ދިވެހި ރާއްޖޭގެ ގައުމީ ފުޓުބޯޅަ ޓީމުގައި ފަހަކަށް އައިސް އެންމެ މުހިއްމު ރޯލެއް ކުޅެމުން އަންނަ އައްސަދު އަލީ(އަޑުބަރޭ) ގައުމީ ޓީމުގެ ސްކޮޑަށް ނުނަގައި ބާކީކޮށްލައިފިއެވެ.
އޭޝިއަން ކަޕުގައި ލާއޮސް އާދެކޮޅަށް ކުޅެން ނެގި 23 ކުޅުންތެރިންގެ ސްކޮޑުން އަޑޭ އަށް ޖާގަ ދީފައި ނުވާއިރު އޭނާ ވަނީ އެންމެ ފަހަކަށް ގައުމީ ޓީމު ކުޅުނު ތިން މެޗުގައިވެސް ފާހަގަކޮށްލެވޭ މޮޅު ކުޅުމެއް ދައްކާފައެވެ.
އަޑޭގެ ބާކީ ކުރުން އިދިކޮޅު އެމްޑީޕީ އިން ކުއްވެރިކޮށްފައިވާއިރު އޭނާ އަކީ ފަހަކަށް އައިސް އެމްޑީޕީ އަދި ސަރުކާރާއި އިދިކޮޅު ހަރަކާތްތަކުގައި އިސްކޮށް ބައިވެރިވެ ފުލުހުންގެ ބެލުމުގެ ދަށަށް ތަކުރާރުކޮށް ގެނެސް ހައްޔަރުވެސް ކުރެވިފައިވާ ކުޅުންތެރިޔެކެވެ.
އެމްޑީޕީ އިން އިއްޔެ ނެރެފައިވާ ނޫސް ބަޔާނެއްގައި އަޑުބަރޭ ޓީމުން ބާކީ ކޮށްލާފައިވަނީ އެއްވެސް ކަހަލަ ޕްރޮފެޝަނަލް ގޮތެއްގައި ނޫން ކަމަށެވެ. އަދި އޭނާ އަށް ޓީމުން ޖާގަ ދީފައިނުވަނީ ސިޔާސީ ނުފޫޒު ޓީމުގެ ތެރެއަށް ވައްދައިގެން ކަމަށްވެސް އެމްޑީޕީގެ ނޫސްބަޔާނުގައި ބުނެފައިވެއެވެ.
ގައުމީ ޓީމުން އަޑުބަރޭ ނުހިމަނާ ޓީމު އިއުލާން ކުރުމާއި ބެހޭގޮތުން ބުނެފައިވަނީ މިދިޔަ މަހު އިދިކޮޅު ފަރާތްތަކުން ބޭއްވި އެއްވުމެއްގައި އޭނާ ބައިވެރިވުމުގެ ސަބަބުން ފުލުހުން 13 ދުވަސް ވަންދެން ބަންދުގައި ބަހައްޓާފައި ހުރުމުގެ ސަބަބުން ގައުމީ ޓީމުގައި ބައިވެރިވުމަށް ބޭނުންވާ މެޗު ފިޓްނެސް ދަށްވެފައި ހުރިކަމަށް ކޯޗަށް ފެންނާތީ އޭނާ ޓީމުން ބާކީ ކުރީކަމަށެވެ.