ރައީސް އަބްދުﷲ ޔާމީން މިއަދު ފުވައްމުލަކަށް ވަޑައިގަތުމުން އެ ރަށުން ޕީޕީއެމްގެ ސަޕޯޓަރުން ހޫނު މަރުހަބާއެއް ކިޔާފައިވާ އިރު އެމްޑީޕީގެ މެމްބަރުން ރައީސް ޔާމީނާ ދެކޮޅަށް އަޑު އުފުލައިފި އެވެ.
ފުވައްމުލަކު އެއާޕޯޓުން ޔާމީނަށް ޕީޕީއެމްގެ ސަޕޯޓަރުން މަރުހަބާ ކިޔަމުން ދިޔަ އިރު، އެއާޕޯޓް ސަރަހައްދު ކައިރީ މަގުމަތީގައިި އެމްޑީޕީގެ ސަޕޯޓަރުންތަކެއް ތަފާތު ޝުއޫރުތައް ފާޅުކޮށްފައިވާ ބެނާތަކާ އެކު ނިކުމެ އަޑު އުފުލާފައިވެ އެވެ.
އެ މީހުން ފާޅު ކުރަމުން ދިޔަ ޝުއޫރުތަކުގެ ތެރޭގައި ކަރަންޓާއި ކާޑުގެ އަގު ބޮޑުވުން ފަދަ މައްސަލަތައް ހިމެނެ އެވެ. އެގޮތުން "ރައްޔިތުން ކަރަށް އަތް ނުބާނާތޮ" ފަދަ ޝުއޫރުތައް ލިޔެފައިވާ ބެނާތައް އެމްޑީޕީގެ ސަޕޯޓަރުން ގެންގުޅެފައިވެ އެވެ.
ރައީސް ޔާމީން މިއަދު ފުވައްމުލަކަށް ވަޑައިގެންނެވީ އެ ސިޓީގެ ފެނާއި ނަރުދަމާ ނިޒާމް ރަސްމީކޮށް އިފުތިތާހުކޮށް ދެއްވުމަށެވެ.
އެ ރަސްމިއްޔާތު އޮންނާމީ މިރޭ ފުވައްމުލަކު ހާފިޒް އަހުމަދު ސްކޫލްގަ އެވެ.