އެމެރިކާގެ ހަތަރު އަންހެނުންނަށް ދިރިތިބި ޑޯނަރުންގެ ފަރާތުން ލިބުނު ރަހިމާ އެކު، ޑެލަސްގެ ބޭލާ ޔުނިވާސިޓީ މެޑިކަލް ސެންޓަރު އިން ރަހިމު ޓްރާންސްޕްލާންޓް ހައްދައިފި އެވެ.
މިއީ އެމެރިކާގައި ދިރިހުރި ޑޯނަރުން ބޭނުންކޮށްގެން ރަހިމުގެ ޓްރާންސްޕްލާންޓް ހެދުނު ފުރަތަމަ ފަހަރަވެ.
އެ ހަތަރު ސާޖަރީވެސް ކުރިއަށް ގެންގޮސްފައިވަނީ މި އަހަރުގެ 14 ސެޕްޓެމްބަރާއި 22 ސެޕްޓެމްބަރާއި ދެމެދުގައެވެ. އޭގެތެރެއިން އާދައިގެ މިންވަރަކަށް ހަށިގަނޑުގެ ގުނަވަންތަކަށް ލޭ ނުލިބުމުގެ ސަބަބުން، ތިން ރަހިމު ޓްރާންސްޕްލާންޓް ވަނީ ނަގާފައެވެ. އެހެންނަމަވެސް، ހަތަރުވަނަ އަންހެން މީހާގެ ރަހިމަކީ ޓްރާންސްޕްލާން ކޮށްފައިވާ ރަހިމެކެވެ. އަދި މިހާތަނަށް އެކަމާއި ގުޅިގެން އޭނާއަށް އެއްވެސް މައްސަލައެއް ކުރިމަތިވެފައެއް ނުވެއެވެ.
ދިރިތިބި ޑޯނަރުން ބޭނުންކޮށްގެން ކުރާ ރަހިމު ޓްރާންސްޕްލާންޓްތައް އާންމު ގޮތެއްގައި ކާމިޔާބުވެއެވެ. މި ސާޖަރީ ކުރަން އެންމެ ފުރަތަމަ ފެށުނު ޤައުމުކަމަށްވާ ސްވިޑެންގައި ކުރެވުނު ނުވަ ޓްރާންސްޕްލާންޓްގެ ތެރެއިން ފަސް މީހުން ވަނީ ދުޅަހެޔޮ ދަރިންނަށް އުފަންދީފައެވެ. އަދި އޭގެތެރެއިން އެއް އަންހެނަކު މިހާރު އިނީ ދެވަނަ ދަރިފުޅަށް ބަލިވެއެވެ.
ޑރ. ޖޫލިއާނޯ ޓެސްޓާ އަކީ ބޭލާ ޔުނިވާސިޓީގެ ބަނޑުގެ ޓްރާންސްޕްލާންޓްތަކާއި ބެހޭ ބައިގެ ސާޖިކަލް ޗީފްއެވެ. އޭނާ ބުނާ ގޮތުގައި ބައެއް ފަހަރު ބޭނުން ގޮތަށް ކަންތައްތައް ނުވިނަމަވެސް، މި ބާވަތުގެ ސާޖަރީތައް ވަރަށް ބޮޑު ކުރިއެރުމެއް ދައްކާކަމަށެވެ. "ސައިންސްގެ ނަޒަރުން ބަލައިފިނަމަ، އެއީ އަހަރެމެންނަށް އޭގެއިން ވަރަށް ގިނަ އެއްޗެހިތަކެއް އެނގިގެންދާ ކަމެއް. އަދި އެއް ޕޭޝަންޓްއަކު އެބައުޅޭ ހަމަ ވަރަށް ރަނގަޅަށް ދުޅަހެޔޮކަންމަތީ. މިއީ ބޭސްފަރުވާގެ ތާރީޚަށް ވަރަށް ރަނގަޅު ފެށުމެއް"، އޭނާ ބުންޏެވެ.
އެމެރިކާގައި ކުރިއަށް ދިޔަ ސާޖަރީތަކުގައި ޑޯނަރުންގެ ގޮތުގައި ހޮވުނީ ބަލިމީހުންނާއި އެއްވެސް ގުޅުމެއް ނެތް، ނުވެސް ދަންނަ މީހުންނެވެ. ޓްރާންސްޕްލާންޓް ލިބުނު އަންހެނުންނަކީ އުމުރުން 20 އަހަރާއި 35 އަހަރާއި ދެމެދުގެ މީހުންނެވެ. އަދި ޑޯނަރުންގެ އުމުރަކީ 35 އަހަރާއި 60 އަހަރާއި ދެމެދުއެވެ. ގާތްގަނޑަކަށް 50 އަންހެނުން އެމީހުން ރަހިމު ޑޯނޭޓްކުރަން އިސްނެގިއެވެ. "އަހަރެން އެކަމާއިމެދު ހައިރާންވޭ"، ޓެސްޓާ ބުންޏެވެ. "އެމީހުން ބުނީ "އަހަރެމެންނަށްވެސް މަންމައަކަށް ވުމުގެ ފުރުސަތު ލިބުނު. މިހާރު މި ރަހިމުގެ އެއްވެސް ބޭނުމެއް ނެތް. ރަހިމުގެ ބޭނުން އެންމެ ބޮޑަށް ޖެހިފައިވާ މީހުންނަށް މި ރަހިމު ދިނުން މާ ރަނގަޅު." ޑޮކްޓަރެއްގެ ހައިސިއްޔަތުން އެކަން އަހަންނަށް ވަރަށް ޝޮކަކަށްވި. މި އަންހެނުންނަކީ ދެވަނައެއް ނެތް އަންހެނުން"، ޓެސްޓާ ބުންޏެވެ. ބޭލާއިން ވަނީ އޭގެއިން އެއްވެސް އަންހެނެއްގެ ނަން ހާމަ ނުކޮށެވެ.