މިހާރު ގައުމުގެ ހާލަތު އޮތް ގޮތުން މަޖްލިސް މެމްބަރުންނަށް ބިރު ދައްކާ ހައްޔަރު ނުކޮށްފި ނަމަ މަޖްލިސްގެ ރައީސްގެ އިތުބާރު ނެތްކަމުގެ ވޯޓު ކާމިޔާބް ކުރެވޭނެކަމުގެ ޔަގީންކަން އެބައޮތްކަމަށް ޖުމްހޫރީ ޕާޓީގެ ޕާލިމެންޓްރީ ގްރޫޕްގެ ނައިބް ކިނބިދޫ ދާއިރާގެ މެމްބަރު އަބްދުﷲ ރިޔާޒް ވިދާޅުވެއްޖެ އެވެ.
ރޭ ވީޓީވީގެ ފަސްމަންޒަރު ޕްރޮގްރާމްގައި ވާހަކަފުޅު ދައްކަވަމުން ރިޔާޒް ވިދާޅުވީ، ޕީޕީއެމްގެ ޔާމީން ފެކްޝަންގައި ވެސް މަސީހް ބޭރުކުރުމުގެ ވިސްނުމުގައި ތިއްބެވި މެމްބަރުން އެބަ ތިއްބެވި ކަމަށާއި، މަޖްލިސް މެމްބަރުން ތަކެއް ބިރު ދައްކައި، ހައްޔަރު ނުކޮށްފި ނަމަ ވޯޓު ކާމިޔާބް ކުރެވޭނެ ކަމަށެވެ.
ރިޔާޒް ވިދާޅުވީ، މަޖްލިސްގެ ރައީސް ކަމުން މަސީހް ބޭރުކުރުން މިހާރުވެސް މާ ލަސްވެފައިވާ ކަމަށެވެ. މަސީހް ބޭރުކުރުމުގެ ސަބަބެއްކަމަށް ރިޔާޒް ވިދާޅުވީ މަސީހް މަޖްލިސްގެ ރައީސަކަށް ހުންނަވައިގެން މަޖްލިސްގެ ގަވާއިދަށް ބެއްލެވުމަށް ނެތި އަމަލް ކުރައްވަމުން ގެންދަވާ ކަމަށެވެ.
މީގެ އިތުރުން ސަރުކާރު ޖަވާބުދާރީ ވުމަށް ފުރުސަތު ނުދެއްވާ އިރު ވަޒީރުންނާއި ސުވާލު ކުރުންވެސް ހަނިކޮށްފައިވާ ކަމަށް ރިޔާޒް ވިދާޅުވިއެވެ.
މަޖްލިސްގެ ރައީސް ކަމުން މަސީހް ބޭރުކުރުމަށް މަޖްލިސް މެމްބަރުން ގެންދަވަނީ ޕެޓިޝަނެއް ތައްޔާރު ކުރައްވަމުންނެވެ. އެގޮތުން އެކަމުގައި އިސްކޮށް އުޅުއްވަނީ ޕީޕީއެމް މައުމޫން ފެކްޝަނަށް ނިސްބަތްވެ ވަޑައިގަންނަވާ މެމްބަރުންނެވެ.
މަޖްލިސްގެ ރައީސްގެ އިތުބާރު ނެތްކަމުގެ ވޯޓެއް ނެގޭނީ، މަދުވެގެން 15 މެމްބަރުންގެ ލިޔުން ހުށަހަޅައިގެންނެވެ. އަދި އެލިޔުންތައް މަޖްލިސްގެ އިދާރާއަށް ލިބޭތާ 3 ދުވަހުގެ ތެރޭގައި މެމްބަރުންނަށާއި، މަޖްލިސްގެ ރައީސަށް ނޯޓިސް ފޮނުވަން ޖެހޭނެއެވެ. އަދި ނޯޓިސް ލިބޭތާ 10 ދުވަހުގެ ތެރޭގައި މަޖްލިސްގެ ރައީސްގެ އިތުބާރު ނެތްކަމުގެ މައްސަލަ އެޖެންޑާ ކުރަން ޖެހެއެވެ.