މިއީ ގިނަ ދިވެހިންގެ އާދަ އެވެ. ވަޒީފާ ނުލިބުނޭ ކިޔާފައި ދެ އަތް އުރާލައިގެން ސޯޝަލް މީޑިއާގައި ތިބެ، އެކި މީހުންނަށް ބެވުމެވެ. އަމިއްލަ މަސައްކަތެއް ފަށައި އަމިއްލަ ކުރިމަގު އުޖާލާ ކުރުމުގެ ހިތްވަރު ހުންނަނީ މަދު ބައެއްގެ ކިބައިގަ އެވެ.
ހިތަދޫ، ޒާހިރާމަންޒިލް ޝިތުނާ ހުސެއިން (ޝިތޫ) އަކީ މީގެ ކުރިން ރިސޯޓެއްގެ ޒިއްމާދާރު މަގާމެއްގައި ހުރި ހީވާގި ޒުވާން އަންހެން ކަބަލެކެވެ. އޭނާ ވަޒީފާ ދޫކޮށްލައި ރަށައް ބަދަލުވީ އާއިލީ ޒިއްމާ އުފުލުމަށެވެ. ރަށައް ބަދަލުވި ހިސާބުން ފެށިގެންވެސް ޝިތޫގެ ވިސްނުން ހުރީ އަމިއްލަ މަަސައްކަތެއް ފަށައި، އާމްދަނީ ހޯދުމަށެވެ.
އޭނާގެ އެ ހުވަފެން މިއަދު މިވަނީ ހަގީގަތަކަށް ވެފައެވެެ. "މީމީރި" އާއި ޝިތުވަނީ އަމިއްލަ ބްރޭންޑެއް އުފަންކޮށްފައެވެ. އެއީ "މާމީރި" ތައްޔާރީ ކާނާ އުފައްދާ ބްރޭންޑެކެވެ.
މީގެ ހަމަސް ކުރިން އާއިލާގެ އެހީތެރިކަމާއި އެކު ޝިތޫ މަސައްކަތް ފެށި ނަމަވެސް ފާއިތުވި ދެ މަސް ދުވަހުގެ ތެރޭގައި "މާމީރި" ޕްރޮޑަކްޓްތަކަށް އާއްމުންގެ ބޮޑު ތަރްހީބެއް ވަނީ ލިބެން ފަށާފައެވެ.
"އަޅގަނޑުމެން މި މަސައްކަތް ފެށިތާ މިހާރު ހަ މަސް، ރަސްމީ ބްރޭންޑަކަށްވީ މިދިޔަ ދެ މަސް ދުވަސްތެރޭ. މިއުފެއްދުމަށް ވަރަށް ބޮޑު ތަރުޙީބެއް ލިބޭ"، މީމީރިގެ މެނޭޖިންގް ޑިރެކްޓަރު ޝިތޫ ބުންޏެވެ.
ޝިތޫގެ ވިޔަފާރި ކުރިއެރުވުމަށް އޭނާގެ އާއިލާއިން ދެމުންދާ އެހީ އޭނާ ފާހަގަ ކުރިއެވެ.
"މަސްމިރުން ހަދަނީ މުޅިންވެސް އަޅުގަނޑު އަމިއްލަޔަށް. އެކަމަކު ހަވާދާއި އެހެނިހެން ވިއްކާ އެހެން އެއްޗެހި ހަދަނީ މަންމަ. އަޅުގަނޑުގެ މަންމައާއި ފިރިމީހާއަކީ އަޅުގަނޑުގެ އެންމެ ބޮޑު ސަޕޯޓަރުން"، ޝިތުނާ ބުންޏެވެ.
މިހާރު ޝިތޫ ވިއްކަނީ ތަފާތު ފަސް ޕްރޮޑަކްޓެކެވެ. އޭގެ އަގުތައް އުޅެނީ ފަސް ރުފިޔާއާއި 50 ރުފިޔާއާއި ދެމެދުއެވެ. ޝިތޫ ބުނީ އަގުތައް ކަނޑައަޅަނީ ޕްރޮޑަކްޓް ބަންދުކުރާ ގޮތުގެ މައްޗަށް ބިނާކޮށް ކަމަށެވެ.
"އަޅުގަނޑުމެން އެއްޗެހި ބަންދު ކުރަނީ ޕްލާސްޓިކް ކޮތަޅުގައި އާއި ބިއްލޫރި ފުޅީގައި. ކޮތަޅުތައްނަމަ އަގުހެޔޮ ވާނެ، އެއީ އޭގެ ބަރުދަނަށް ބަލާފައި، އާންމުކޮށް ގުރާމުން"،
ގިނަ އަދަދަކަށް އޯޑަރު ކޮށްފިނަމަ ޑިސްކައުންޓް ދޭކަމަށްވެސް ޝިތުނާ ބުންޏެވެ.
"މިހާރުވެސް ގިނަ އަދަދަކަށް އޯޑަރު ލިބިއްޖެނަމަ ހާއްސަ ޑިސްކައުންޓެއް ދެމުން މި އަންނަނީ"
ރާއްޖޭގައި މަހުން ތައްޔާރު ކުރާ ކާއެއްޗެހީގެ އެންމެ ކުރީ ސަފުގައި އުޅޭ ބްރޭންޑަކަށް ވުމުމަށް "މީމީރި"ން ވަނީ މިހާރުއްސުރެ އާ އެއްޗެހި އުފެއްދުމުގެ މަސައްކަތް ފަށާފައެވެ.
ޝިތުނާ ބުނީ ބައެއް ތެކެތީގެ ސާމްޕަލްތައް ރިސޯޓުތަކަށް ފޮނުވާފައިވާ ކަމަށާއި، އަދި މިހާރު އެއް ރިސޯޓަކުން ވަނީ ސަޕްލައިގެ އޯޑަރުވެސް ދީފައިކަމަށެވެ. "
އަޅުގަނޑުމެން ބޭނުން ރާއްޖޭގެ ހުރިހާ ކަންކޮޅުތަކަށްވެސް ފޯރުކޮށްދޭން"،
"މާމީރި" ޕްރޮޑަކްޓްސްތައް ރާއްޖޭގެ ހުރިހާ ކަންކޮޅެއްގައި ލިބެން ހުރުމަކީ ޝިތޫގެ އަމާޒެވެ. އެކަމަށް ވިސްނުން އެބަހުއްޓެވެ. ނަމަވެސް އަދި ގިނަ ގޮންޖެހުން ހުރިކަން ޝިތޫ ފާހަގަކުރިއެވެ.
"އަޅުގަނޑުމެން ބޭނުންވަނީ އޯޑަރުތައް ގިނަ އަދަދުތަކުން ފޯރުކޮށްދޭން. އެކަމަކު އެކަށީގެންވާ އަދަދަކަށް އަޅުގަނޑުމެން އެއްޗެހި އަޅާނެ ފުޅި ނުލިބޭ. 40-50 ފުޅީގެ އޯޑަރެއް ލިބިއްޖެނަމަ ޖެހޭނީ އަދި ބަންދުކުރުމަށް ބޭނުންކުރާ ހުރިހާ ވަސީލަތެއް ބޭނުންކުރަން".
ރައްޓެހިންނާއި އަވައްޓެރިންގެ ފަރާތުން ހުސް ފުޅި ހޯދަމުން އަންނަ އިރު ޝިތޫ ވަނީ ސޯޝަލް މީޑިއާގައި ފުޅި ހޯދުމަށް ޕްރޮމޯޝަނެއް ފަށާފައެވެ. އޭގެ ސަބަބުން ގިނަ ބަޔަކު ގެންދަނީ ފުޅި ފޯރުކޮށް ދެމުންނެވެ. އެފަރާތްތަކަށް "މާމީރި"އިން ހާއްސަ ހަދިޔާއެއް ދެއެވެ.
"ފުޅިތައް ފޯރުކޮށްދޭ މީހުންނަށް އަޅުގަނޑުމެން ހަދިޔާ ދެން"
ސަޕްލައި އިތުރުވާ ވަރަކަށް ފުޅި ހޯދުމަކީ އުނދަގޫ ކަމަކަށްވާތީ ޝިތޫގެ ވިސްނުނުން މިހާރު ހުރީ ބްރޭންޑް ފާހަގަކުރެވޭނެ ފަދަ އިރިޖިނަލް ޕެކިން ސާމާން ރާއްޖޭން ބޭރުން ގެނައުމަށެވެ.
"އަޅުގަނޑު ދެކޭ ހުވަފެނަކީ މި ބްރޭންޑް މުޅި ރާއްޖޭގައި ޤާއިމްކުރުން. އެހެންކަމުން އަޅުގަނޑުގެ މަސައްކަތުގެ ތަފާތުކަމާއި އޮރިޖިނަލްކަން ދައްކުވައިދޭފަދަ ޕެކޭޖިން ވަރަށް އަވަހަށް ހަދަން ފަށާނަން"، ޝިތުނާ ވިދާޅުވިއެވެ.
ޝިތޫގެ ޕްރޮޑަކްޓްތައް މިވަގުތު ލިބެން ހުރީ އައްޑޫގެ ފިހާރަތަކުންނާއި، ބައެއް ރިސޯޓުތަކުގައި އާއި މާލޭގެ ރެސްޓޯރެންޓަކުންނެވެ.
"ފެށުނުއިރު މާލެއަށްވެސް ސަޕްލައިކޮށްދިނިން. އެކަމަކު އެކަން އެހާ ރަނގަޅަކަށް ކުރިއަށް ނުދިޔަ. މައްސަލައަކީ އަޅުގަނޑުގެ އެއްވެސް އޭޖެންޓެއް އެތާކު ނެތް. އެއްވެސް ކޮންޓެކްޓްއެއް ނެތް"،
ނަމަވެސް ކައިރި މުސްތަޤުބަލެއްގައި މާލޭގެ ފިހާރަތަކުން "މާމީރި" ޕްރޮޑަކްޓްތައް ލިބޭނެ އިންތިޒާމް ހަމަޖެއްސުމަށް މަސައްކަތް ކުރަމުން އަންނަ ކަމަށް ޝިތޫ ބުންޏެވެ.
ފުރަތަމަ އެކްސްޕެރިމެންޓެއްގެ ގޮތުގައި ފެށުނު މަސައްކަތް މިހާރުދަނީ މަޑުމަޑުން ވަރުގަދަ ބްރޭންޑަކަށް ވަމުންނަމެވެ. އެތައް ގޮންޖެހުންތަކާއިއެކުވެސް، މި ޒުވާނާ ހުރީ އޭނާގެ ހުވަފެނާއިގެން ކުރިއަށް ދާށެވެ.