އަދިތިޔާ ޗޯޕްޅާގެ "ބޭފިކްރޭ" ގެ ޓްރެއިލާ ލޯންޗްކޮށްފި އެވެ.
ފްރާންސްގެ ވެރި ރަށް ޕެރިހުގައި އައިފެލް ޓަވަރުގައު ބޭއްވި ހަފުލާއެއްގައި ޓްރެއިލާ ލޯންޗްކޮށްފައިވާ އިރު، މިއީ މިހާތަނަށް އަދީ ލިޔެ، ޑައިރެކްޓް ކުރި އެންމެ ތަފާތު ފިލްމުކަން ފާހަގަކޮށްލެވެ އެވެ.
"ދިލްވާލޭ ދުލްހަނިޔާ ލޭޖާއޭގޭ" ގެ އިތުރުން "ރަބް ބެ ބަދާނީ ޖޯޅީ" ފަދަ އާއިލީ ލޯބީގެ ފިލްމްތައް ގެނެސް ދީފައިވާ އަދީގެ "ބޭފިކްރޭ" އަކީ ގައިގޯޅިވުމާއި ކިސް ކުރުން ގަދަ މަންޒަރުތައް ގިނަ ފިލްމެލެވެ.
ފިލްމުގެ ފުރަތަމަ ޓްރެއިލާ އިން ވެސް ވަނީ އެކަން ފެނިގެން ގޮސްފަ އެވެ.
ޕެރިހުގައި މަންޒަރުތައް ނަގާފައިވާ "ބޭފިކްރޭ" ގައި ލީޑް ރޯލް ކުޅެފައި ވަނީ ރަންވީރު ސިންގާއި ވާނީ ކަޕޫރެވެ.
ޓްރެއިލާ އިން ގިނަ ބަޔަކަށް އެންމެ އަަޅައި ގަތް އެއް ކަމަކީ ރަންވީރު ރަތް ކުލައިގެ ޖަންގިޔަލެއްގައި ފެންނަ މަންޒަރެވެ.
ފިލްމުގެ ޓްރެއިލާ ލޯންޗް ކުރުމާ އެކު ވަަރަށް ގިނަ ބައެއްގެ ފާޑު ކިޔުންތައް ވެސް އަދީއަށް އަމާޒުވެފައިވެ އެވެ.
އަދި މިއީ ފްރާންސްގެ ފިލްމް "ލަވް މީ އިފް ޔޫ ޑެއާ" އަސްލަކަށް ބަލައިގެން ހަދާފައިވާ ފިލްމެއް ކަމަށް ބެެލެވޭ ކަމަށް މީހުން ދަނީ ބުނަމުންނެވެ.
އޭނާ ބޮޑަށް މަޝްހޫރީ އާއިލާގެ އެންމެން އެއްކޮށް ތިބެގެން ބަލާލެވޭ ކަހަލަ އަސަރު ގަދަ ލޯބީގެ ފިލްމްތައް ހަދާ ޑައިރެކްޓަރެއްގެ ގޮތުގައި ކަމަށް ވިޔަސް، ގިނަ ބަޔަކު ބުނަނީ "ބޭފިކްރޭ" އަކީ އާއިލާ އެއްކޮށް ތިބެގެން ބަލާލަން ހެޔޮވާ ވަރުގެ ފިލްމަކަށް ނުވާނެކަން ކަށަވަރުވެއްޖެ އެވެ.
އަދި މިއީ "ޕޯން ފިލްމެއް" ގެ ގޮތުގައި ވެސް ބައެއް މީހުން ސިފަކޮށްފައިވެ އެވެ.
"ބޭފިކްރޭ" ސިނަމާތަކަށް އަންނާނީ ޑިސެމްބަރު މަހުގެ 9 ވަނަ ދުވަހު އެވެ.