ޖަލު ހުކުމެއް ތަންފީޒު ކުރުމަށް ފަހު، މިހާރު އަލުން އާންމު ދިރިއުޅުމަށް ރުޖޫއަވެފައިވާ ބޮލީވުޑްގެ މަޝްހޫރު އެކްޓަރު ސަންޖޭ ދަތު އެނބުރި ބޮޑު ސްކްރީނަށް އަންނާނީ "މާކޯ" އިން ކަމަށާއި އޭގެ މަސައްކަތް އަންނަ އަަހަރުގެ އެޕްރީލް ހިސާބުގައި ފަށާނެ ކަމަށް ޑައިރެކްޓަރު/ޕްރޮޑިއުސަރު ވިންދޫ ވިނޯދް ޗޯޕްޅާ ބުނެފި އެވެ.
ސަންޖޭގެ އެންމެ ހިޓް ފިލްމުތަކުގެ ތެރޭގައި ހިމެނޭ "މުންނާބާއީ" ސީރީޒްގެ ވެސް ޕްރޮޑިއުސަރު ވިންދޫ ބުނީ "މާކޯ" ގެ ސްކްރީންޕްލޭގެ މަސައްކަތް ވަރަށް ބާރަށް ކުރިއަށްދާ ކަަމަށެވެ.
އޭގެ ސްކްރީންޕްލޭ ލިޔަނީ "ޕީކޭ" ގެ ސްކްރީންޕްލޭގައި ވެސް ހިއްސާވި އަބިޖާތު ޖޯޝީ އާއި ވިންދޫ އެވެ.
"އަހަރެމެން ދެ މީހުން މި އަންނަނީ މާކޯގެ ސްކްރިޕްޓް ލިޔަމުން. ސްކްރިޕްޓް މުޅިން ފައިނަލްވުމުން ނޫނީ އަހަރެމެން ފިލްމުގެ މަސައްކަތެއް ނުފަށާނަން. އުންމީދު ކުރެވެނީ މިހާރު މަަސައްކަތް ކުރިއަށްދާ ގޮތުން އަންނަ މާޗް ނޫނީ އެޕްރީލް ހިސާބުގައި ފިލްމުގެ ޝޫޓިން ފެށޭނެ ކަމަށް،" މުމްބާއީގައި މިހާރު ކުރިއަށްދާ 18 ވަނަ މާމީ ފިލްމް ފެސްޓަލްގައި ވިންދޫ ބުންޏެވެ.
"މާކޯ" ޑައިރެކްޓް ކުރަން ހަމަޖެހިފައި ވަނީ ވިންދޫގެ އަންހެން ކޮއްކޮ ޝެލީ ޗޯޕްޅާ އެވެ.
ސަންޖޭ، 57، ޖަލުގައި އޮއްވައި ވެސް އޭނާގެ ތިން ފިލްމެއް ސިނަމާތަކަށް އައެވެ. އެއީ "ޕޮލިސްގިރީ" އާއި "އުނގްލީ" އަދި "ޕީކޭ" އެެވެ.