ޔޫކޭގެ އަންހެން ކުދިން މީގެ 5 އަހަރު ކުރިއާ އަޅާބަލާއިރު އެކުދިންގެ ސޫރައާއިމެދު ހިތްހަމަޖެހޭވަރު ކުޑަކަމަށް ގާލްގައިޑިންގްއިން ކުރި ދިރާސާއަކުން ދައްކައިފިއެވެ.
2016 ގާލްސް އެޓިޓިއުޑްސް ސާވޭގައި ބައިވެރިވި 21 އަހަރުގެ 1،627 އަންހެން ކުދިންގެ ތެރެއިން އެކުދިންގެ ސޫރައާއިމެދު ހިތްހަމަޖެހޭ ކަމަށް ބުނީ އެންމެ 61 އިންސައްތަ ކުދިންނެވެ. 2011 ވަނަ އަހަރު އެ އަދަދަކީ 73 އިންސައްތައެވެ.
ދިރާސާވެރިން ބުނާ ގޮތުގައި އުމުރުން ހަތް އަހަރުގެ ކުދިންނަށްވެސް "ޕާފެކްޓް" ވުމަށްޓަކައި ވަރަށް ޕްރެޝަރު އާދެއެވެ.
ގާލްގައިޑިންގްގެ ޑިރެކްޓަރު ބެކީ ހިއުވިޓް ބުނީ މިއީ ހައިރާންކުރުވަނިވި ފަދަ ނަތީޖާއެއްކަމަށެވެ.
"އަންހެން ކުދިން ވަނީ އެކުދިންގެ ސިފައަށް ބަލާފަ ނިޔާނުކުރުމަށް ބުނެފަ"، އޭނާ ބުންޏެވެ.
"ގައިޑިންގައި ކޮންމެ ދުވަހަކުވެސް އަންހެން ކުދިން އެކުދިންގެ ހިއްވަރާއި ހިތްހެޔޮކަމުން އަހަރެމެން އިންސްޕަޔާކޮށްދޭ. އަހަރެމެން ހުރިހާ އެންމެންނަށްވެސް ގޮވާލަނީ އަންހެން ކުދިންނަށް އެކުދިންގެ އަގު ވަޒަން ކުރަނީ އެކުދިންނަކީ ކޮންކަހަލަ މީހުންނެއްތޯ ބަލާފަކަން، އެކުދިންގެ ސޫރައަކަށް ނޫންކަން އަންގައިދޭން"، ހިއުވިޓް ބުންޏެވެ.
ދިރާސާގައި ބައިވެރިވި ހަތް އަހަރާއި 10 އަހަރާއި ދެމެދުގެ 559 އަންހެން ކުދިންގެ ތެރެއިން:
36 އިންސައްތަ ކުދިން ބުނީ އެކުދިންނާއި ބެހޭގޮތުން އެންމެ މުހިންމު ކަމަކީ އެކުދިންގެ ސިފަކަން އިހުސާސްކޮށްދޭކަން
38 އިންސައްތަ ކުދިންނަށް ހީވީ އެކުދިން އެކަށީގެންވާ މިންވަރަކަށް ރީތި ނޫންކަމަށް
35 އިންސައްތަ އެއްބަސްވީ އަންހެނުން ނިޔާކުރަނީ އެމީހުން ހުނަރަށް ނޫން، ސޫރައަށް ބަލާފަކަމަށް
23 އިންސައްތައަށް ހީވީ އެކުދިން މުޅިން ފުރިހަމަ ނުވަތަ "ޕާފެކްޓް" ވާން ޖެހޭނެކަމަށް
މިހުރިހާ އިހުސާސްތަކެއް ދިރާސާގައި ބައިވެރިވި އުމުރުން 11 އަހަރާއި 21 އަހަރުގެ 1000 އަށްވުރެ ގިނަ ކުދިންގެ ކިބައިންވެސް ފެނުނު:
80 އިންސައްތައަށް ހީވީ އެކުދިންގެ ސޫރައަކީ އެކުދިންނާއި ބެހޭ އެންމެ މުހިންމު ކަން ކަމަށް
66 އިންސައްތައަށް ހީވީ އެކަށީގެންވާ މިންވަރަކަށް ރީތި ނޫން ކަމަށް
93 އިންސައްތަ އެއްބަސްވީ އަންހެނުން ނިޔާ ކުރަނީ އެމީހުންގެ ޝަޚްސިއްޔަތަށް ނޫން، ރީތިކަމަށް ބަލާފަކަމަށް
47 އިންސައްތަ ޤަބޫލުކުރަނީ އެކުދިންގެ ސޫރައާއިމެދު ކޮންފިޑެންޓް ނުވުމުގެ ސަބަބުން އެދެވޭ ގޮތުގައި ކަންކަން ނުކުރެވޭ ކަމަށް
61 އިންސައްތައަށް ހީވީ އެކުދިން މުޅިން ފުރިހަމަ ނުވަތަ "ޕާފެކްޓް" ވާން ޖެހޭނެކަމަށް
އެކުދިން ދިރާސާވެރިން ގާތު ބުނީ އެކުދިންގެ ހަށިގަނޑާއިމެދު އެހާ ހިތްހަމަނުޖެހުމުގެ ސަބަބުން ބައެއް ކަހަލަ ހެދުން ލުމަށާއި، ފޮޓޯ ނެގުމަށާއި، ކަސްރަތު ކުރުމަށާއި، ކްލާހުގައި ވާހަކަދެއްކުމަށާއި މީހުންގެ ތެރޭގައި އުޅުމަށް ޖެހިލުންވާ ކަމަށެވެ.
"އަހަންނަށް ހީވަނީ ފިރިހެން ކުދިންނަށްވުރެ ބޮޑަށް އަންހެން ކުދިންގެ ސޫރައަށް ބަލާހެން"، 10 އަހަރުގެ ލީރާ ބުންޏެވެ.
"ފިރިހެނުންނާ އަންހެނުންނާ ތަފާތުކުރުމަކީ އިންސާފެއް ކަމަކަށް އަހަންނަކަށް ހީނުވޭ. އެންމެންނާއި ދޭތެރޭވެސް ކަންތައް ކުރަން ޖެހޭނީ އެއް ގޮތަކަށް"، އޭނާ ބުންޏެވެ.
ގާލްގައިޑިންގްއިން ވަނީ ޒުވާން އަންހެނުންނާއި އަންހެން ކުދިންނަށް އެކުދިންގެ ކާމިޔާބީތަކާއި ހުނަރުތަކާއި ބެހޭގޮތުން ތަޢުރީފް ކުރުމަށް ސޯޝަލް މީޑިއާ ޗެލެންޖެއް ތަޢާރަފްކޮށްފައެވެ.
ގާލްގައިޑިންގްއިން އަށްޓަކައި އެ ސާވޭ މި އަހަރުގެ މާޗު މަހުން މެއި މަހުގެ ނިޔަލަށް ކުރިއަށް ގެންދިޔައީ ޗައިލްޑްވައިޒްގެ ފަރާތުންނެވެ.
ސާވޭގައި ބައިވެރިވި އަންހެން ކުދިން ހޮވީ ހަމައެކަނި ގައިޑިންގްގައި އުޅޭ ކުދިންގެ ތެރެއިންނެއް ނޫނެވެ. އޭގެ ބަދަލުގައި މުޅި ޔޫކޭގެ އެކި ސަރަޙައްދުތަކުންނެވެ.