ރާއްްޖޭގެ ސިޔާސީ މަސްރަހްގައި މިއަދު ދެކެވެނީ އެންމެ ވާހަކައެކެވެ. އެއީ ޕީޕީއެމްގެ ތެރޭގައި ހެދިފައިވާ ދެ ފެކްޝަންގެ ވާހަކައެވެ. ޕީޕީއެމްގެ މިލްކުވެރިކަމުގެ ވާހަކައެވެ.
ޕީޕީއެމްގެ އަސާސީ ގަވާއިދުގައިވާ ގޮތުން ޕާޓީގެ އެންމެ އިސްފަރާތަކީ ޕާޓީގެ ރައީސްއެވެ. ޕާޓީގެ ރައީސްއަށް ޕާޓީ ހިންގުމުގެ ހުރިހާ ޒިއްމާއެއް ހަވާލުކޮށްފައިވާ އިރު އެޒިއްމާ ކޯޓަކުން އެހެން ފަރާތަކަށް ދެވޭނެ ޖާގައެއް ނެތެވެ. އެކަން ކުރެވެން އޮންނަނީ ޕާޓީގެ ކައުންސިލަށް ހުށަހަޅައިގެން ޕާޓީގެ އާއްމު ޖަލްސާއިންނެވެ.
ނަމަވެސް ޕީޕީއެމް ހިންގުން އެޕާޓީގެ މުސްތަޝާރު އާއި ހަވާލުކުރުމަށް ސިވިލް ކޯޓުން މިވަނީ އަމުރުކޮށްފައެެވެ. އަދި އެހުކުމަށް ހައިކޯޓުން ދާއިދުކޮށް އެންމެ ފަހު ސްޕްރީމް ކޯޓުންވެސް ވަނީ އެހުކުމް ބަލައިގެންފައެވެ. އެއާއި އެކު އެ މައްސަލައިގެ ހުރިހާ ޝަރުއީ މަރުހަލާއެއް ނިމުނީއެވެ. ޕާޓީގެ މެމްބަރުން ހޮއްވެވި ޕާޓީގެ ރައީސްގެ މަސްއޫލިއްޔަތާއި ބާރު ޕާޓީގެ އަސާސީ ގަވާއިދުގައިވާ ގޮތަށް އެއްވެސް ޒިއްމާއެއް ނެތް ރަމްޒީ ފަރާތަކާއި ހަވާލުކޮށްގެންނެވެ.
ޕާޓީގެ މައްސަލަތައް ކޯޓުގައި ހިނގަމުން ދިޔަ އިރު ޕާޓީގެ ރައީސްގެ ފެކްޝަނާއި، މުސްތަޝާރުގެ ފެކްޝަނުން ދިޔައީ މަގާމުތަކަށް މީޙުން އައްޔަން ކުރަމުން ބައެއް ފަރާތްތައް ޕަޓީންނާއި މަގާމުތަކުން ވަކި ކުރަމުންނެވެ. މި ހައިޖާނަކާއި އެކު "އަސްލު ޕީޕީއެމް" މިވަނީ އޮޅުން ބޮޅުންގަނޑެއްގެ ތެރޭގައެވެ.
ކޯޓުގެ އަމުރާއި އެކު ދައުލަތުގެ އިދާރާތަކުން ބަލައިގަންނަނީ ޕާޓީގެ މުސްތަޝާރުގެ ފެކްޝަނެވެ. ޕާޓީގެ ހަގީގީ ޒިއްމާ ހަވާލުވެފައިވާ ޕާޓީގެ ރައީސްގެ ފެކްޝަން އެއްވެސް އިދާރާއަކުން ބަލައި ނުގަނެއެވެ. އެހެންވެ ޕާޓީގެ ރައީސް ވަނީ އިލެކްޝަން ކަމިޝަން، ހިއުމަން ރައިޓްސްއިން ފެށިގެން އެޓާނީ ޖެނެރަލް އާއި ހަމައަށް ސިޓީ ފޮނުއްވާފައެވެ. އެސިޓީ ތަކަށް އަދި ޖަވާބެއް ނެތެވެ.
ޕާޓީގެ ރައީސް މައުމޫން އަބްދުލް ގައްޔޫމް ވިދާޅުވީ ޕާޓީގައި ދެ ފެކްޝަނެއް ނެތްކަމަށާއި ޕާޓީގައި އޮތީ ޕާޓީގެ ރައީސްގެ ފަހަތުގައި އޮތް އެންމެ ފެކްޝަނެއް ކަމަށެވެ. ދެން އޮތީ އައިރު ގާނޫނީ ޕީޕީއެމްކަމަށް ޕާޓީގެ ރައީސްގެ ފެކްޝަން ދަނީ ކެނޑިނޭޅި ބުނަމުންނެވެ.
މައްސަލަ މިހާބޮޑަށް ހޫނުވެފައިވާ އިރު ބައެއް ފަރާތްތަކުން ބުނަނީ އަސްލު ޕީޕީއެމް އަކީ މައުމޫން ފެކްޝަން ކަމަށެވެ. ރައީސް ޔާމީން ފެކްޝަނަކީ ޕީޕީވައި ކަމަށެވެ.
"މިއީ ޕީޕީއެމް އާއި ޕީޕީވައި އެއް މިއުޅެނީ، އަސްލު ޕީޕީއެމް އަކީ ރައީސް މައުމޫން"
ދެ ފެކްޝަންގެ ކޯޅުން ބޮޑުވެފައިވަނިކޮށް އިއްޔެ މަޖްލިސްގެ 5 މެމްބަރަކު މައުމޫންއަށް ނުވަތަ "އަސްލު ޕީޕީއެމް"އަށް ތާއިދު ކުރާކަން މިވަނީ ހާމަކޮށްފައެވެ. އެާއި އެކު މަޖްލިސް ތެރޭގައި ރައީސް ޔާމީން ކޮންޓްރޯލް ކުރައްވަމުން ގެންދެވި މެޖޮރިޓީއަށް މިވަނީ ލޮޅުންތަކެއް އަރާފައެވެ.
އެއާއި އެކު ރޭ ރައިސް މައުމޫން މިވަނީ ރައީސް ޔާމީންގެ ސަރުކާރަށް އެއްބާރުލުން ނުދެއްވާނެކަމަށް ވިދާޅުވެ ތާއިދު އަނބުރާ ގެންދަވާފައެވެ. މައުމޫން ވިދާޅުވީ ޕީޕީއެމްގެ ތެރެއަށް ޕީއޭއިން ވަދެ ޕާޓީ ހަލާކުކޮށްލާފައިވާ ކަމަށެވެ.
ޕާޓީގެ ތެރެއަށް "ޕީޕީވައި" ގަދަވެގަނެ، ޕީޕީއެމްގެ އަސްލު މަގްސަދު ކިލަނބު ކޮށްލާފައިވާކަމަށް ރައީސް މައުމޫން ރޭ ވަނީ ވިދާޅުވެފައެވެ.
ކޮންމެއަކަސް "ޕީޕީއެމް" ގައި "ޕީޕީވައި" އުފެދި މުޅި ޕާޓީ މިވަނީ ފުނޑުފުޑުވެފައެވެ.