އިންސާނާގެ ހަށިގަނޑުގެ 60 އިންސައްތައަކީ ފެނެވެ.
ދުވާލަކު 8 ތަށި ފެން ބުއިމަކީ ޒަމާނުއްސުރެ ޑޮކްޓަރުން އިލްތިމާސް ކުރަމުން އަންނަ ކަމެކެވެ.
މިކަމުގެ ފަހަތުގައި މާބޮޑު ސައިންސްއެއް ނެތަސް، އަބަދުވެސް މީހާ ހައިޑްރޭޓްވެފައި ހުރުމަކީ މުހިންމު ކަމެކެވެ.
ތިރީގައި މިވަނީ ފެން ބުއިމުން ލިބޭ ފައިދާތަކެކެވެ.
1.ފެން ބުއިމުން މީހާއަށް މަސައްކަތް ކުރެވޭ މިންވަރު އިތުރުވޭ
ދެ އިންސައްތަހާ ކުޑަ އަދަދަކަށް ނަމަވެސް ހަށިގަނޑުން ފެން މަދުވެއްޖެނަމަ، މީހާގެ މަސައްކަތް ކުރުމުގެ ބާރަށް ވަރަށް ބޮޑު ނޭދެވޭ އަސަރެއް ކުރާނެއެވެ.
2. ފެންބޯ މިންވަރާއި މީހާގެ ހަކަތައާއި ސިކުނޑީގެ މަސައްކަތާއި ގުޅުމެއްވޭ
މީހާ ކުޑަކޮށް ނަމަވެސް ޑީހައިޑްރޭޓް (1-3 އިންސައްތައާއި ދެމެދުގެ މިންވަރަކަށް ހަށިގަނޑުން ފެން މަދުވުން) ވެއްޖެނަމަ، ހަކަތަ ހުންނަ މިންވަރާއި، ހަނދާން ހުންނަ މިންވަރާއި އަދި ޖުމްލަކޮށް ސިކުނޑީގެ މަސައްކަތްތަކަށް ވަރަށް ބޮޑަށް ބުރޫއަރާނެއެވެ.
3. ފެން ބުއިމުން ބޯރިހުން ރަނގަޅުވޭ
ޚާއްސަކޮށް މާ ބޮޑަށް ޑީހައިޑްރޭޓްވެފައިވާ މީހުން ފެން ބުއިމުން ބޮލުގައި ރިއްސުން ރަނގަޅުވެ، އެކަމުގެ އަލާމާތްތައް ކުޑަވެގެންދެއެވެ.
4. ފެން ބުއިމުން ބަނޑު ހަރުވުން ރަނގަޅުވޭ
ފެން ބުއިމަކީ ބަނޑު ހަރުވުމުގެ މައްސަލަތައް ކުޑަކޮށްދޭ އަދި މުޅިން ރަނގަޅުވެސް ކޮށްދޭ ކަމެކެވެ. ހަށިގަނޑަށް ބޭނުންވާ ވަރަށް ފެން ނޮބޯ މީހުން ބަނޑު ހަރުވާލެއް ގިނަވާނެއެވެ. އެކަން ހައްލުކުރުމަށްޓަކައި ގިނަ ގިނައިން ފެން ބޯށެވެ.
5. ފެން ބުއިމަކީ ކިޑްނީ ހިލަތަކަށް ފަރުވާއެއް
ގިނައިން ފެން ބުއިމަކީ ކިޑްނީގައި ހިލަ އުފެދުމުގެ ފުރުސަތު ކުޑަކޮށްދޭ ކަމެކެވެ. އެހެންނަމަވެސް، މިކަމުގައި އަދި އިތުރު ދިރާސާތަކެއް ކުރަން ޖެހެއެވެ.
6. ފެން ބުއިމަކީ ބަރުދަން ލުއިކޮށްދޭ ކަމެއް
ގިނައިން ފެން ބުއިމުން ކާތަކެތި ހަޖަމްވާލެއް އަވަސްވެ މީހާގެ މެޓަބޮލިކް ރޭޓް މައްޗަށް ދެއެވެ. ދުވާލަކު ދެ ލީޓަރު ފެން ބޯނަމަ ދުވާލަކު 96 ކެލޮރީސް އަނދާނެއެވެ. ކެއުމުގެ ބައި ގަޑިއިރު ކުރިން ފެން ބުއިމަކީ އެންމެ ރަނގަޅު ގޮތެވެ. އެއިރުން ބަނޑު ފުރޭލެއް އަވަސްވެފައި ކެވޭ މިންވަރު މަދުވާނެއެވެ.