އަންނަ އަހަރުން ފެށިގެން މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ މުވައްޒަފުންގެ ބޯނަސް އިތުރު ކުރަން މަސައްކަތް ކުރާނެ ކަމަށް އެ ކުންފުނީގެ ސީއީއޯ މުހައްމަދު ޖުނައިދު ރޭ ވިދާޅުވެއްޖެ އެވެ.
އެމްޕީއެލަޑް 30 އަހަރު ފުރުން ފާހަގަ ކުރުމަށް ބޭއްވި ހަފްލާއެއްގައި ވާހަކަ ދައްކަވަމުން ޖުނައިދު ވިދާޅުވީ އަންނަ އަހަރު މުވައްޒަފުންނަށް ދޭ ބޯނަސް ބަހަން ކުންފުނީގެ ބޯޑު ތެރެއިން މަޝްވަރާކޮށް އެކަން އެގޮތަށް ކުރެވޭތޯ މަސައްކަތް ކުރައްވާނެ ކަމަށެވެ.
"ބަނދަރަކީ ރާއްޖޭގެ އިގްތިސާދާއި ގުޅި ލާމެހިފައި އޮތް ތަނެއް، ހަމަ ގައިމުންވެސް ބަނދަރުން އެނގިގެން ނޫނީ ނޭނގި ނަމަވެސް ކުރެވޭ މަސައްކަތަކުން މުޅި ރާއްޖޭގެ އިގްތިސާދަށް އޭގެ އަސަރު ކުރާނެ،" އޭނާ ވިދާޅުވި އެވެ. "މިއަދު ގައުމުގެ އެކި ދިމަ ދިމާލުން ރައީސް ޔާމީން ވެރިކަމާއި ހަވާލުވީއްސުރެ މިދަނީ އެކި ޕްރޮޖެކްޓްތަކެއް ހިންގަމުން ކުރަމުން މިދަނީ."
ޖުނައިދު އަދި ވިދާޅުވީ މިއަދު އެމްޕީއެލް ގައި އޮތީ ވަރަށް ގާބިލު ޓީމެއް ކަމަށެވެ.
"މިއަދު ވަރަށް ފަހުރުވެރިވޭ ސީއީއޯގެ ހައިސިއްޔަތުން އަޅުގަނޑުމެންގެ ޓީމަކީ ވަރަށް ގާބިލު ކޮންމެ ކަމެއް ޖެހުނަސް ކުރަން ކެރޭ ޓީމެކޭ ބުނަން،" އޭނާ ވިދާޅުވި އެވެ.
ޖުނައިދު ވިދާޅުވީ އެމްޕީއެލްގައި ވަޒީފާ އަދާކުރާތާ ގިނަ ދުވަސްވީ މުވައްޒަފުންނަށް މިހާރު ވެސް ލޯނު ދެވޭ ކަމަށާއި މީގެ ތެރެއިން އަހަރެއްގެ މައްޗަށް 10 މުވައްޒަފަކަށް ހައްޖަށް ދިއުމުގެ މަގު ތަނަވަސްކޮށް ދޭނެ ކަމަށެވެ.