ކާޑުގެ ބާވަތްތަކުންނާއި، ކަރަންޓްގެ އަގު ބޮޑު ކުރުމާއި ގުޅިގެން ގިނަ އަދަދެއްގެ ބަޔަކު މިއަދު ހިތަދީ ބޮޑު މަގުގައި އިހްތިޖާޖްކޮށް އަޑު އުފުލައިފިއެވެ.
އެމްޑީޕީން އިސްނަގައިގެން މިއަދު ހަވީރު ހިތަދޫ ޒިޔާރަތްފަންނު ޖަންކްޝަން ސަރައްދުން ފެށި އިހްތިޖާޖްގައި، ގިނަ އަދަދެއްގެ ބަޔަކު ބައިވެރިވެފައިވާ އިރު ބައިވެރިން ވަނީ ސަރުކާރުގެ ދޯހަޅި ސިޔާސަތަށް ވަރަށް ބޮޑަށް ފާޑު ކިޔާފައެވެ.
މިއަދުގެ އިހްތިޖާޖްގައި ގުޅުފައިވާ ރަށްތަކުން ގިނަ ބަޔަކު ވަނީ ބައިވެރިވެފައެވެ. ކަރަންޓާއި ކާޑްގެ އަގުބޮޑުވުމާއި ގުޅިގެން ކުރިއަށްގެންދިޔަ އިހްތިޖާޖްގައި އައްޑޫގެ މޭޔަރ އަބްދުﷲ ސޯދިގް (ސޯބެ) އާއި ހިތަދޫ ދެކުނު ދާއިރާގެ މަޖްލިސް މެމްބަރު އަލީ ނިޒާރު ބައިވެރިވިއެވެ.
ކާޑުގެ ބާވަތްތަކަށް ސަރުކާރުން ދެމުން ދިޔަ ސަބްސިޑީ ކަނޑާލުމާއި ގުޅިގެން ކާޑްގެ ބާވަތްތައް އެންމެ އަގުބޮޑުކޮށް ލިބެނީ އައްޑޫ ރައްޔިތުންނަށެވެ.
އެހެންވެ، އިހްތިޖާޖްގެ ބައިވެރިންވަނީ އެއަގު ދަށް ކުރުމަށް ގޮވާލާފައެވެ.
އެމްޑީޕީން ބުނީ ކުރިއަށް ހުރި ދުވަސްތަކުގައި މީގެ އިތުރު އިހްތިޖާޖްތައް އައްޑޫގައި ކުރިއަށްގެންދިއުމަށް ނިންމާފައިވާ ކަމަށެވެ.