މީދޫގައި މޫދަށް އެރި އުޅުނު މީހަކު އިސްމެހެލާހެރަ ޗެނަލް ސަރަހައްދު މޫދު އަޑީގައި މަރުވެފައި އޮއްވައި ދާދި ދެންމެއަކު ފެނިއްޖެ އެވެ.
މަރުވެފައި އޮއްވައި ފެނުނު މީހާއަކީ މީދޫ ސައިމާގޭ އަބްދުﷲ ޝަރީފް، 35، އެވެ.
އޭނާ މަރުވެފައި އޮއްވައި ފެނުނީ މިއަދު ހެނދުނު މޫދަށް ދިޔަ ގޮތަށް ހަބަރެއް ނުވެގެން ފުލުހުންނަށް ވެސް ރިޕޯޓްކޮށް ހޯދަމުން ދަނިކޮށް ކަމަށް އާއިލާ އިން ވާހަކަ ދެއްކި މީހަކު ބުންޏެވެ.
ޝަރީފަކީ އެމްޕީއެލް ސަދަން ޓްރާންސްޕޯޓް ލިންކްގައި ވަޒީފާ އަދާ ކުރަމުން ދިޔަ މީހެކެވެ.
މީދޫން "އައްޑޫ ލައިވް"އަށް މައުލޫމާތު ދިން މީހަކު ބުނީ މިއަދު ހެނދުނު 10:00 ޖަހާކަށްހާ އިރު ޝަރީފް ކާށި ބަސްތާއަކާއި އެކު އިސްމެހެލާހެރަ އާއި މީދޫ ދެމެދުގައި އޮންނަ ޗެނަލް ސަރަހައްދުން ފެނިފައިވާ ކަމަށެވެ.
އޭނާ ގެއްލިގެން އާއިލާއިން ފުލުހުންނަށް އެންގުމާއި ގުޅިގެން އޭނާ ހޯދުމުގެ މަސައްކަތް ރަށުގެ ރައްޔިތުންނާއި ފުލުހުން ހޯދަމުން ދަނިކޮށް ފެނިފައި ވަނީ މޫދުގެ އަޑީގައި މަރުވެފައި އޮތްވަ އެވެ.
"ޝަރީފްގެ ހަށިގަނޑު ފެނުނީ ޗެނަލް ސަރަހައްދު ހޯދަމުން ދިޔަ އެމްއެންޑީއެފްގެ މީހުންނަށް، އަޑީގައި އޮތީ،" އެ ރަށުން ވާހަކަ ދެއްކި މީހާ ބުންޏެވެ.
އޭނާގެ ހަށިގަނޑު މިހާރު ވަނީ ހުޅުމީދޫ ސިއްހީ މަރުކަޒަށް ގެންގޮސްފަ އެވެ.