ކޮންމެ މީހެއްގެ އުމުރުގެވެސް ކޮންމެވެސް ހިސާބެއްގައި ބޮލުން އިސްތަށި ފޭބުމުގެ މައްސަލައާއި ކުރިމަތިލާން ޖެހެއެވެ. މިއީ އާންމުކޮށް ފިރިހެނުންނަށް ދިމާވާ މައްސަލައެއް ކަމުގައިވިޔަސް، މިކަމުގެ އަސަރުކޮށްފައިވާ އަދި ކުރަމުންދާ އަންހެނުންގެ އަދަދުވެސް ވަކި މަދެއް ނޫނެވެ. އާންމު ގޮތެއްގައި އިސްތަށި ފޭބުމަށް ދިމާވާ ސަބަބުތައް ތިރީގައި އެވަނީއެވެ.
1. އުމުރުން ދުވަސްވުން
މީހާގެ އުމުރުން ދުވަސްވާ ވަރަކަށް، އިސްތަށި ފޭބުމަކީ ވަރަށް ކައިރި ކަމެކެވެ. އަންހެނުންނާއި ފިރިހެނުންގެ އުމުރުން 30 އަހަރުވާއިރު، އިސްތަށި އުފެދުމާއި ދިގުވުން ލަސްވެ، އިސްތަށި ފައިބާ މިންވަރު އިތުރުވާކަން ފާހަގަކުރެވެން ފަށާނެއެވެ. އެއީ އިސްތަށީގައި ހުންނަ ފޮލިކަލްސްތައް "ރެސްޓިންގް ފޭސް"އަކަށް ގޮސް މަސައްކަތް ކުރުން ހުއްޓާލާތީއެވެ.
2. ވާރުތަވުން
ބައެއް މީހުންގެ ބޮލުން އިސްތަށި ފޭބުމަށް ދިމާވާ އެއް ސަބަބަކީ އެކަން އާއިލީގޮތުން ވާރުތަވެފައިވުމެވެ. އާއިލާގެ މަންމަ ފަރާތުން ނުވަތަ ބައްޕަ ފަރާތުން ލިބިފައިވާ ޖީންސްގެ ސަބަބުން އެއްވެސް އެހެން ސަބަބަކާ ނުލައިވެސް މީހާ ތަލަވުމަށް މަގުފަހިވެގެން ދެއެވެ.
3. ސިއްޙީ މައްސަލަތައް
ޓައިރޮއިޑް، ލޫޕުސް، ހަކުރުބަލި، އަޔަން މަދުވުން އަދި އެނީމިއާގެ ސަބަބުން އިސްތަށި ފޭބުމަށް ދިމާވެއެވެ. އަދި ހަމަ އެހެންމެ އކެސިޑެންޓްއެއް ދިމާވުން ނުވަތަ ސާޖަރީއެއް ކޮށްފައިވާ މީހެއްގެ ހަށިގަނޑަށް ލިބޭ ސްޓްރެސްގެ ސަބަބުން އިސްތަށި ފެޅުމާއި ދެމެހެއްޓުމުގެ ނިޒާމަށް ލޮޅުންއަރައި، އިސްތަށި ފައިބާގޮތްވެއެވެ.
4. ބޭސް
ލޭ ތުނިކުރަންދޭ ބޭސް، ކީމޯތެރަޕީއަށްދޭ ބޭސް، ބީޓާ ބްލޮކާސް، އެންޓި ޑިޕްރެސެންޓްސް، ދޭތެރެ ދުރުކުރާ ބޭސް އަދި ބޮޑީ ބިލްޑިންގްގައި ބޭނުންކުރާ އެނެބޮލިކް ސްޓެރޮއިޑްސްއަކީ އިސްތަށި ފޭބުން އަވަސްކޮށްދޭ ބޭސްތަކެވެ. އޭގެ އިތުރުން ވިޓަމިން އޭ މަގިނައިން ނެގުމަކީވެސް އިސްތަށި ފޭބުމަށް ދިމާވާ ކަމެކެވެ.
5. ހޯމޯންތައް ބެލެންސްނުވުން
ބަނޑުބޮޑުވުމާއި، ބާލިޣުވުމާއި، ޕޮލިސިސްޓިކް އޯވަރީ ސިންޑްރޯމްއާއި މެނޮޕޯސް އަކީ ހޯމޯންތައް އާދަޔާއި ޚިލާފު ލެވެލްއަކަށް ގެންގޮސްދޭ ކަންކަމެކެވެ. އޭގެ ސަބަބުން މާގިނަ ހެއާ ފޮލިކަލްސްތައް ރެސްޓިންގް ފޭސްއަށް ދެއެވެ. އަދި އިސްތަށި ފައިބަން ފަށައެވެ.
6. ކެއުން ބުއިމުގެ އާދަތައް
ޕްރޮޓީންސް، ވިޓަމިންސް އަދި މިނަރަލްސް މަދުން ލިބިދޭފަދަ ދުޅަހެޔޮ ނޫން އެއްޗެހި ކެއުމަކީ އިސްތަށި ފޭބުން އަވަސްކޮށްދޭ ކަމެކެވެ. މާބޮޑަށް ޑައިޓްކުރުމާއި އެނެރޮކްސިއާފަދަ ބަލިތަކުގެ ސަބަބުން ހަށިގަނޑުގައި ނިއުޓްރިޝަން ހުންނަ މިންވަރު ދަށްވެ، މީހާގެ ހެދިބޮޑުވުން ލަސްކޮށްދެއެވެ.
7. ސްޓްރެސް
ބުރަ ވަޒީފާއެއްގެ ސަބަބުން ނުވަތަ ހަމަނުޖެހޭ ގުޅުމެއްގައި އުޅުމަކީ އިސްތަށި ފޭބުމުގެ މައްސަލަ އިތުރަށް ގޯސްކޮށްދޭ ކަމެކެވެ. އޭގެ ސަބަބަކީ ބޮލަށާއި ބޮލުގެ ތަލައަށް ލޭ ލިބެންޖެހޭ މިންވަރަށް ލޭ ނުލިބުމެވެ. އޭގެ ސަބަބުން އިސްތަށި ފެޅުމާއި ބޮޑުވުންވެސް ލަސްވެއެވެ.
8. އިސްތަށިގަނޑު ރަނގަޅަށް ނުބެލެހެއްޓުން
ރަނގަޅަށް ބޮލުގެ ތަލަ ނުދޮންނަނަމަ، ސީބަމްއާއި މިލަ ތަލުގައި ހަރުލާގޮތް ވެއެވެ. އޭގެ ސަބަބުން ހެއާ ފޮލިކަލްތައް ބެދި، އިސްތަށި ފެޅުމަށް ހުރަސްއެޅިގެންދެއެވެ.
9. މާބޮޑަށް ސްޓައިލްކުރުން
އިސްތަށިގަނޑު ސްޓައިލް ކުރުމަށް ބޭނުންކުރާ ޕްރޮޑަކްޓްތަކުގައި އާންމުކޮށް ހުންނަ ކެމިކަލްތަކަކީ އިސްތަށިގަނޑަށް ގެއްލުންދޭ އެއްޗެހިއެވެ. އެގޮތުން އިސްތަށިގަނޑު ޑައިކުރުމަށާއި، ރިލެކްސްކުރުމަށް އަދި ބްލީޗްކުރުމަށް ބޭނުންކުރާ އެއްޗެހިއަކީ އިސްތަށިގަނޑު ބަލިކަށި ކުރުވާ އެއްޗެހިއެވެ. ހަމަ އެގޮތުން މާބާރަށް ބޯ އެއްސުންފަދަ ގޮތްގޮތަށް އިސްތަށިގަނޑު ސްޓައިލް ކުރުމަކީވެސް އިސްތަށިގަނޑު ހީނަރުކޮށްދޭ ކަމެކެވެ. އޭގެ ސަބަބުން އިސްތަށި ފޭބުމުގެ މައްސަލަ ދިމާވެއެވެ. އަދި ސްޓައިލް ކުރުމަށް ބޭނުންކުރާ ޕްރޮޑަކްޓްތަކަކީ އިސްތަށިގަނޑުގެ އެންމެ ބުޑާހަމައަށް މަސައްކަތް ކުރާ އެއްޗެހިކަމުން، ދާއިމީ ގެއްލުން ލިބުމަކީވެސް އެކަށީގެންވާ ކަމެކެވެ.