ކުރީގެ އިނގިރޭސި ގައުމީ ޓީމުގެ ކެޕްޓަން ޑޭވިޑް ބެކަމް ފްރާންސްގެ ޕީއެސްޖީ އަށް ސޮއި ކޮށްފި އެވެ. ހަފްތާއަކު 150،000 ޔޫރޯ އަށް ބެކަމް ޕީއެސްޖީ އާއި ގުޅުމަށްފަހު ބެކަމް ވަނީ އޭނާގެ މުސާރަ ފްރާންސްގެ ކުޑަކުދިންގެ ހިޔާ ތަކަށް ހަދިޔާ ކުރަން ނިންމާފަ އެވެ.
އުމުރުން 37 އަހަރުގެ ބެކަމް މި ސީޒަންގެ ޖޫން މަހާއި ހަމައަށް ޕީއެސްޖީ އަށް ކުޅޭނެ ކަމަށް ރިޕޯޓްތައް ބުނެ އެވެ. ބެކަމް ވަނީ މިދިޔަ އަހަރު އޭނާ އެލްއޭ ގެލެކްސީއާއި އެކު ވެފައިވާ ކޮންޓްރެކްޓް ހަމަ ވުމުން ފްރީ އޭޖެންޓަކަށް ވެފަ އެވެ. އަދި ފިޓްނެސް ހިފެހެއްޓުމަށް އާސެނަލް އާއި އެކު ބެކަމް ދަނީ ފަރިތަކުރުން ތަކުގައި ބައިވެރިވަމުންނެވެ.
ބެކަމް ވަނީ މެންޗެސްޓާ ޔުނައިޓެޑް، ރެއާލް މެޑްރިޑް، އޭސީ މިލާން އަދި އެލްއޭ ގެލެކްސީ ފަދަ ބޮޑެތި ކްލަބްތަކަށް ކުޅެފަ އެވެ. އަދި އޭނާ ވަނީ 14 ތަށި އެ ޓީމްތަކާއި އެކު ކާމިޔާބު ކޮށްފަ އެވެ. ބެކަމް ބުނެފައި ވަނީ އޭނާ އަދިވެސް 21 އަހަރުގައި ކުޅުނު ކުޅުން ކުޅޭނެ ކަމަށެވެ.