މިނިވަން ޗެމްޕިއަންޝިޕް ފުޓްބޯޅަ މުބާރާތުގެ ފައިނަލް ރައުންޑްގެ ގްރޫޕްގެ އޭގެ މެޗަށް ދ. ކުޑަހުވަދު އަށް ދާން ޒޯން އަށެއްގެ ޗެމްޕިއަންކަން ހޯދި ފޭދޫ ޓީމް މިއަދު ފުރައިފި އެވެ.
ފައިނަލް ރައުންޑްގެ މެޗްތައް ފަށަން ހަމަޖެހިފައި ވަނީ ހުކުރު ދުވަހު އެވެ.
އެގޮތުން ކުޑަހުވަދޫގައި ކުޅޭ ގްރޫޕް އޭގެ މެޗްތަކުގައި ކުޅޭނީ ކުޑަހުވަދޫގެ އިތުރުން ފޭދޫ، ގއ. ދެއްވަދޫ އަދި އދ. މަހިބަދޫ އެވެ.
ތިމަރަފުށީގައި ކުރިއަށްދާ ގްރޫޕް ބީގައި އެ ރަށުގެ އިތުރުން ހިމެނެނީ ބ. އޭދަފުއްޓާއި ނ.ލަންދޫގެ އިތުރުން ހދ. ހަނިމާދު އެވެ.
ފުރަތަމަ ސެމީ ފައިނަލް އޮންނާނީ އަންނަ މަހު ހަތް ވަނަ ދުވަހު ކުޑަހުވަދޫގަ އެވެ.
އެ މެޗުގައި ބައްދަލު ކުރާނީ ގްރޫޕް އޭގެ އެއް ވަނަ ޓީމާއި ގްރޫޕް ބީގެ ދެ ވަނަ ޓީމެވެ. ދެ ވަނަ ސެމީ ފައިނަލް އަންނަ މަހު އަށް ވަނަ ދުވަހު އޮންނާނީ ތިމަރަފުށީގަ އެވެ.
މި ފަހަރު މުބާރާތުގެ ފައިނަލް މެޗް އޮންނާނީ މާލޭގަ އެވެ. އެއީ އަންނަ މަހުގެ 10 ގަ އެވެ.
މިދިޔަ އަހަރު އައްޑޫގައި ފައިނަލް މެޗް ބޭއްވި މިނިވަން ޗެމްޕިއަަންޝިޕް މުބާރާތުގެ ޗެމްޕިއަނަކީ ފޭދު އެވެ.