ފްރެންޗައިޒް އުސޫލުން ރާއްޖޭގައި ބާއްވާ އެންމެ ބޮޑު ރިއަލިޓީ ޝޯ "މޯލްޑިވިއަން އައިޑޮލް" ސީޒަން ދޭއްގެ އައްޑޫ އޮޑިޝަން މިއަދު ފަށާފައިވާ އިރު، އޮޑިޝަނަށް ބޮޑު ތަރުހީބެއް ލިބެމުން އަންނަ ކަމަށް ޓީވީއެމުން ބުނެފި އެވެ.
އައްޑޫގައި އޮޑިޝަން ބާއްވަނީ ފުވައްމުލަކު ބައިވެރިންގެ އޮޑިޝަނާ ވެސް އެކުގަ އެވެ. އޮޑިޝަން ފެށި ހެނދުނު 9:00 އެވެ.
އޮޑިޝަން ކުރިއަށް ދަނީ ހިތަދޫގައި ހުންނަ އައްޑޫ ސިޓީ ކައުންސިލް އިދާރާގަ އެވެ.
ޓީވީއެމުން ބުނީ މުބާރާތުގެ އޮޑިޝަންގައި ބައިވެރިވާން އެސްއެމްއެސް ނުކުރާ ޒުވާނުންނަށް ވެސް ކައުންސިލް އިދާރާ އަަށް ގޮސް ރަޖިސްޓްރޭޝަން ހަދައި އޮޑިޝަންގައި ބައިވެރިވެވޭނެ ކަމަށެވެ.
އޮޑިޝަން ކުރިއަށް ދަނީ މުބާރާތުގެ ތިން ޖަޖުންނާ އެކުގަ އެވެ.
ޖަޖުންނަކީ މަރިޔަމް އުނޫޝާ، އިބްރާހީމް ޒައިދު އަލީ (ކުޑަ އިއްބެ) އަދި ޖަޖުންގެ ޕެނަލުން އަލަށް ފުރުސަތު ލިބުނު އިސްމާއީލް އައްފާނެވެ.
އޮޑިޝަން ކުރިއަށްދާ އިރު "މޯލްޑިވިއަން އައިޑޮލް " ގެ ޓައިޓްލް ސްޕޮންސަރު ދިރާގުން ވެސް އަންނަނީ ހަރަކާތްތަކުގައި ބައިވެރިވަމުންނެވެ.