ހައިޕާޓެންޝަން ނުވަތަ ލޭމައްޗަށް ދިއުމަކީ ބުނެވޭ ގޮތުގައި މަޑުމަޑުން މީހާ މަރާލާ ކަމެކެވެ. ސަބަބަކީ އެކަމަކީ އެއްވެސް ސީރިއަސް އަސަރުތަކެއް ނުފެނި ދުވަހުން ދުވަހަށް ގޯސްވަމުންދާ އެއްޗަކަށް ވާތީއެވެ. ތިރީގައި މިވަނީ ލޭމައްޗަށް ދިއުމުން ސަލާމަތްވުމަށްޓަކައި ކުރެވިދާނެ ބައެއް ކަންތައްތަކެވެ.
1. ކޮންމެ ދުވާހަކުވެސް މަދުވެގެން ހަތް ގަޑިއިރަށް ނިދާށެވެ. ފަސް ގަޑިއިރު ނުވަތަ އެއަށްވުރެ މަދުން ނިދާ މީހުންނަކީ ލޭމައްޗަށް ދިއުމުގެ މައްސަލައާއި ކުރިމަތިލާން ޖެހުން ވަރަށް ކައިރި މީހުންނެވެ.
2. ހަށިގަނޑަށް ބޭނުންވާ ވަރަށްވުރެ ގިނައިން ލޮނު ނުކާށެވެ. ލޮނުގެ ސަބަބުން ހަށިގަނޑުގައި ފެންހަރުލައެވެ. މާގިނައިން ލޮނު ކައިފިނަމަ، ހަށިގަނޑުގައި ހުންނަ އިތުރު ފެނުގެ ސަބަބުން ލޭގެ ޕްރެޝަރު މައްޗަށް ދެއެވެ.
3. ހަފްތާއަކު މަދުވެގެން 150 މިނެޓްއަށް ކަސްރަތު ކުރާށެވެ. ކަސްރަތު ކުރުމަކީ ބޭސް ނުހިމެނޭ ޤުދުރަތީ ފަރުވާއެކެވެ. ޤަވާއިދުން ކަސްރަތު ކުރުމަކީ ހިތް ވަރުގަދަ ކޮށްދޭ ކަމެކެވެ. ވަރުގަދަ ހިތެއް ކުޑަ މަސައްކަތަކުން ގިނަ ލޭ ފޯރުކޮށްދޭނެއެވެ. އެހެންނަމަވެސް، ދުޅަހެޔޮ ލޭގެ ޕްރެޝަރެއް ބެހެއްޓުމަށްޓަކައި، އާދަވެގެން ކަސްރަތު ކުރުމަކީ މުހިންމު ކަމެކެވެ.
4. ކޮންމެ ދުވަހަކު މަދުވެގެން 10 މިނެޓްއަށް މެޑިޓޭޓް ކުރާށެވެ. ސްޓްރެސްއަކީ ހަށިގަނޑުގެ ޤުދުރަތީ އެލާމް ސިސްޓަމްއެވެ. އޭގެ ސަބަބުން އެޑްރީނަލިން ކިޔާ ހޯމޯންއެއް ރިލީޒްވެއެވެ. އެޑްރީނަލިންއަކީ ނޭވާލުމާއި، ހިތުގެ ވިންދު އަވަސްކޮށްދީ ލޭގެ ޕްރެޝަރު މަތިކޮށްދޭ އެއްޗެކެވެ.
5. ގިނަގިނައިން މޭވާއާއި ތަރުކާރީ ކާށެވެ. ދިރާސާތަކުން ދައްކާ ގޮތުގައި މޭވާއާއި ތަރުކާރީ އަދި ލޯ-ފެޓް ކިރު ހުންނަ އެއްޗެހި ކެއުމަކީ ލޭގެ ޕްރެޝަރު ދަށްކޮށްދޭ ކަމެކެވެ. އެއީ ޙާއްސަކޮށް ހައިޕާޓެންޝަން ހުންނަ މީހުންނަށެވެ.
6. ބަރުދަން ލުއިކުރާށެވެ. މާބޮޑަށް ބަރު މީހުންގެ ފެޓީ ޓިޝޫތައް ގިނަވާނެއެވެ. އޭގެ ސަބަބުން އެމީހުން ވެސްކިއުލާ ރެސިސްޓެންސް އިތުރުވެ، ހިތް ކުރަންޖެހޭ މަސައްކަތް އިތުރުވެ ބުރަވެގެންދެއެވެ.