ވެރިކަން ކުރާ ޕާޓީ، ޕީޕީއެމްގެ ރައީސް ކަމުގެ މަގާމުން ކުރީގެ ރައީސް އަލްއުސްތާޛް މައުމޫން އަބްދުލް ގައްޔޫމް ވަކިކުރުމަށް އެދި އެޕާޓީގެ ދެ ކައުންސިލް މެމްބަރަކު ސިވިލް ކޯޓަށް މައްސަލަ ވައްދައިފިއެވެ.
"އައްޑޫލައިވް އަށް މައުލޫމާތު ލިބިފައިވާ ގޮތުން ރައީސް މައުމޫނާއި ދެކޮޅަށް ކޯޓަށް މައްސަލަ ހުށައަޅާފައިވަނީ ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމުގެ އިތުރުން ހުޅުދޫ ދާއިރާގެ މެމްބަރު މުހައްމަދު ޝާހިދެވެ.
މިއަދު ރައީސް މައުމޫނާއި ދެކޮޅަށް ޕާޓީގެ ކައުންސިލް މެމްބަރުން ހުށައަޅާފައިވަނީ ޕާޓީގެ ރައީސްކަމުން މައުމޫން އެކަހެރިކޮށް، ސިޔާސީ ޕާޓީތަކުގެ ގާނޫނާއި ޕާޓީގެ ހިންގާ ގަވާއިދާއި އަސާސީ ގަވާއިދާ އެއްގޮތަށް ދިވެހި ރައްޔިތުންގެ އެންމެ މަތީ މަސްލަހަތުތައް ރައްކާތެރިކޮށްދޭނެފަރާތަކާ ޕާޓީގެ ހިންގުން ހަވާލުކޮށްދިނުން އެޕާޓީގެ ކައުންސިލްގެ މައްޗަށް ލާޒިމްކުރާ އަމުރެއް ނެރެދިނުމަށެވެ.
މީގެ އިތުރުން ޕާޓީގެ ރައީސް ކަމުގެ މަގާމު ފުރުއްވަމުންދާ ކުރީގެ ރައީސް މައުމޫން އަބްދުލް ގައްޔޫމް ޕާޓީ ހިންގެވުމުގައި އަސާސީ ގަވާއިދާއި ހިލާފަށް ޕާޓީގެ ބައެއް ގުނަވަންތައް އެމަނިކުފާނަށް ފެންނަ ގޮތަކަށް ސަސްޕެންޑު ކޮށް، ޕާޓީގެ ހަރަކާތްތައް ކުރިއަށް ގެންދެވުމަށް އެމަނިކުފާނު ހުރަށް އަޅުއްވަމުންދާ ކަމަށާއި އެކަންތައް ހުއްޓުވުމަށް ސިވިލް ކޯޓަށް ވެއްދި މައްސަލައިގައި އެދިފައިވެއެވެ.
ޕީޕީއެމްގެ ރައީސްގެ ހުއްދަނެތި ޕާޓީގެ ކައުންސިލްގެ އެއްވެސް ކޮމެޓީއެއްގެ މަސައްކަތް ކުރިއަށް ނުގެންދިޔުމަށާއި ކައުންސިލްގެ ބައްދަލުވުމެއް ނުބޭއްވުމަށް މައުމޫން އެންގެވި އެންގެވުމަށް އަމަލު ކުރުން ވަގުތީގޮތުން ހުއްޓާލުމަށް ސިވިލް ކޯޓުން ނެރުނު އަމުރަށް ތަބާނުވެ، އެ އަމުރަށް އެމަނިކުފާނު ހިލާފުވެ ވެފައިވާ ކަންވެސް ކޯޓަށް ހުށައެޅި މައްސަލާގައި ފާހަގަކޮށްފައިވާއިރު ސިޔާސީ ޕާޓީތަކުގެ ގަވާއިދާއިވެސް މައުމޫން ހިލާފު ވެފައިވާކަން ފާހަގަ ކޮށްފައިވެއެވެ.
މައްސަލައިގެ ޑިސްޕިއުޓް މަރުހަލާގެ ފުރަތަމަ ބައްދަލުވުމަށް ޕީޕީއެމް އަށް މިހާރު ޗިޓު ފޮނުވާފައިވާއިރު ޕީޕީއެމްގެ ފަރާތުން މީހަކު ހާޒިރު ނުވާ ނަމަ ޕާޓީގެ ޣައިރު ހާޒިރުގައި މައްސަލަ ނިންމާނެ ކަމަށް ޗިޓުގައި އަންގާފައިވެއެވެ.
ޕާޓީގެ އެތެރޭގެ ކޯޅުން އިންތިހާއަށް ގަދަވެފައިވާއިރު ރައީސް މައުމޫން ވަނީ މިއަދު ޕާޓީގެ ނައިބު ރައީސް، އަބްދުއް ރަހީމް އަބްދުﷲ މަގާމުން ބޭރުކޮށްފައެވެ.