ޖެނުއަރީ މަހުގެ 14 ގައި ބާއްވާ ލޯކަލް ކައުންސިލްތަކުގެ އިންތިޚާބަށް ކުރިމަތިލުމުގެ ފުރުސަތު އިލެކްޝަން ކޮމިޝަނުން ހުޅުވާލައިފި އެވެ.
އެ ކޮމިޝަނުން ވިދާޅުވީ މިއަދުން ފެށިގެން އަންނަ މަހުގެ 15 ވަނަ ދުވަހާ ހަމައަށް އިލެކްޝަންސް ކޮމިޝަނުންނާއި ރަށު ކައުންސިލްތަކުގެ އިދާރާތަކުން އިންތިހާބަށް އެދޭ ފޯމް ބަލައި ގަންނާނެ ކަމަށެވެ.
ލާމަރުކަޒީ ޤާނޫނަށް މިދިޔަ އަހަރު ގެންނެވި އިސްލާހާ އެކު ކައުންސިލަތަކަށް މެމްބަރުން އިންތިޚާބު ކުރަންޖެހޭ ޢަދަދަށް ވަނީ ބޮޑެތި ބަދަލުތަކެއް އައިސްފަ އެވެ.
މި ބަދަލާ އެކު 3،000 ން ދަށުގެ އާބާދީ ހިމެނޭ ކޮންމެ ރަށަކަށް ތިން ކައުންސިލަރުން އިންތިޚާބު ކުރާއިރު 3،000 އަށް ވުރެ މަތީގެ އާބާދީ ހިމެނޭ ކޮންމެ ރަށަކަށް އިންތިޚާބު ކުރަން ޖެހޭނީ ފަސް ކައުންސިލަރުންނެވެ.
އަތޮޅޮ ކައުންސިލްތަކަށް އިންތިޚާބު ކުރާނީ ދެ އިންތިޚާބީ ދާއިރާއަށް ވުރެ ގިނަ އިންތިޚާބީ ދާއިރާ ހިމެނޭ އަތޮޅެއްގައި ނަމަ، ކޮންމެ އިންތިޚާބީ ދާއިރާއަކުން އެންމެ ކައުންސިލަރެކެވެ.
ދެ އިންތިޚާބީ ދާއިރާ ހިމެނޭ އަތޮޅެއް ނަމަ މުޅި އަތޮޅުން ވޯޓުލައިގެން ހޮވާ ތިން ކައުންސިލަރުން އެ އަތޮޅެއްގެ އަތޮޅު ކައުންސިލުގައި ތިބޭނެ އެވެ.
ލޯކަލް ކައުންސިލްތަކުގެ އިންތިޚާބުގައި އިންތިޚާބު ކުރާނީ ޖުމްލަ 653 ކައުންސިލަރުންނެވެ.
އެއީ 179 ރަށު ކައުންސިލަކަށް 563 ރަށު ކައުންސިލަރުނާއި 18 އަތޮޅު ކައުންސިލަކަށް 67 އަތޮޅު ކައުންސިލަރުންނެވެ. އަދި ތިން ސިޓީ ކައުންސިލަށް 23 ކައުންސިލަރުންނެވެ.