ކާޑް ސަބްސިޑީ ކަނޑާލައި، ކާޑަށް ގެނައި ބަދަލާއި ގުޅިގެން އައްޑޫގެ ބައެއް ފިހާރަތަކުން ކާޑް ވިއްކުން ހުއްޓާލައިފިއެވެ.
"އައްޑޫލައިވް" އާއި ވާހަކަ ދެއްކި ފޭދޫގެ ވިޔަފާރިވެރިއަކު ބުނީ ކާޑް ކިރައިގެން ވިއްކުމުން ބޮޑު ގެއްލުމެއް ލިބޭ ކަމަށާއި، އެހެންވެ އެކަން ހުއްޓާލާފައިވާ ކަމަށެވެ.
ކާޑް ވިއްކުން މާލޭގެ ބައެއް ފިހާރަތަކުން ވަނީ ހުއްޓާލާފައެވެ.
ފޭދޫން ވާހަކަ ދެއްކި ވިޔަފާރިވެރިއާ ބުނީ އެސްޓިއޯއިން ކާޑް ގަނެގެން ދަތުރު ހަރަދު ދީ، ބާޒާރު ކޮތަޅަށް ކިލޯ ކިރައިގެން އަޅައިގެން ވިއްކުމަކީ މިހާރު ވިޔަފާރި އޮތް ގޮތުން ބޮޑު ގެއްލުމެއް ކަމަށެވެ.
"މިހާރު ނެތް ވިޔަފާރި ކުރެވޭނެ މާހައުލެއް، ކުދި ވިޔަފާރިތަކުގެ ކަރަންޓް ބިލް އެހާ ބޮޑު، ޓެކްސްގެ ކަންކަމާއި ހެދި އެހާ ކަންބޮޑު، މިހާރު އޮތީ ކާޑް ގަނެގެން ނުއަގުގައި ވިއްކަން މަޖްބޫރު ކޮށްފައި، ދެން މާރަނގަޅުތާ މިކަން ހުއްޓާލުން"
އޭނާ ބުނީ އެސްޓިއޯގެ ފިހާރަތަކުން ކިލޯ ކިރައިގެން ކާޑް ވިއްކުމުން މިކަން ހައްލުވެގެން ދާނެ ކަމަށެވެ.
"އަހަރެމެން ކުދި ވިޔަފާރިތަކަށް މިކަމެއް ނުކުރެވޭނެ. އެސްޓިއޯއިން ދެން ކިލޯ ކިރައިގެން އާއްމުންނަށް ކާޑް ވިއްކީމަ ހުންނާނީ ރަނގަޅަށް"
ކާޑްގެ ބާވަތްތައް ބޮޑު އަގުގައި ވިއްކާ ކަމުގެ ޝަކުވާ ލިބެމުން އަންނަ ކަމަށް އިކޮނޮމިކް މިނިސްޓްރީން ވަނީ ބުނެފައެވެ. އެ މިނިސްޓްރީން ބުނީ ކާޑްގެ ބާވަތްތައް ބޮޑު އަގުގައި ވިއްކާ ފަރާތްތައް ޖުރިމަނާ ކުރާނެ ކަމަށެވެ.
ކާޑް އަގު ބޮޑުވުމާއި ގުޅިގެން މުޅި ރާއްޖޭގައި ދަނީ އަޑު އުފުލަމުންނެވެ.