ވެރިކަން ކުރާ މައި ޕާޓީގެ ގޮތުގައި އޮތް ޕީޕީއެމާއި އެޕާޓީގެ ރައީސް މައުމޫން އަބްދުލް ގައްޔޫމާ މެދު ދައުލަތުގެ މުއައްސަސާތަކުން އަމަލުކުރަމުން ދަނީ ގާނޫނީ އިމުގެ ތެރެއިން ނޫން ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހީމް މިއަދު ވިދާޅުވެއްޖެ އެވެ.
މައުމޫން ޖޭޕީގެ އޮފީހުގައި ގާސިމާ އެކު ބޭއްވި ބައްދަލުވުމަށް ފަހު ގާސިމް ވިވިދާޅުވީ ޕީޕީއެމްގެ އާންމު ޖަލްސާއަކުން އެ ޕާޓީގެ އަސާސީ ގަވައިދާ އެއްގޮތަށް ޕީޕީއެމްގެ ރައީސަކަށް އިންތިހާބު ކޮށްފައި ހުންނެވި ރައީސް މައުމޫން ކަމަށް ފުރިހަމަ އަށް ގަބޫލުކުރައްވާ ކަމަށެވެ.
އޭނާ އަދި ވިދާޅުބީ ގާނޫނީ އިމުން ބޭރވެ ކުރަމުންދާ ކަންކަމުގައި އަބަދުވެސް ދެކޮޅު ހައްދަވާނެ ކަމަށެވެ.
ގާސިމް ވިދާޅުވީ ގާނޫނު އަސާސީ އާ ގާނޫނުތަކަށް ދައުލަތުގެ މުއައްސަސާތަކުން އިހްތިރާމް ކުރާ ފަދައިން ޕާޓީތަކުގެ އަސާސީ ގަވައިދުތަކަށް ދައުލަތުގެ މުއައައްސަސާތަކުން ވެސް އިހްތިރާމް ކުރުމަކީ މަޖުބޫރު ކަމެއް ކަމަށެވެ.
"މިކަން ވަރަށް ސާބިތުމާއެކު ދަންނަވަން އަޅުގަނޑުމެންނަށް އިނގޭ،" ގާސިމް ވިދާޅުވި އެވެ.
އޭނާ އަދި ވަނީ ރައީސް މައުމޫން ރައީސް އަބްދުﷲ ޔާމީންގެ ސަރުކާރަށް ކުރައްވަމުން ގެންދެވު ތާއީދު އަނބުރާ ގެންދެވިކަން އިއުލާން ކުރައްވާފައިވާތީ އެކަމަށްޓަކައި މައުމޫނަށް ޝުކުރު އަދާކުރައްވައިފަ އެވެ.
މައުމޫނު މިއަދު ޖޭޕީ އާ ބައްދަލު ކުރި ނަމަވެސް ސިޔާސީ ކަންކަމުގައި ގުޅިގެން އަދި ކުރިއަށް ދާނެ ގޮތެއް ނުނިންމަވާ ކަމަށެވެ.
ނަމަވެސް އިސްލާހީ ބަދަލުތައް ގެންނާނެ ގޮތަކާ މެދު ކުރިއަށް އޮތް ތަނުގައި މަޝްވަރާ ކުރެވޭނެ ކަމަށް ވިދާޅުވި އެވެ.
"މި ފެށުނީ ވަރަށް މުހިންމު ކަމެއް. މިއީ ވަރަށް މުހިންމު މަރުހަލާއެއް. މިކަން ވެގެން ދާނީ ރައްޔިތުންނަށް ނަސްރާއި ނަސީބާ ކުރިއެރުން ލިބޭ ގޮތަށް،" މައުމޫނު ވިދާޅުވި އެވެ.