މޯލްޑިވްސް ރެޑް ކްރެސަންޓްގެ ސ. ބްރާންޗްގެ ވޮލަންޓިއަރަކު ޖަޕާންގެ ޓޯކިޔޯ އަށް ބުރާސްފަތި ދުވަހު ފުރައިފި އެވެ.
ޖަޕަނީސް ރެޑް ކްރޮސް ސޮސައިޓީން އިންތިޒާމުކޮށްގެން ކުރިއަށް ގެންދާ އިންޓަނޭޝަނަލް ޔޫތު އެކްސްޗޭންޖް ޕްރޮގްރާމަށް އައްޑޫން ފުރީ ސ. ބްރާންޗްގެ ހިތަދޫ ވޮލެންޓިއަރެއްގެ ގޮތުގައި މަސައްކަތް ކުރާ ހިތަދޫ ވަރުދީގޭ މަރިޔަމް ސާމިކާ އާދިލެވެ.
ސ. ބްރާންޗުން ބުނީ ސާމިކާއަށް ފުރުސަތު ލިބިފައި ވަނީ މި ޕްރޮގްރާމުގައި ބައިވެރިވުމަށް ބޭނުންވާ ފަރާތްތަކުގެ މެދުގައި ބޭއްވި ގުރުއަތުލުމަކަށް ފަހުގައި ކަމަށެވެ. މިއީ ސ. ބްރާންޗްގެ ވޮލަންޓިއަރަކަށް މި ފުރުސަތު ލިބުނު ފުރަތަމަ ފަހަރު ވެސް މެ އެވެ.
ސާމިކާގެ އިތުރުން ރެޑްކްރެސެންޓްގެ މާލޭ ބްރާންޗްގެ މެމްބަރެއް ކަމަށްވާ އައިހަމް ވެސް ވެސް ޓޯކިޔޯގައި އޮންނަ ޕްރޮގްރާމުގައި ބައިވެރިވެ އެވެ.
ޓޯކިޔޯގައި އޮންނަ ޕްރޮގްރާމް ނިންމާލުމަށް ފަހު ބައިވެރިން އެނބުރި އަންނާނީ އަންނަ މަހުގެ 10 ވަނަ ދުވަހު އެވެ.