މިޒަމާނުގެ ވަޒީފާ އަދާކުރުމުގެ މާހައުލަށް އައިސްފައިވާ ބަދަލާއިއެކު މީހުންގެ ސްޓްރެސް ލެވެލްތައްވެސް ވަނީ މައްޗަށް ގޮސްފައެވެ. އޭގެ ސަބަބުން މީހާގެ ހިތަށް ވަރަށް ގިނަ ނޭދެވޭ އަސަރުތަކެއް ކުރެއެވެ.
ހަށިގަނޑުގެ ރަނގަޅުވުމުގެ ބާރު ސްޓްރެސް ލެވެލަތައް މައްޗަށްދާ ވަރަކަށް ދަށްވެއެވެ. މިޒަމާނުގައި ޒުވާން އުމުރުފުރައިގެ މީހުންވެސް ވަނީ ހިތުގެ ބަލިތަކުގެ ޝިކާރައަކަށް ވެފައެވެ. އެހެންކަމުން ރަނގަޅު ސިއްހަތެއްގައި ދެމިހުރުމަކީ ވަރަށް މުހިންމު ކަމަކަށްވަނީ ވެފައެވެ.
1. ސިގަރެޓް ބޯނަމަ އެކަން ހުއްޓާލުމަކީ އެންމެ މުހިންމު އެއް ކަމެވެ. ދުންފަތުގެ އިސްތިއުމާލު ކުރުމަކީ މީހާގެ އުމުރު 15-25 އާއި ދެމެދު ކުރުކޮށްދޭ ކަމެކެވެ. ދުންފަތުގެ އިސްތިއުމާލު ނުކުރާ މީހުންނަށްވުރެ ދުންފަތުގެ އިސްތިއުމާލު ކުރާ މީހަކަށް ހާޓް އެޓޭކްއެއް ޖެހުން ދެގުނަ ކައިރިއެވެ. ދުންފަތުގެ އިސްތިއުމާލު ކުރުން ހުއްޓާލާ ވަގުތުން ފެށިގެން، ހާޓް އެޓޭކްއެއް ޖެހުމުގެ ފުރުސަތު ކުޑަވާން ފަށައެވެ.
2. ދިވެހިންނަކީ އާންމުކޮށް ކެއުމުގައި ލޮނު ގިނަ އަދަދަކަށް ބޭނުންކުރާ ބައެކެވެ. ދިވެހިންގެ ޘަޤާފީ ކެއުންތައް، މިސާލަކަށް ގަރުދިޔައާއި ރިހާކުރަކީ އޭގައި ވަރަށް ގިނައިން ލޮނު އެކުލެވިގެންވާ އެއްޗެހިއެވެ. މާގިނައިން ލޮނު ބޭނުން ކުރުމަކީ ހަށިގަނޑަށް ގެއްލުންހުރި ކަމެކެވެ. އޭގެ ސަބަބުން މީހާގެ ލޭ މައްޗަށްގޮސް، ހިތުގެ ބަލިތައް ޖެހުމަށް މަގުފަހިވެގެންދެއެވެ. އެހެންކަމުން، ކެއުމުގައި ބޭނުންވާ މިންވަރަށްވުރެ ގިނައިން ލޮނު ބޭނުން ނުކުރާށެވ.
3. ހުރިހާ ގޮތަކުންވެސް ހަމަހަމަ ޑައިޓެއް ގެންގުޅެން މަސައްކަތް ކުރާށެވެ. ތާޒާ މޭވާއާއި ތަރުކާރީއާއި، ހޯލްގްރެއިން ޕާން އަދި ބަތްފަދަ ސްޓާޗު ހިމެނޭ ކާއެއްޗެހި އަދި ޕްރޮޓީންއާއި ފެޓްސްވެސް ހިމެނިގެންވާ އެއްޗެހި ކާން އާދަ ކުރާށެވެ. ހަމައެކަނި އެއް ބާވަތަށް ބަރޯސާނުވެ، ހުރިހާ ވައްތަރަކުންވެސް ކުޑަ މިންވަރެއް ކެއުމަކީ އެދެވިގެންވާ ކަމެކެވެ.
4. ކަސްރަތު ކުރުމަށް އާދަކުރާށެވެ. ކޮންމެ ދުވަހަކު މަދުވެގެން 30 މިނެޓްގެ ކަސްރަތެއް ކުރާށެވެ. މީހާ ދުޅަހެޔޮކޮށް ހުރުމުން ހިތަށް ލިބޭ ފައިދާތަކުގެ އިތުރުން ސިކުނޑި ރަނގަޅުކޮށްދީ ނަފްސާނީ ދުޅަހެޔޮކަން އިތުރުކޮށްދެއެވެ.
5. ޤަވާއިދުން ހަކުރާއި ކޮލެސްޓްރޯލް ލެވެލްތައް ބަލާށެވެ. އެގޮތަށް ޢަމަލުކުރާނަމަ، ކިތަންމެ ކުޑަ ބަދަލެއް ކޮލެސްޓްރޯލްއާއި ހަކުރުގެ ލެވެލްތަކަށް އަޔަސް ފާހަގަކުރަން ފަސޭހަވާނެއެވެ. ހަކުރާއި ކޮލެސްޓްރޯލް މަތިވުމަކީ ވަރަށް ނޭދެވޭ ކަމެކެވެ. އެހެންކަމުން ކެއުމުގައި އެދެކަމަށްވެސް ބަލައިގެން ކެއުން އެދެވިގެންވެއެވެ.
6. ހަށިގަނޑުގެ ބަރުދަން ޤަވާއިދުން ބަލާށެވެ. އުނަގަނޑުގެ ސައިޒު މާބޮޑުވުމަކީ ރަނގަޅު ކަމެއް ނޫނެވެ. މީހާގެ އުމުރުގެ އެންމެ ފުރަތަ އަހަރުތަކުގައިވެސް ކޮލެސްޓްރޯލް ލޭ ދައުރުކުރާ ނާރުތަކުގައި ޖަމާވާން ފަށައެވެ. އެހެންކަމުން ފަލަވާޒާތުގެ އެއްޗެހި މަދުކުރަން ވާނެއެވެ. މާބޮޑަށް މީހާ ބަރުވުމަކީ މުސްތަޤުބަލުގައި އޭގެ ސަބަބުން ވަރަށް ގިނަ ސިއްޙީ މައްސަލަތަކާއި ކުރިމަތިލާން ޖެހޭނެ ކަމެކެވެ.
7. އަބަދުވެސް ސްޓްރެސް ލެވެލްތައް ތިރިކުރުމަށް މަސައްކަތްކުރާށެވެ. ކަންކަމާއިމެދު މާބޮޑަށް ވިސްނާ ފިކުރު ކުރުމަކީ ވަރަށް ނޭދެވޭ ކަމެކެވެ. އެހެންވާނަމަ، ރަނގަޅަށް ނުކެވި، ދުންފަތުގެ އިސްތިއުމާލުކުރުންފަދަ ނޭދެވޭ ކަންކަމާއި ދިމާލަށް މީހާއަށް ދެވޭނެއެވެ. އެއިރުން ހާޓް އެޓޭކްއެއް ޖެހުމުގެ ފުރުސަތު ބޮޑުވެގެންދެއެވެ. އޭގެ ފަރުވާއަކަށް ޔޯގާ ހަދަން އާދަކުރާށެވެ. މާ ބޮޑަށް މީހާ ނުތަނަވަސްވާނަމަ، ވަޒީފާއިން ކުރު މުއްދަތެއްގެ ޗުއްޓީއެއް ނަގާށެވެ.
8. އާއިލާގައި އެއްވެސް މީހަކަށް ހިތުގެ ބައްޔެއް ޖެހިފައިވޭތޯ ބަލާށެވެ. ދުންފަތުގެ އިސްތިއުމާލުކުރުމާއި، ލޭމައްޗަށް ދިއުމާއި، ކަސްރަތު ނުކުރުމާއި، މާބޮޑަށް ފަލަވުމާއި ހަކުރުބަލީގެ ސަބަބުން އާއިލާގެ އެއްވެސް މީހަކަށް ހިތުގެ ބަލި ޖެހިފައިވާނަމަ، ތިމާއަށްވެސް އެ ބަލި ޖެހުމުގެ ފުރުސަތު އެބައޮތެވެ.
9. ގިނައިން ހުނުމަކީ ހިތަށް އޮތް އެންމެ ރަނގަޅު ފަރުވާއެވެ. ހުނުމަކީ ހީވެސް ނުކުރާހާ ގިނަ ފައިދާތަކެއް ކޮށްދޭ ކަމެކެވެ. އެއީ ވަގުތުން މީހާގެ ހާސްކަން ފިލުވާލައި ހިތަށް ލުއިކޮށްދޭ ކަމެކެވެ.