ވޭސްޓް މެނޭޖްމެންޓް ކޯޕަރޭޝަން (ވެމްކޯ) އިން އައްޑޫގެ ކުނި މެނޭޖް ކުރުމުގެ މަސައްކަތް ފެށުމުގެ ގޮތުން ތައްޔާރީތަކެއް ވަމުން އަންނަ ކަމަށާއި އެކަމަށްޓަކައި ހަދަން ޖެހޭ ދިރާސާ ހެދުމަށް ތައްޔާރުވަމުން އަންނަ ކަމަަށް ވެމްކޯ އިން ބުނެފި އެވެ.
އެ ކުންފުނިން މިހެން ބުނީ އައްޑޫ ސިޓީ ކައުންސިލާ އެކު ބޭއްވި ބައްދަލުވުމެއްގަ އެވެ.
ވެމްކޯގެ ބިޒްނަސް ޑެވެލޮޕްމެންޓް މެނޭޖަރު މުޙައްމަދު އިޤްބާލް ވިދާޅުވީ އެ ކުންފުނިން އައްޑު އަށް ކުރި ދަތުރުގެ ބޭނުމަކީ ހުރިހާ ސްޓޭކް ހޯލްޑަރުންނާ ބައްދަލުކޮށް މިހާރު ހުރި ދަތިތައް ހޯދައި މަސައްކަތް ކުރެވޭނެ ގޮތްތައް ކަނޑައެޅުމުގައި އެއްކުރެވޭ މައުލޫމާތުގެ މައްޗަށް ބިނާކޮށް ޕްލޭނެއް ހެދުން ކަމަށެވެ.
އަދި މި ޕްލޭން އެންވަޔަރަމަންޓް މިނިސްޓްރީ އާ ހިއްސާކޮށް މިނިސްޓްރީގެ ލަފަޔާ އެކު އެކުލެވޭ ޕްލޭންގެ ދަށުން ދެމެހެއްޓެނިވި ގޮތެއްގައި މަސައްކަތް ކުރިއަށް ގެންދިއުމަށް ވިސްނާފައި އޮތް ކަމަށް އިގްބާލް ވިދާޅުވި އެވެ.
މި ދަތުރުގައި ވެމްކޯއިން ބައެއް އާންމު ރައްޔިތުންނާއި ފިހާރަތަކުގެ ވެރިންނާ ބައްދަލުކޮށް ވެސް މައުލޫމާތު ހޯދާފައިވެ އެވެ.
އެގޮތުން ހޯދުނު ކަންތައްތަކުގެ ތެރޭގައި ކުނި ނެގުމުގެ ޙިދުމަތުގައި އަގަށް ވުރެ ބޮޑަށް ޙިދުމަތުގެ ފެންވަރު ރަނގަޅުވުމަށް އާންމުން ބޭނުންވެފައި ތިބިކަން ފާހަގަ ކުރެވޭ ކަމަށް ވެމްކޯ އިން ބުޏްޏެވެ.
ވެމްކޯ އިން އަދި ބުނީ މިހާރު ލިންކް ރޯޑް ސަރަހައްދުގައި އޮތް ކުނިކޮށީގެ ސަބަބުން އަންދައިގެން ކުނި ނައްތާލުމުގެ މަސައްކަތް ކުރުމުން އާންމުންނަށް ދަތިވާނެތީ ކުނި މެނޭޖް ކުރުމުގައި އެހެން ނިޒާމަކަށް ދެވޭތޯ މަސައްކަތް ކުރާނެ ކަމަށެވެ.
އެންވާރަމަންޓް މިނިސްޓްރީގެ އެސިސްޓެންޓް ޕްރޮޖެކްޓް އޮފިސަރު މުޙައްމަދު ހަމްދާން ވިދާޅުވީ ކޮމްޕެކްޓަ ޓްރަކްތަކެއް އައްޑު އަށް ގެނައުމަށް ރާވާފައިވާ ކަމަށާއި ކުނި ނައްތާލުމުގައި ތިމާވެއްޓަށް ގެއްލުން ނުވާނެ ފަދަ ނިޒާމަކަށް ދިޔުމަށް ވިސްނާފައިވާ ކަމަށެވެ.
އަދި ކުނި ނެގުމުގައި ކުނިވާ ޒާތުގެ ކުންޏާއި ކުނި ނުވާ ޒާތުގެ ކުނި ވަކި ކުރެވިގެން ގޭބިސީތަކުން ނެގޭނެ ގޮތް ވެއްޖެ ނަމަ ރީސައިކަލް ކުރުމުގައި ވެސް ފަސޭހަވެފައި މަސައްކަތަށް ލުޔެއް ލިބިގެންދާނެކަން ހަމްދާން ފާހަގަކުރެއްވި އެވެ.
އެހެން ނަމަވެސް އެގޮތަށް އެކަން ކުރެވޭނީ އާންމުންގެ އެއްބާރުލުން ލިބިގެން ކަމަށާއި ހޭލުންތެރިކަމުގެ ޕްރޮގްރާމްތައް ހިންގަން ވެސް ރާވާފައިވާ ކަމަށް ހަމްދާން ވިދާޅުވި އެވެ.
އައްޑޫގެ ކުނި މެނޭޖް ކުރުން ވޭމްކޯއިން ޖެނުއަރީ މަހު ހަވާލުވާން ނިންމާފަ ވާއިރު ދެކުނުގެ ކުނި މެނޭޖްކުރާ މަރުކަޒުތަކުގެ ބޭނުންތަކަށް ބާޖު ތަކެއް ބަނުމަށް އިންޑިޔާގެ ވިޖޭ މެރިން ޝިޕްޔާޑްސް ކިޔާ ކުންފުންޏަކާ މިދިޔަ މަހުގެ 28 ވަނަ ދުވަހު ވަނީ ހަވާލުކޮށްފަ އެވެ.
އައްޑޫގައ މިހާރު ކުނި މޭނެޖް ކުރަނީ މޯލްޑިވްސް ރޯޑް ކޯޕަރޭޝަން (އެމްއާރްޑީސީ) އިންނެވެ.
އެހެން ނަމަވެސް އެ ކުންފުނިން މަަސައްކަތް ކުރާ ގޮތާ ދޭތެރޭ އާންމިންގެ ގިނަ ޝަކުވާތަކެއް އެބަ ހުއްޓެެވެ.