ޖޫނިއާ ޗެމްބާ އިންޓަނޭޝަނަލް (ޖޭސީއައި) މޯލްޑިވްސް އިން ގައުމީ ފެންވަރުގައި ދޭ "ޓެން އައުޓްސްޓޭންޑިން ޔަންގް ޕާސަންސް" އެވޯޑް ރޭ 10 ޒުވާނަކަށް ލިބިގެން ދިޔަ އިރު، އޭގެ ތެރޭގައި އައްޑޫގެ ދެ މީހަކު ހިމެނިއްޖެ އެވެ.
އެވޯޑް ލިބުނު އައްޑު އަށް ނިސްބަތްވާ ދެ މީހުންނަކީ ޒުވާނުންގެ ގައުމީ އެވޯޑް މިދިޔަ އަހަރު ހާސިލް ކުރި ފޭދޫ ދިމްނާ ފާކިރާއި އދ. އިން ކަނޑައެޅި ޒުވާން ލީޑަރުންގެ ތެރޭގައި ހިމެނޭ ހުޅުދޫ ސަފާތު އަހުމަދު ޒާހިރެވެ.
ދިމްނާ އާއި ސަފާތަށް "ޓެން އައުޓްސްޓޭންޑިން ޔަންގް ޕާސަންސް" އެވޯޑް ލިބުނީ އިންސާނިއްޔަތަށް ޚިދުމަތް ކުރުމާއި ދަރުމައަށް މަސައްކަތް ކުރުމުގެ ދާއިރާއިންނެވެ.
ޖޭސީއައި މޯލްޑިވްސްއަކީ، ޒުވާނުން ބައިނަލްއަގުވާމީ ގޮތުން ހަރަކާތްތެރި ބަޔަކަށް ހަދައި، މުޖުތަމަޢަށް ރަނގަޅު ބަދަލުތަކެއް ގެނެސްދިނުމަށް ވަކާލާތު ކުރާ ބަޔަކަށް ހެދުމުގެ މަގުސަދުގައި މަސައްކަތް ކުރާ ޖަމިއްޔާއެކެވެ.
އެ ޖަމިއްޔާ އިން ދޭ "ޓެން އައުޓްސްޓޭންޑިން ޔަންގް ޕާސަންސް" އެވޯޑް މި އަހަރު ދީފައި މި ވަނީ ހަތަރު އަހަރުގެ މެދުކެނޑުމަކަށް ފަހު އެވެ.