ދިރާގުން ތިމާވެށި ހިމާޔަތް ކުރުމުގެ ގޮތުން މިހާރު ކުރިއަށް ގެންދާ ކެމްޕޭނުގެ ދަށުން ތައްޔާރުކޮށްފައިވާ ތިމާވެއްޓާ ރައްޓެހި "ފޯ ދި އޯޝަން" ރީޔޫޒަބަލް ކޮތަޅު އައްޑޫ ސިޓީ ކައުންސިލަށް ހަދިޔާ ކޮށްފި އެވެ.
ކަނޑުގެ ހިމާޔަތަށް މަސައްކަތް ކުރާ ޖަމިއްޔާއެއް ކަމަށްވާ ޕާލޭގެ އެފިލިއޭޓް ގްރޫޕަކާ ގުޅިގެން ދިރާގުން ކުރިއަށް ގެންދާ މި ޕްރޮގްރާމް ގެ ދަށުން މިއަދު ކައުންސިލް އިދާރާގައި ބޭއްވުނު ބައްދަލުވުމަކަށް ފަހު 125 ރީޔޫސަބަލް ކޮތަޅު ކައުންސިލާ ވަނީ ހަވާލުކޮށްފަ އެވެ.
ދިރާގުގެ ފަރާތުން ބުނީ މި އިނިޝިއޭޓިވް ގެ މަގްސަދަކީ ކުނީގެ ގޮތުގައި އުކާލެވޭ ޕްލާސްޓިކް ކޮތަޅު ވީހާ ވެސް މަދުކުރުން ކަމަށެވެ.
ބާޒާރަށް ދާ ކޮންމެ ފަހަރަކު ޕްލާސްޓިކް ކޮތަޅު ގެއަށް ގެނެވޭ ކަމަށާއި ނަމަވެސް ދެން އެތަކެތި ވެގެން ދަނީ ކުނީގެ ގޮތުގައި އުކާލެވޭ ތަކެއްޗަށްކަމުން އޭގެ ނޭދެވޭ އަސަރު ތިމާވެއްޓަށް ވަރަށް ބޮޑަށް ކުރަމުންދާ ކަމަށެވެ.
އޭގެ ބަދަލުގައި ރީޔޫޒަބަލް ކޮތަޅު ބޭނުން ކުރުން އާދައަކަށް ހެދުން މުހިއްމު ކަމަށް ދިރާގުން ބުންޏެވެ.