ޕްރިމިއާ ލީގު ލީޑު ކުރަމުން އަންނަ ސިޓީ އަށް ދެވަނައިގައި އޮތް ޓޮޓެންހަމް އަތުން ބަލިވެ ސީޒަނުގެ ފުރަތަމަ ބައްޔާއި ކުރިމަތިލާން ޖެހިއްޖެއެވެ.
މި ސީޒަނުގައި އަލަށް ޓީމާއި ހަވާލުވި ގާޑިއޯލާ ވަނީ މިދިޔަ ހަފްތާގެ ކުރިން %100 މޮޅުވުމުގެ ރިކޯޑެއް ގާއިމުކޮށްފައެވެ. ގާޑިއޯލާގެ މިރިކޯޑު ފުރަތަމަ ފަހަރަށް ނިމިގެން ދިޔައީ ޗެމްޕިއަންސް ލީގުގައި ސެލްޓިކް އާ ދެކޮޅަށް ކުޅެ 3-3 އިން އެއްވަރުވެގެންނެވެ.
ލީގުގައި ޓޮޓެންހަމް ހޮޓްސްޕާސްއާއި ދެކޮޅަށް ސިޓީ ކުޅުނު މެޗު ސްޕާސް ކާމިޔާބުކޮށްފައިވަނީ 0-2 ގެ ނަތީޖާއިންނެވެ. މެޗުގައި ފެނިގެން ދިޔަ ދެގޯލުވެސް ޖަހާފައިވަނީ މެޗުގެ ފުރަތަމަ ހާފުގައި ކަން ފާހަގަކުރެވެއެވެ.
މެޗުގެ ފުރަތަމަ ގޯލު 9 ވަނަ މިނެޓުގައި ވަދެފައިވަނީ ސިޓީގެ ޑިފެންޑަރު، އެލެކްސެންޑަ ކޮލަރޮވް ދިފާއު ކުރަން އުޅުނު ބޯޅައެއް އޭނާގެ އަތުން ބައިކޮޅަށް ވަދެގެންނެވެ.
ސްޕާސްގެ ދެވަނަ ގޯލު 38 ވަނަ މިނެޓުގައި ޖަހާފައިވަނީ ޑެލީ އަލީއެވެ. އަލީ އާއި ސޮންގެ އަވަސް ޕާސްތައް ވަނީ ސިޓީ ޑިފެންޑަރުންނަށް ދިފާއު ނުކުރެވިފައެވެ.
މެޗުން ބަލިވި ނަމަވެސް އަދިވެސް ތާވަލުގެ އެއްވަނައިގައި 18 ޕޮއިންޓާއެކު އޮތީ ސިޓީއެވެ. މޮޅަށް ފަހު ސްޕާސް ވަނީ 17 ޕޮއިންޓާއެކު ދެވަނައަށް ޖެހިލާފައެވެ.