެވެ.
މީދޫގެ ފުޓުބޯޅަ ދަނޑަކީ އެއަވަށުގެ ގިނަ އަދަދެއްގެ ޒުވާނުން އޭގެ ބޭނުން ކުރަމުން އަންނަ ދަނޑެކެވެ.