ބްލެކްބެރީ ޒީ ޓެންގެ ނަމުގައި ބްލެކްބެރީ އިން އާ ފޯނެއް ނެރެފި އެވެ. މިއީ އައިފޯނާއި އެންޑްރޮއިޑާއި ވާދަ ކުރުމަށް ބްލެކްބެރީއިން ނެރުނު ފުރަތަމަ ފޯނެވެ.
އެޕަލް އައިފޯން 2007 ގައި ނެރުނު ފަހުން ދުނިޔޭގެ އެހެން މަޝްހޫރު ކުންފުނި ތަކުންވެސް އައިފޯނާއި ވާދަ ކުރުމަށް ޓަޗް ފޯނުތައް ނެރެން ފެށި އެވެ. ނަމަވެސް ބްލެކްބެރީ އިން މި ބަދަލުގައި ޝާމިލު ނުވުމުގެ ސަބަބުން އެ ކުންފުންޏަށް ބޮޑެތި މާލީ ގެއްލުންތަކާއި ވަނީ ކުރިމަތިލާންޖެހިފައެވެ.
މިއަދުގެ ވަގުތެއްގައި ބާޒާރަށް ނިކުންނަން ހަމަޖެހިފައިވާ މި ފޯނުގައި ބޭނުން ކުރާނީ ބްލެކްބެރީ 10 އޯއެސް އެވެ. އަދި 70،000 އެޕްލިކޭޝަން ފުރަތަމަ ދުވަހުވެސް މާކެޓްގައި ލިބެން ހުންނާނެ ކަމަށް ބްލެކްބެރީ އިން ވަނީ ބުނެފަ އެވެ. އިތުރަށް އެ ކުންފުނިން ބުނެފައި ވަނީ ބްލެކްބެރީ 10 އޯއެސް ގައި "ޕާސަނަލް" އަދި "ވާރކް" ޕްރޮފައިލެއް ހުންނާނެ ކަމަށެވެ. އަދި ބޭނުން ޕްރޮފައިލަކަށް ބަދަލު ކުރެވޭނެ ކަމަށެވެ.
4.2 އިންޗި ޓަޗް ސްކްރީނެއް ހުންނަ މި ފޯނު ގައި 2 ޖީބީ ރެމް އަދި 16 ޖީބީ ސްޓޯރެޖްގެ އިތުރުން 8 މެގަ ޕިކްސަލް ކެމެރާ އެއް ހުރެ އެވެ. އަދި ފޯނުގެ ޑިޒައިނަކީ އައިފޯން 5 ގެ ކޮޕީ އެއް ކަމަށް ވެސް ގިން ބަޔަކު ދަނީ ބުނަމުންނެވެ. އަދި މުސްތަގްބަލުގައި ބްލެކްބެރީ އިން އައިފޯން އަދި ސެމްސަންގް ފަދަ ކުންފުނި ތަކާއި ވާދަ ކުރާނެ ކަމަށް ރިޕޯޓްތައް ބުނެ އެވެ.