1. ދޮންކެޔޮ
އޮސްޓްރޭލިއަން އިންސްޓިޓިއުޓް އޮފް ސްޕޯޓްގެ ހެޑް އޮފް ސްޕޯޓްސް ނިއުޓްރިޝަން، ޑރ. ލުއިސް ބާކް ބުނާ ގޮތުގައި ދޮންކެޔޮއަކީ ޤުދުރަތުގެ ޕަވާ ބާއެވެ. ހަޖަމުކުރެވޭފަދަ ކާބޯހައިޑްރޭޓްސްއިން ފުރިގެންވާ ދޮންކެޔޮއަކީ ނާރާއި މަސްގަނޑުގެ މަސައްކަތް ކުރުމަށް ފަސޭހަކޮށްދޭ ޕޮޓޭސިއަމްވެސް އެކުލެވިގެންވާ މޭވާއެކެވެ. ހަށިގަނޑުގައި މާގިނަ އިރުވަންދެން ޕޮޓޭސިއަމް ރައްކާވެފައި ނުހުންނާނެއެވެ. އެހެންކަމުން ކަސްރަތު ކުރަން ފެށުމުގެ ކުރިން ދޮންކެޔޮ ކެއުމަކީ އެދެވިގެންވާ ކަމެކެވެ.
2. އޯޓްސް
އޯޓްސްއަކީ ގިނަ އަދަދަކަށް ފައިބަރު އެކުލެވިގެންވާ އެއްޗެކެވެ. އޭގެ މާނައަކީ މަޑުމަޑުން ކާބޯހައިޑްރޭޓްސް ލޭގެތެރެއަށް ދޫކޮށްދޭނެ ކަމެވެ. އެހެންނަމަވެސް ޑރ. ބާކް ބުނާ ގޮތުގައި ބަނޑުގައި ގޭސް އުފެދޭހާ ގިނައިން އޯޓްސްގައި ފައިބަރު ނުހިމެނެއެވެ. އޯޓްސްގެ ސަބަބުން ލިބިދޭ ކާބޯހައިޑްރޭޓްސް އިން ކަސްރަތު ކުރާއިރު ހަށިގަނޑަށް ބޭނުންވާ ހަކަތަ ލިބިދެއެވެ. އަދި ހަމަ އެއާއިއެކު އޯޓްސްގައި ބީ ވިޓަމިންސްވެސް އެކުލެވިގެންވެއެވެ. ބީ ވިޓަމިންސް އަކީ ކާބޯހައިޑްރޭޓްސް ހަކަތައަށް ބަދަލުކޮށްދޭ އެއްޗެކެވެ. ކަސްރަތުކުރުމުގެ 30 މިނެޓް ކުރިން އެއް ޖޯޑް އޯޓްސް ކެއުން ރަނގަޅެވެ.
3. ހޯލްގްރެއިން ޕާން
ހޯލްގްރެއިން ޕާނުގެ އެއް ފޮތީގައިވެސް ވަރަށް ގިނަ ކާބޯހައިޑްރޭޓްސް އެކުލެވިގެން ވެއެވެ. އަދި ރަނގަޅު އަދަދަކަށް ޕްރޮޓީންސް ބޭނުންނަމަ، ހޯލްގްރެއިން ޕާންއާއިއެކު މާމުއި، ޖޭމް ނުވަތަ ފެނުކެއްކި ބިސް ބޭނުންކުރާށެވެ. ކަސްރަތުކުރުމުގެ 45 މިނެޓް ކުރިން ހޯލްގްރެއިން ޕާން ކެއުން ރަނގަޅުވާނެއެވެ.
4. މޭވާއާއި ޔޯގަޓް
މޭވާއަކީ ކާބޯހައިޑްރޭޓްސް ގިނަ އަދަދަކަށް ހިމެނިގެންވާ އެއްޗަކަށް ވީއިރު، ގްރީކް ޔޯގަޓްއަކީ ހައި ކޮލިޓީ ޕްރޮޓީން ހިމެނިގެންވާ އެއްޗެކެވެ. ކަސްރަތުކުރުމަށް ހަކަތަ ލިބިދޭހާ އަވަހަށް ޕްރޮޓީންއަކީ ހަޖަމުވާ އެއްޗެއް ނޫނެވެ. އެހެންނަމަވެސް މޭވާއިން ލިބިދޭ ކާބޯހައިޑްރޭޓްސް ވަރަށް އަވަހަށް ހަޖަމްވެއެވެ. އަދި ހަށިގަނޑުގެ މަސްތަކަށް ލިބިދާނެ ގެއްލުމަކަށްޓަކައި ޔޯގަޓް އިން ލިބިދޭ ޕްރޮޓީން ފަހުން ބޭނުންކުރެވއެވެ. ކޮންމެ ދުވަހަކުވެސް ނާސްތާއަކަށް މޭވާއާއި ގްރީކް ޔޯގަޓް ކެއުން ރަނގަޅުވާނެއެވެ.