ގިނައިން ފައިބަރު ހުންނަ އެއްޗެހި ކެއުން
ލޭގައި ހަކުރު ހުންނަ މިންވަރު ދަށްކޮށްދިނުމުގެ އިތުރުން ފައިބަރަކީ އެހެން ކާބޯހައިޑްރޭޓްސްގެ ސަބަބުން ލިބޭ ގެއްލުންތައްވެސް ކުޑަކޮށްދޭ މާއްދާއެކެވެ. ކަމުގެ މާހިރުން ވިދާޅުވާ ގޮތުގައި ހަކުރު ބަލި ހުންނަ މީހުން ދުވާލަކު 25 ގްރާމާއި 50 ގްރާމާއި ދެމެދުގެ އަދަދަކަށް ފައިބަރު ކާންޖެހެއެވެ.
ބްރައުން ރައިސް އާއި އޯޓްސްއަކީ ގިނަ އަދަދަކަށް ފައިބަރު އެކުލެވޭ ކާނާއެވެ. އަދި ހަމަ އެހެންމެ ތަރުކާރީއާއި ބީންސް (ތޮޅި) ގައިވެސް ފައިބަރު ހިމެނެއެވެ.
2. ހަވާދުގެ ބާވަތްތައް އިތުރުކުރޭ
ކާއެއްޗެހީގެ އިތުރުން އާ އެއްޗެއްސަށް އަޅާ ހަވާދުގެ ސަބަބުން ހަކުރު ބައްޔަށް އަސަރުކުރެއެވެ. ދިރާސާއަކުން ދައްކާ ގޮތުގައ މަޝްހޫރު ފައިދާހުރި މެޑިޓަރޭނިއަން ޑައިޓަގައި އެކުލެވިގެންވާ ބޭސިލް، ކިއުމިން، އޮރެގާނޯ، ޕާސްލީ އަދި ސޭޖު އަކީ ލޭގައި ހަކުރު ހުންނަ މިންވަރު ދަށްކޮށްދީ އިންސުލިން އުފެއްދުން އިތުރު ކޮށްދޭ އެއްޗެހިއެވެ.
ޔުނިވާސިޓީ އޮފް ޖޯޖިއާގެ ދިރާސާވެރިން ހެދި ޓެސްޓުތަކަކުން ދައްކާ ގޮތުގައި މި ބާވަތުގެ އެއްޗެހީގައި ހުންނަ އެންޓިއޮކްސިޑެންޓްސް އިން ހަށިގަނޑުގެ ޓިޝޫތަކަށް ކުރާ ގެއްލުމާއި ހަކުރު މަތިވުމުގެ ސަބަބުން ދިމާވާ މައްސަލަތަކުން ސަލާމަތްކޮށްދެއެވެ. ކަރަންފުލާއި ފޮނިތޮށި އޭގެތެރޭގައި ޚާއްސަކޮށް ފާހަގަކޮށްލެވެއެވެ.
3. ހުދު ހަނޑުލުގެ ބަދަލުގައި ބްރައުން ރައިސް ބޭނުންކުރޭ
ހަކުރު ބައްޔަށް ފަރުވާކުރުމަށާއި ކޮންޓްރޯލް ކުރުމުގައި އިންސާނުން ހަދާ ކާބޯހައިޑްރޭޓްސްއަށްވުރެ ހޯލް ގްރެއިންސްގެ ފައިދާ މާ ބޮޑެވެ. 200،000 މީހުންނާއިއެކު ކުރި ދިރާސާއަކުން ދެއްކި ގޮތުގައި ހުދު ހަނޑުލުގެ ތިންބައިކުޅަ އެއްބަޔަށް ވާ ވަރަށް ބްރައުން ރައިސް ކައިފިނަމަ ހަކުރު ބަލި ޖެހުމުގެ ރިސްކު 16 އިންސައްތަ ކުޑަވެގެންދެއެވެ. އާޓާ ފުށް ކަހަލަ އެހެނިހެން ހޯލް ގްރެއިންސް ކެއުމުން އެ އަދަދު 36 އިންސައްތައަށް ދެއެވެ. އެހެން ދިރާސާތަކުން ދައްކާފައިވާ ގޮތުގައި ހުދު ހަނޑުލަށްވުރެ ބޮޑަށް ބްރައުން ރައިސް ހަކުރާއި އިންސުލިން ހުންނަ މިންވަރު ކޮންޓްރޯލް ކޮށްދެއެވެ.
ބްރައުން ރައިސް ކަހަލަ ހޯލް ގްރެއިންސްގައި ގިނަ އަދަދަކަށް ފައިބަރު، މިނަރަލްސް އަދި ވިޓަމިންސް ހިމެނެއެވެ. އަދި ހަނޑޫ ހެދުމުގައި އެހީތެރިވާ އެއް މާއްދާއަކީ ހަކުރު ބަލި ޖެހިފައިވާ މީހުންގެ ލޭ ނާރުތަކަށް ކުރާ ނޭދެވޭ އަސަރު ކުޑަކޮށްދޭ އެއްޗެކެވެ. އެ މާއްދާތައް އެކްޓިވޭޓް ކުރުމަށްޓަކައި ރޭގަނޑު ހަނޑޫ ފެނުލާށެވެ.
ހޯލް ގްރެއިންސްގެ އިތުރުން، ކަމުގެ މާހިރުން ލަފާދެނީ ހަކުރާއި ލޮނު ބޭނުންކުރާ މިންވަރު ކުޑަކުރުމަށާއި، ގެއްލުންހުރި ކާބޯހައިޑްރޭޓްސްގެ ބަދަލުގައި ފައިދާހުރި ކާބޯހައިޑްރޭޓްސް (މިސާލަކަށް ޑޯނަޓެއްގެ ބަދަލުގައި އާފަލެއް) ކެއުމަށެވެ. އަދި ފެޓްސް ގިނަ މަހުގެ ބާވަތުގެ ބަދަލުގައި ފެޓްސް މަދު ބާވަތްތަކުގެ މަސް (މިސާލަކަށް ރަތްކަން ގަދަ، ބަންދުކޮށްފައިވާ މަހުގެ ބަދަލުގައި ކުކުޅުމަހާއި ކަނޑު މަސް) ކެއުމަށްވެސް މާހިރުން އިލްތިމާސްކުރެއެވެ.