ޖުމްލަ 16 ޓީމް ބައިވެރިވި "އައްޑޫ ފެސްޓިވް މީލް ޗެލެންޖް 2016" ގެ އެއްވަނަ މަރަދޫ ސްކޫލްގެ ކޭމާ ޓީމުން ހޯދައިފި އެވެ.
މަރަދޫ އިރުޝާދިއްޔާ ސްކޫލްގައި އިއްޔެ ބޭއްވި މުބާރާތުގައި އެ ސްކޫލް އެއް ވަނަ ހޯދީ ރަން މެޑަލާއި ފަހުރުވެރި ތައްޓާ އެކުގަ އެވެ.
އެ ޓީމަށް ފައިސާގެ އިނާމެއްގެ ގޮތުގައި 6،000ރ. ވެސް ލިބުނެވެ.
ކާބޯތަކެތީގެ ދުވަހާއި ބައިނަލްއަގްވާމީ ޝެފްސް ޑޭ ފާހަގަ ކުރުމުގެ ގޮތުން ޝެފްސް ގިލްޑް އޮފް މޯލްޑިވްސް އާއި އައްޑޫގެ އަންހެނުންގެ ތަރައްގީ އަށް މަސައްކަތް ކުރާ ކޮމިޓީ ގުޅިގެން ބޭއްވި މި މުބާރާތުގެ ދެ ވަނަ ހޯދީ އިރުޝާދިއްޔާ ސްކޫލުގެ ޓީމެވެ.
އެ ސްކޫލަށް ފައިސާގެ އިނާމްގެ ގޮތުގައި ލިބުނީ 2،500ރ. އެވެ.
ސިލްވާ މެޑެލާ އެކު ތިން ވަނަ ހޯދީ ހިތަދޫ ރީޖަނަލް ހޮސްޕިޓަލް (އެޗްއާރްއެޗް) ގެ ޓީމެވެ.
އެ ޓީމަށް ލިބުނީ 1،500ރ. ގެ ފައިސާގެ އިނާމެކެވެ.
ކެއްކުމުގެ މި މުބާރާތުން ވަނަތައް ހާސިލްކުރި ޓީމްތަކަށް ތައްޓާއި ހަނދާނީ ލިޔުން އަދި މެޑެލް ހަވާލުކޮށް ދެއްވެވީ އައްޑޫ މޭޔަރު އަބްދުﷲ ސޯދިގް (ސޯބެ) އާއި ޑެޕިޔުޓީ މޭޔަރު އަބްދުﷲ ތައްޔިބް (ޓޮމް) ގެ އިތުރުން ޝެފްސް ގިލްޑް މޯލްޑިވްސްގެ ރައީސާއި ނައިބް ރައީސް އާއި މުބާރާތުގައި ޖަޖުކަން ކުރި ބައެއް ޝެފުންނެވެ.
އައްޑޫގައި ކުރިއަށް ގެންދިޔަ މި އިވެންޓްގެ ތެރެއިން ތުއްތު ކުދިންނަށް ހާއްސަކޮށްގެން "އާޓް އޮން ޕްލޭޓް" ނަމުގައި ހަރަކާތެއް ކުރިއަށް ގެންދިޔަ އެވެ.