2013 ވަނަ އަހަރު ރާއްޖޭގައި ބޭއްވުނު ރިޔާސީ އިންތިހާބުގެ ފުރަތަމަ ބުރުގައި އެމްޑީޕީގެ ރައީސް މުހައްމަދު ނަޝީދަށް ޖުމުލަ ވޯޓުގެ 45 ޕަސެންޓް ލިބިވަޑައިގެންނެވިއިރު ރައީސް ޔާމީނަށް ލިބިވަޑައިގަތީ އެންމެ 25 ޕަސެންޓެވެ. އެއީ ކުރީގެ ރައީސް މައުމޫން އަބްދުލް ގައްޔޫމް އަދި ކުރީގެ ނައިބުރައީސް ޑރ.ޖަމީލް ފަދަ ބޭފުޅުން ހިމެނޭގޮތަށް ވަރުގަދަ ޓީމަކުން ނުހަނު ބުރަކޮށް މަސައްކަތް ކޮށްގެން ލިބުނު އަދަދެކެވެ.
އެބުރުގައި ޖުމްހޫރީ ޕާޓީގެ ލީޑަރު ގާސިމް އިބްރާހިމް އަށް ޖުމުލަ ވޯޓުގެ 24 ޕަސެންޓް ލިބިވަޑައިގަތެވެ.
ނަމަވެސް އިންތިހާބުގެ ދެވަނަ ބުރުގައި ރައީސް ޔާމީން އިންތިހާބު ކާމިޔާބުކުރެއްވީ ޖުމުލަ ވޯޓުގެ 51 ޕަސެންޓުންނެވެ. ނަޝީދަށް ލިބިވަޑައިގަތީ 48 ޕަސެންޓެވެ.
ރައީސް ޔާމީނަށް ލިބިވަޑައިގެންނެވި 51 ޕަސެންޓް ވޯޓަކީ އެމަނިކްފާނުގެ ޤާބިލުކަމާއި މޮޅުކަމުން ލިބިވަޑައިގެންނެވި އެއްޗެއް ނޫންކަން ދޭހަވާގޮތަށް ހުދްއެމަނިކްފާނުވެސް އޭރު ވާހަދެއްކެވިއެވެ.
ޖުމްހޫރީ ޕާޓީ އާއި އަދާލަތު ޕާޓީގެ އިތުރުން އެމްޑީއޭ ގުޅިގެން މަސައްކަތް ނުކުރިނަމަ އިންތިހާބު ކާމިޔާބުނުވީސް ކަމަށާއި، އެހެންކަމުން ސަރުކާރު އެކުލަވާނީ ކޯލިޝަންގެ ސަރުކާރެއްގެ ގޮތުގައި ކަމަށް ވިދާޅުވެ އޭރު ރައީސް ޔާމީން ވާހަކަ ދެއްކެވިއެވެ. އަދި ސަރުކާރު ހިންގުމުގައި އަބަދުވެސް ރައީސް މައުމޫންގެ އަޑު އައްސަވާނެ ކަމަށާއި، އެމަނިކްފާނުގެ ތަޖުރިބާގެ އެހީތެރިކަން ވަރަށް ފުރިހަމައަށް ސަރުކާރަށް ލިބޭނެކަމަށްވެސް ވިދާޅުވިއެވެ.
ދެންއޮތީ ކޯލިޝަން ސަރުކާރަށް ވެގެން ދިޔަގޮތުގެ ވާހަކައެވެ. ރައީސް ޔާމީނަށް އިންތިހާބު ކާމިޔާބުކޮށް ދިނުމުގައި ހަރަކާތްތެރިވި އެންމެހައި ބައިވެރިން މަދު ދުވަސްކޮޅެއްގެ ތެރޭގައި ވަކިވީއެވެ. ކޮރަޕްޝަން އާންމުވާކަމަށާއި ސަރުކާރުން ޖުޑީޝަރީ އަދި މިނިވަން މުވައްސަސާތަކަށް ނުފޫޒު ފޯރުވާކަމަށް ތުހުމަތުކޮށް ސަރުކާރާ ދެބަސްވީއެވެ.
ނަތީޖާއަކަށް ވެގެންދިޔައީ އެބޭފުޅުން ނެންގެވި މައްސަލަތައް ހައްލުނުކުރެވި، އެކިތުހުމަތުތައް ކުރެވިގެން ދިގުމުއްދަތުތަކުގެ ޖަލުހުކުމްތައް އައީއެވެ. ރިޔާސީ އިންތިހާބު ކާމިޔާބު ކުރުމަށް އެންމެ ބޮޑަށް އެހީތެރިވި ފަރާތްތަކުގެ ވިޔަފާރިތަކަށް ދަތިކޮށް "ފިއްތާލައި" އެބޭފުޅުންގެ ސިޔާސީ ހަރަކާތްތައް އެއްކޮށް ހުއްޓުވާލީއެވެ.
ރިޔާސީ އިންތިހާބުގެ ފުރަތަމަ ބުރުގައި ރައީސް ޔާމީނަށް ލިބިވަޑައިގެންނެވި 25 ޕަސެންޓް ވޯޓު ދެވަނަ ބުރުގައި 51 ޕަސެންޓަށް ބަދަލުކުރުމަށް އެހީތެރިވި އެންމެން ވަކިވެ އިދިކޮޅުވީއެވެ.
އެހިސާބުން ފެނިގެންދިޔައީ އެތެރެއިންނާއި ބޭރުން ސަރުކާރަށް ފާޑުކިޔުންތައް އިތުރުވެ ، އިދިކޮޅުފަރާތްތަކުން ތުހުމަތުކުރިގޮތަށް ރާއްޖޭގެ ތާރީޚުގައި ނުހިނގާފަދަ ބޮޑެތި ކޮރަޕްޝަންގެ އަމަލުތައް ފެންމަތިވީމަންޒަރެވެ. އިދިކޮޅު ފަރާތްތަކުން ދައްކަމުން އައި ހުރިހާ ވާހަކައެއް ދިމާވަމުން އައެވެ.
ނަމަވެސް ސަރުކާރުން ކަންކަމުގައި ކުރިމަތިލަމުން އައީ މުޅިން ތަފާތުކޮށެވެ. ސަރުކާރާއި ދެކޮޅަށް ހަރަކާތްތެރިވާ އިސް މީހުންގެ އެކި މައްސަލަތައް ނެގުމަށްފަހު ޝަރީޢަތްތައް ހިންގައި ހުކުމްތައް އަންނަން ފެށިއެވެ. ބޭރުގެ ޖަމްއިއްޔާތަކުން ފާޑުކިޔާނަމަ އެ ޖަމްއިއްޔާ އަކުން ވަކިވުމަށް ނިންމައެވެ. އެކިގޮތްގޮތަށް މީޑިޔާތަކަށް ހުރަސްއެޅިކަމުގެ ތުހުމަތު ބޮލުގައި އެޅުނެވެ. އަދި ޤާނޫނުތަކަށް ބޮޑެތި ބަދަލުތައް ގެނެސް މުޅިގައުމުން އެންމެ އަޑެއް އިއްވަން މަގުކޮށަން ފެށިއެވެ.
އޭގެފަހުން ވެރިކަންކުރާ ޕާޓީތެރޭގައިވެސް މައްސަލަތައް އުފެދި ޕާޓީތެރޭގައި ބާރާއި ނުފޫޒުން ސަރުކާރުން އަތްގަދަކުރަން ފެށިއެވެ. ސިޔާސީ ބައެއް ފަރާތްތަކުން ވިދާޅުވަނީ މިހާރު ފެނިގެން މިދަނީ ކޯލިޝަން ރޫޅި އަމިއްލަ ޕާޓީވެސް ރޫޅޭ މަންޒަރެވެ. އަރާރުންވެ ތަޅާފޮޅާ މަންޒަރެވެ. އިދިކޮޅު ފަރާތްތަކުގެ ބަހުރުވައިންނަމަ ރައީސް ޔާމީން މިހާރު އެހުންނެވީ ނޭވާހާސްވެ ހަތަރު އުދަރެސް ފެނުޖެހިފައެވެ.
ރާއްޖޭގެ އެތައްހާސް ބައެއްގެ އިހްތިރާމާއި ގަދަރުލިބިވަޑައިގެން ހުންނެވި ކުރީގެ ރައީސް މައުމޫން ޢަބްދުލް ގައްޔޫމަކީ ރައީސް ޔާމީންއަށް ވެރިކަމަށް ދޮރުހުޅުވައިދިން ބޭފުޅާއެވެ. އަދި ބުރަދަންހުރި ސިޔާސީ ފަރާތްތަކުގެ ތެރެއިން އެންމެ ފަހުމީހާގެ ގޮތުގައި ސަރުކާރަށް ތާއިދުކޮށްގެންވެސް ހުރި ސިޔާސީބޭފުޅާއެވެ. ނަމަވެސް މިހާރު ފެނިގެންދަނީ އެމަނިކްފާނުވެސް ކުޑަކޮށް "ގިއްގަޅުވާލާ" މަންޒަރެވެ.
ޕީޕީއެމްގެ ކޯޅުންތަކުން ދޭހަވީ ކިތަންމެހާސް ބަޔަކު ރައީސް މައުމޫނަށް އިހްތިރާމު ކުރިޔަސް އެމަނިކްފާނުގެ ކޮއްކޯފުޅު އެކަމަކަށް ފަރުވާލެއް ނެތްކަމެވެ. ރައީސް މައުމޫނަށް ގޮތްހުސްކުރަން ބަޔަކު މަސައްކަތް ކުރަމުންދާތަން މިދަނީ ފެންނަމުންނެވެ. އެމަނިކްފާނު ވަރަށް އަރިސްކޮށް ގެންގުޅުއްވި ފަރާތްތަކުން ފާޅުގައި ހަޑިހުތުރު ބަސްތައް އެމަނިކްފާނަށް ރައްދުކުރަމުންދާ އަޑުތައް މިދަނީ އިވެމުންނެވެ.
ކޮންމެއަކަސް މިހިނގާ ބީދައިން ރައީސް މައުމޫނަށް އިހާނެތިކޮށް ހިތާ މަންޒަރަކީ އެމަނިކްފާނާއި އެއްކޮޅު މީހުންނާއި ދެކޮޅުމީހުންވެސް ބަލައިގަންނަ ކަމެއްނޫނެވެ. އަދި އެއީ އަޅުގަނޑުމެން ދިވެހީންގެ ތެރޭގައި އޮތް އަހުލާގާއި އާދަކާދައާއިވެސް ބީރައްޓެހި ގޮތްތަކެކެވެ.
މުސްކުޅިފުޅު ހާލުގައި ރާއްޖޭގެ އުތުރުން ދެކުނަށް ދަތުރުކޮށް، ރައީސް ޔާމީނަށް ވޯޓު ހޯދުމަށް ރައީސް މައުމޫން ކުރެއްވި މަސައްކަތު ހަދިޔާއަކީ މިހާރު އެމަނިކްފާނަށް އެލިބިގެންދާ އިއްޒަތްކަމަށް އެއްވެސް ދިވެއްސަކު ގަބޫލުކުރާނެހެނެއް ހީނުވެއެވެ. ކަންތައްތައް ހައްދުން ނައްޓައިގެން ދިއުމުން ރައީސް މައުމޫން މިހާރުވަނީ ސަރުކާރަށް ކުރަމުން އައި ތާއިދު އަނބުރާ ގެންދަވާފައެވެ.
އެހެންކަމުން ރައީސް ޔާމީން މިހާރު މަގާމުގައި އެހުންނެވީ ހަމައެކަނި އެމަނިކްފާނަށް ތާއިދުކުރާ މީހުންގެ ތާއިދާއިއެކުގައެވެ. ސުވާލަކީ އެމަނިކްފާނަށް ތާއިދުކުރަނީ ރާއްޖޭގެ ކިހާ އަދަދެއްގެ ރައްޔިތުންތޯއެވެ.
ރައީސުލް ޖުމްހޫރިއްޔާ ކަމުގެ މަޤާމާއި ހަވާލުވިފަހުން އެމަނިކްފާނަށް އޮތް ތާއިދު އެއްވެސް ވަރަކަށް އިތުރުވިކަމާއިމެދު ގިނަބަޔަކު ސުވާލު އުފައްދައެވެ.
އިދިކޮޅު ސިޔާސީ ފަރާތްތަކުގެ ނަޒަރުގައި މަގާމެއްގައި ހުރުމުގެ ސަބަބުން ވަޒީފާގެއްލިދާނެ ކަމުގެ ބިރަށްޓަކައި ބައެއްމީހުން ރައީސް ޔާމީނަށް ތާއިދުކުރެއެވެ. އެނޫން ބަޔަކު ރާއްޖޭގައި އެމަނިކްފާނަށް ތާއިދުކުރާކަށް ނެތްކަމަށް އެފަރާތްތަކުން ދަނީ ބުނަމުންނެވެ.
ކޮންމެއަކަސް ތާއިދުއޮތް މިންވަރާއި ނެތްމިންވަރު އެނގިގެންދާނީ މިނިވަން އިންސާފުވެރި އިންތިހާބުތަކުންނެވެ. ރާއްޖޭގައި އެފަދަ ފުރުޞަތެއް ލިބިއްޖެނަމަ އެކަން އެންމެންނަށް އެނގިގެންދާނެއެވެ. މިހާރުގެ ހާލަތުގައި އެފަދަ ފުރުޞަތެއް އޮތްކަމާމެދުވެސް ބައެއް ފަރާތްތަކުން ސުވާލުއުފައްދައެވެ.