މިހާރަކަށްއައިސް ޗޮކްލެޓް ދަނީ ގިނަ އަދަދެއްގެ ބިއުޓީ ޓްރީޓްމެންތަކުގައި ބޭނުންކުރަމުންނެވެ. އެގޮތުން މޫނުގައިއާއި، މޮއިސްޗުރައިޒިންގް ކްރީމްތަކުގައިއާއި އަދި ބޮޑީ ބަޓާތައް އުފެއްދުމުގައިވެސް ބޭނުންކުރެއެވެ. ގިނަ ސްޕާތަކުގައި ޗޮކްލެޓް ބޭނުންކޮށްގެން ޚާއްސަ ފަރުވާތައް ދެއެވެ.
ޗޮކްލެޓް މަސައްކަތް ކުރަނީ ކިހިނެތް؟
ޗޮކްލެޓްގައި ކެފެއިން އެކުލެވިގެންވެއެވެ. ކެފެއިންއަކީ ލޭދައުރުކުރާ މިންވަރު އިތުރުކޮށްދޭ އެއްޗެކެވެ. އޭގެ ސަބަބުން ހަންގަނޑު ރީތިވެގެންދެއެވެ. މީހާގެ މޫޑް ރަނގަޅުކޮށްދޭ މީރުވަސް ދުވާ އެއްޗެއްގެ ގޮތުގައި ޗޮކްލެޓް ތެލާއި، ޑާކް ކޮކޯ، އެލްމަންޓް ތެލާއި ވިޓަމިން ދިޔަފަދަ ތަކެއްޗާއި އެއްކޮށްގެން ޗޮކްލެޓް ބޭނުންކުރެވިދާނެއެވެ. ޗޮކްލެޓްގައި ހިމެނޭ ސެރޮޓޮނިންފަދަ ކެމިކަލްތައް އެކްޓިވޭޓްވުމުގެ ސަބަބުން މޫޑް ވަގުތުން ރަނގަޅުވެއެވެ.
• ހަންގަނޑު މާބޮޑަށް ހިކޭނަމަ ކޮކޯ ބަޓާ ބޭނުންކުރާށެވެ. އެއީ ހަންގަނޑު މޮއިސްޗުރައިޒްކޮށްދޭ އެއްޗެކެވެ.
• ކޮކޯ ބީންގެ ހަމުގައި އެންޓި އޮކްސިޑެންޓް އަދި އެންޓި-އޭޖިންގް ނުވަތަ މުސްކުޅިވުން ލަސްކޮށްދޭފަދަ މާއްދާތައް ހިމެނެއެވެ. ވީމާ، ފޭޝަލް ހަދާއިރު ކޮކޯ ބީން ބޭނުންކުރާށެވެ.
• ހިތްގައިމުކޮށް ފެންވަރާލަން ބޭނުންނަމަ، ދެ ޖޯޑް ދިޔާ ޗޮކްލެޓް އަދި ދެ ސައިސަމުސާ މާމުއި، ބައި ޖޯޑް ދިޔާ ސައިބޯނިއާއި އެއްކޮށްލާފައި ހޫނުފެނުން ފުރާފައިވާ ބާތު ޓަބަކަށް އަޅާލާށެވެ. އެއަށްފަހު އެފެނުން ފެންވަރާށެވެ.
• ހަންގަނޑު ތާޒާކޮށްލުމަށްޓަކައި ހޫނު ޗޮކްލެޓް ތެލުން މަސާޖުކުރާށެވެ. ކޮކޯގައި ހުންނަ ގުދުރަތީ ތެލުގެ ސަބަބުން ހަންގަނޑު މޮއިސްޗުރައިޒް ވާނެއެވެ.
އަމިއްލައަށް ތައްޔާރުކޮށްލެވޭނެ ފޭޝަލް މާސްކްއެއް:
30 ގުރާމް ޑާކް ޗޮކްލެޓް ވިރުވާށެވެ. ހިހޫވުމުން އޭގެ ތެރެއަށް ކުޑަ އޮލިވް އޮއިލް ފޮދެއް އަޅާފައި އެއްކޮށްލާށެވެ. ދެން މޫނުގައި އުނގުޅުމަށްފަހު ބަހައްޓާށެވެ. 7-10 މިނެޓް ފަހުން މޫނަށް އާވި އަރުވާށެވެ. އެއަށްފަހު ހޫނު ފެނުން މޫނު ދޮވެލާށެވެ.