ރޭގަނޑު ވަޒީފާގައި މަސައްކަތް ކުރުމަކީ އަންހެނުންނަށް އުރަމަތީ ކެންސަރު ޖެހުމާ މާ ބޮޑު ގުޅުމެއް އޮތް ކަމެއް ނޫން ކަމަށް އާ ދިރާސާއަކުން ދައްކައިފި އެވެ.
2007 ވަނަ އަހަރު ދުނިޔޭގެ ސިއްޙަތާއި ބެހޭ ޖަމިއްޔާގެ ކޮމިޓީއަކުން ބުނީ ޝިފްޓްކޮށް މަސައްކަތް ކުރުމަކީ އުރަމަތީ ކެންސަރަށް މަގުފަހިވާ ކަމެއް ކަމަށެވެ. އެ ކޮމިޓީއިން އެހެން ބުނީ އިންސާނުންނާއި ޖަނަވާރުންގެ މައްޗަށް ކުރި ދިރާސާއަކަށް ބިނާކޮށެވެ.
އެހެންނަމަވެސް، އިނގިރޭސިވިލާތުގެ އުރަމަތީ ކެންސަރާއި ބެހޭ މާހިރުން 1.4 މިލިއަން އަންހެނުން ހިމެނޭ ގޮތަށް ކުރި އާ ދިރާސާއިން ދައްކާގޮތުގައި އުރަމަތީ ކެންސަރާއި ރޭގަނޑު ޝިފްޓްތަކުގައި މަސައްކަތް ކުރުމާއި ގުޅުމެއް ނެތެވެ.
ކެންސަރު ރިސާޗު ޔޫކޭ (ސީއާރުޔޫކޭ) ބުނީ މި އާ ހޯދުންތަކުގެ ސަބަބުން އަންހެނުންގެ ހިތްތަކަށް ފިނިކަމެއް ލިބިގެންދާނެ ކަމަށް އުންމީދުކުރާ ކަމަށެވެ.
ކެންސަރުގެ ދިރާސާ ކުރާ ބައިނަލްއަޤްވާމީ ޖަމިއްޔާ އައިއާރުސީ އިން 2007 ވަނަ އަހަރުގެ ނިންމުން ނިންމާފައިވަނީ ހަށިގަނޑުގެ މަސައްކަތް ކުރާ ގޮތަށް ޝިފްޓް މަސައްކަތުގެ ސަބަބުން ކުރާ އަސަރުގެ ސަބަބުންނެވެ.
އެއިރު އިންސާނުންނަށް އުރަމަތީ ކެންސަރު ޖެހުމުގެ ފުރުސަތާއި ބެހޭގޮތުން މާގިނަ ހެކިތަކެއް ނެތެވެ. އެހެންކަމުން އެ ނިންމުން ނިންމީ ހަމައެކަނި ލެބޯޓްރީ ތަކުގައި ކުރި ދިރާސާތަކެއްގެ މައްޗަށް ބިނާކޮށެވެ.
މި އާ ދިރާސާ ޗާޕުކޮށްފައިވަނީ ނޭޝަނަލް ކެންސާ އިންސްޓިޓިއުޓްގެ ޖާނަލްގައެވެ.
ޔޫކޭ ހެލްތު އެންޑް ސެކިއުރިޓީ އެގްޒެކެޓިވް، ކެންސާ ރިސާޗު ޔޫކޭ އަދި ޔޫކޭ މެޑިކަލް ރިސާޗު ކައުންސިލްއުން ފަންޑުކޮށްގެން ކުރިއަށް ގެންދިޔަ މި ދިރާސާގައި ޔޫކޭ، އެމެރިކާ، ޗައިނާ، ސްވިޑެން އަދި ނެދަލޭންޑްސްގެ ތަފާތު 10 ދިރާސާއެއްގެ ޑޭޓާއަށް ބަލާފައިވެއެވެ.
ދުވަހަކުވެސް ރޭގަނޑު ޝިފްޓްގައި މަސައްކަތް ކޮށްފައިނުވާ އަންހެނުންނާއި އަޅާބަލާއިރު، ރޭގަނޑު ކޮންމެވެސް ވަރަކަށް މަސައްކަތް ކުރި މީހުންނަށް އުރަމަތީ ކެންސަރު ޖެހުމުގެ އެއްވެސް ޖާގައެއް ނެތެވެ.
ދިރާސާވެރިން ހޯދިގޮތުގައި ރޭގަނޑު ޝިފްޓްގައި މަސައްކަތް އެތައް އަހަރުތަކެއް ވަންދެން ކުރިޔަސް އަދި ނުކުރިޔަސް އުރަމަތީ ކެންސަރު ޖެހުމުގެ ފުރުސަތު ހަމަ އެއްވަރު ކަމަށެވެ.
އެވަރޭޖުކޮށް ޔޫކޭގެ 2 އިންސައްތަ އަންހެނުން ވަނީ 20 އަހަރު ނުވަތަ އެއަށްވުރެ ގިނަ އަހަރުވަންދެން ރޭގަނޑު ޝިފްޓްގައި މަސައްކަތް ކޮށްފައެވެ.
ކޮނެމް އަހަރަކުވެސް ޔޫކޭގެ 53،000 އަންހެނުންނަށް އުރަމަތީ ކެންސަރު ޖެހެއެވެ. އަދި ގާތްގަނޑަކަށް 11،500 މީހުން އެ ބަލީގައި މަރުވެގެންދެއެވެ.