ޕީޕީއެމްގެ އެތެރޭގެ ހަމަނުޖެހުންތަކުގައި ރައީސް ޔާމީންގެ ފެކްޝަނުން ފުލުހުންގެ ބޭނުން ނަހަމަގޮތުގައި ހިފަމުންދާ ކަމަށް ބުނެ ފުލުހުންގެ އޮޕަރޭޝަންސްގައި ބައިވެރިވާ ގިނައަދަދެއްގެ ފުލުހުން ނުރުހުން ފާޅުކޮށްފި އެވެ.
"އައްޑޫ ލައިވް" އަށް މައުލޫމާތު ހިއްސާ ކުރި ފުލުހުންގެ އޮފިސަރަކު ވިދާޅުވީ، ސަރުކާރުން ބޭނުންވާކަމެއް ބޭނުން ގޮތަކަށް ކުރުމަށް އިޖުރާއަތްތަކާއި ޚިލާފަށް ފުލުހުންގެ ބޭނުންކުރަމުން އަންނަ މައްސަލައިގައި ގިނަ އަދަދެއްގެ ފުލުހުން ހިތް ހަމަނުޖެހިފައި ތިބިކަމަށެވެ.
މިގޮތުން ރައީސް މައުމޫން ޕާޓީގެ އަހަރީ ދުވަސް ފާހަނގަކުރުމަށް ބާއްވަން މަސައްކަތްކުރި ޖަލްސާއަށް ހުރަސްއެޅުން ހިމެނެއެވެ. އަދި ދާދިފަހުން ޕީޕީއެމްގެ އޮފީސް ހިމެނޭ ސަރަހައްދު ފުލުހުގެން ބެލުމުގެ ދަށުގައި ހުއްޓާ ބަޔަކު އޮފީހުގައި ހުރި މުދާތައް ނެރެގެން ގެންދިއުމަށް ފުރުޞަތުދިން މައްސަލަ އެފަރާތުން ފާހަނގަ ކުރައްވައެވެ.
ރައީސް މައުމޫންގެ ޖަލްސާއަށް ހުރަސްއެޅުމަށް ފުލުހުންނަށް އަންގާފައިވަނީ ފުލުހުންގެ ޗެއިން އޮފް ކޮމާންޑް އާއި ، ފުލުހުން އަމަލުކުރަމުންދާ ޤަވާއިދުތަކާއި ޚިލާފަށް ކަމަށްބުނެ ބައެއް ފުލުހުންވަނީ އިސްކަންދަރު ކޮށީގައި ވެސް ހިތްހަމަނުޖެހުންވެސް ފާޅުކޮށްފައިކަމަށް އެފަރާތުން މައުލޫމާތުދިނެވެ. މީގެއިތުރުން ގާނޫނާ ހިލާފަށް ފުލުހުންގެ ބޭނުން ނުކުރުމަށް އެފަރާތްތަކުން ބުނެފައިވާކަމަށެވެ.
ފުލުހުންގެ ތެރޭގައި ހިތްހަމަނުޖެހުންތައް އުފެދިފައިވާކަން އެނގިފައިމިވަނީ ސޯޝަލް މީޑިޔާގައިވެސް އެވާހަތައް ދެކެވެމުންދާ ދުވަސްވަރެއްގައެވެ. އަދި މީގެކުރިންވެސް ސިޔާސީ ބޭނުންތަކަށް ފުލުހުން ހަރަކާތްތެރި ކުރުވުމާއި ގުޅިގެން އެކަމާއި ދެކޮޅަށް ފުލުހުން ނިކުމެފައިވަނިކޮށެވެ. ކުރީގެ ރައީސް މުހައްމަދު ނަޝީދު އިސްތިއުފާ ދެއްވީ ވެސް "އައިރު ގާނޫނީ އަމުރު" ފުލުހުންގެ މައްޗަށް ނުކުރުމަށް ގޮވާލައެވެ.
ނަމަވެސް ފުލުހުންގެ އެހެން އޮފިޝަލަކު ވިދާޅުވީ، ފުލުހުން ތިބީ ބަދަހި ކަމާއި އެކު ކަމަށާއި، ފުލުހުންގެ ސަފުތައް ރޫޅިގެން ނުދާނެކަމަށެވެ. އެފަރާތުން ބުނީ ވަކިވަކި ފުލުހުންގެ ހިޔާލު އެގޮތަށް ހުރި ނަމަވެސް މާ ބޮޑު މައްސަލައެއް ނެތްކަމަށެވެ.