އައްޑު އަށް މިވަގުތު ދިމާވެފައިވާ ބައެއް އިޖްތިމާއީ މައްސަލަތަކާ ގުޅިގެން އެކަންކަން ހައްލު ކުރުމަށް ކުރެވިދާނެ ކަންކަމާ ބެހޭ ގޮތުން ގުޅުން ހުރި މުއައްސަސާތަކަށް ދައުވަތު ދީގެން އައްޑޫ ސިޓީ ކައުންސިލުން މަޝްވަރާ ބައްދަލުވުމެއް ބާއްވައިފި އެވެ.
މި ބައްދަލުވުމުގައި ބައިވެރިވީ، މޯލްޑިވްސް ޕޮލިސް ސާވިސް އާއި ފެނަކަ ކޯޕަރޭޝަނާއި އެމްއާރްޑީސީ އެވެ.
މި ބައްދަލުވުމުގައި މޭޔަރު އަބްދުﷲ ސޯދިގް (ސޯބެ) ވިދާޅުވީ މި އަހަރުގެ ޖެނުއަރީން ފެށިގެން އޮގަސްޓު މަހާ ހަމައަށް ކުށްކުރުން ވަރަށް ބޮޑަށް މަދުވެފައި ވަނިކޮށް ކުއްލިއަކަށް މައްސަލަތައް އިތުރުވެގެން ގޮސްފައިވާ ކަމަށެވެ.
އެގޮތުން ކަރަންޓް ކެނޑި މަގުތައް އަނދިރިކޮށް އޮންނާތީ އާއި ސްޕީޑް ބްރޭކަރުތައް ނެގުމާ ގުޅިގެން އެކްސިޑެންޓްތައް އިތުރުވެގެން ގޮސްފައިވާ ކަމަށް މޭޔަރު ވިދާޅުވި އެވެ.
އޭނާ އަދި ވިދާޅުވީ މިފަދަ މައްސަލަތައް ހައްލު ކުރެވެން އޮތީ މުއައްސަސާތައް ގުޅިގެން ކުރެވޭ މަސައްކަތުންނެވެ.
ބައެއް ސަރަހައްދުތަކުގައި ކަރަންޓްގެ އަލިކަން ނެތުމުން އަނދިރިކޮށް އޮންނާތީ ޕޮލިހުންނަށް އެ ބޭފުޅުންގެ ޒިންމާ އަދާ ކުރުމުގައި ދަތިވާ ސަރަހައްދުތަކުގެ މައުލޫމާތު ކައުންސިލާ ހިއްސާކޮށް ދެއްވުމުން އެސަރަހައްދު ތަކުގައި ސްޓްރީޓް ލައިޓް ޖެހުމުގެ މަސައްކަތް ކައުންސިލުން ކޮށް ދެއްވުމަށް މަސައްކަތް ކުރައްވާނެ ކަމަށް ވެސް މޭޔަރު ވިދާޅުވި އެވެ.
ފުލުހުންގެ އައްޑޫ ކޮމާންޑް ސަބް އިންސްޕެކްޓަރު އޮފް ޕޮލިސް ޖަމްޝީދު ޢަލީ، ވިދާޅުވީ ބައެއް މަގުތަކުގެ ހާލަތު ގޯސްވުމުގެ ސަބަބުން ދުއްވާ މީހުން ދުއްވަން ޖެހޭ ފަޅި ނޫން އަނެއް ފަޅިއަށް އެރުމުން ވެސް އެކްސިޑެންޓްތައް ދިމާވެފައި އެބަހުރި ކަމަށެވެ.
އަދި މިފަދަ ހާދިސާތައް މެދުވެރިވުން މަދު ކުރުމަށްޓަކައި ރައްޔިތުންގެ ހޭލުންތެރިކަން އިތުރުވުން މުހިއްމު ކަމަށާއި އަދި މަގުތަކުގެ ހާލަތު ރަނގަޅުވުން ވެސް މުހިއްމު ކަމަށް ވެސް ފާހަގަ ކުރެއްވި އެވެ.
އައްޑޫގައި މިފަހަކަށް އައިސް ނުރައްކާތެރި އެކްސިޑެންޓްތައް ހިނގަން މެދުވެރިވީ ސްޕީޑް ބްރޭކަރުތައް ނެގުމުން ކަމަށް ގިނަ ބަޔަކު ފާހަގަ ކުރާ ކަމަށް ކައުންސިލުން ބުންޏެވެ.
އެހެންވެ ސްޕީޑް ބްރޭކަރުތައް އަލުން އެޅޭނޭ ދުވަހަކާ މެދު ބައްދަލުވުމުގައި އެމްއާރްޑީސީން ބުނީ ބްރޭކަރުތައް ކޮންކްރީޓް އަޅައިގެން އަލުން ހަރު ކުރުމުގެ މަސައްކަތް ކުރައްވަމުން ގެންދާ ކަމަށެވެ.
އެ ކުންފުނިން ބުނީ މަސައްކަތް މިވަގުތު މަސައްކަތް މަޑު ޖެހިފައި ވަނީ ސިމެންތި ނުލިބިގެން ކަމަށެވެ.
މީގެ އިތުރުން ތާރު އަޅާފައިވާ މަގުތަކުގެ ބައެއް ހިސާބުތަކުގެ ތާރުގަނޑު ކަނޑާފައި ވަނީ އެކި ފަރާތްތަކުގެ މަސައްކަތްތަކަށް ކަމަށާއި އެ ތަންތަނުގައި އަލުން ތާރު ނޭޅިގެން އުޅެނީ އެމަސައްކަތް ނުނިމިގެން ކަމަށް އެމްއާރްޑީސީން ބުންޏެވެ.
ބައްދަލުވުމަށް ކައުންސިލްގެ ފަރާތުން ހައުސިންގް މިނިސްޓްރީ އަށް ދައުވަތު ދިން ނަމަވެސް އެ މިނިސްޓްރީން ބައްދަލުވުމުގައި ބައިވެރިއެއް ނުވެ އެވެ.
އެހެންކަމުން އެ މިނިސްޓްރީ ހިމެނޭ ގޮތަށް އަލުން ބައްދަލުވުމެއް ބޭއްވުން މުހިއްމު ކަމަށާއި އެކަމަށް މަސައްކަތް ކުރާނެ ކަމަށް މޭޔަރު ވިދާޅުވި އެވެ.