ތިރީގައި މިވަނީ އެކަށީގެންވާ މިންވަރަކަށް އޭގެ ޤުދުރަތީ ގޮތުގައި ބޭނުންކޮށްފިނަމަ، ޖަރާސީމު ނައްތާލާއި، ބެކްޓީރިއާގެ ސަބަބުން ޖެހޭ ބަލިތަކުން ސިއްޙަތު ދިފާޢުކޮށްދޭ ކާއެއްޗެހިއެވެ.
1. އަނބު
އާންމުކޮށް މީހުން ހީކުރާ ގޮތުގައި އަނބަކީ މާގިނައިން ހަކުރު އެކުލެވިގެންވާ، ކެއުން އެހާ ރަނގަޅު މޭވާއެއް ނޫން ކަމަށެވެ. ރޯ އަނބަކީ ހީޓް ސްޓްރޯކްއެއް ޖެހުމުން ސަލާމަތްކޮށްދޭ އެއްޗަކަށް ވާއިރު، ދޮންވެ ފައްކާވެފައިވާ އަނބަކީ ގިނަ އަދަދެއްގެ އިންފެކްޝަންތަކާއި ހަނގުރާމަ ކުރުމަށް އެހީވެދޭ އެއްޗެކެވެ. ދޮން އަނބަކީ ދުޅަހެޔޮ އެޕިތީލިއަމް އުފެއްދުމަށް އެހީވެދޭ އެއްޗެކެވެ. އޭގެ ސަބަބުން ރޯނގާ، ރިނައިޓިސް އަދި ސައިނަސައިޓިސްފަދަ އިންފެކްޝަންތައް ޖެހުމުން ސަލާމަތްވެއެވެ. ވިޓަމިން އޭ އިން ފުރިގެންވާ އަނބަކީ ޑިފްތީރިއާއާއި ކަރުގެ އިންފެކްޝަންތަކަށްވެސް ވަރަށް ރަނގަޅު ފަރުވާއެކެވެ.
2. ކެބެޖު
ކެބެޖަކީ ވިޓަމިން، މިނަރަލްއަދި އަލްކަލައިން ސޯލްޓްސްއިން ފުރިގެންވާ ތަރުކާރީއެކެވެ. ކެބެޖަކީ ޤަބޫލުކުރެވޭ ގޮތުގައި ބަނޑުގައި އަލްސާ އުފައްދައިދޭ އެޗް ޕައިލޯރީފަދަ ބެކްޓީރިއާތަކާއި ހަނގުރާމަކޮށްދޭ އެއްޗެކެވެ. އަދި ހަމަ އެހެންމެ ކެބެޖަކީ ޖޯންޑިސް އަދި ކުޑަކަމުދާ ނިޒާމުގެ ބަލިތަކަށްވެސް އޮތް ރަނގަޅު ފަރުވާއެކެވެ.
3. ކެރެޓް
ބީޓާ ކެރޮޓިން އިން ފުރިގެންވާ ކެރެޓަކީ ވަރަށް ބާރުގަދަ އެންޓިއޮކްސިޑެންޓްއެއް އަދި ކްލެންސާއެކެވެ. ވިޓަމިން އޭވެސް ހިމެނިގެންވުމާއިއެކު، ކެރެޓަކީ ލޮލަށް ރަނގަޅު އެއްޗަކަށް ވުމުގެ އިތުރުން ކެންސަރާއި ދުރުކޮށްދޭ އެއްޗެކެވެ. އެއީ ހަށިގަނޑުގައި އެސިޑް-އަލްކަލައިން ބެލެންސްއެއް ދެމެހެއްޓުމުގައި ކެރެޓް އެހީވެދިނުމުގެ ސަބަބުންނެވެ. ކެރެޓް ޖޫހަކީ ޤަބޫލު ކުރެވޭ ގޮތުގައި އިންފެކްޝަންތަކާއި ހަނގުރާމަކޮށް، ކަރު، ލޯ އަދި ސައިނަސް އިންފެކްޝަންތައް ޖެހުމުން ދުރުހެލި ކޮށްދޭ އެއްޗެކެވެ. ހަމައެހެންމެ ރޯ ކެރެޓަކީ ބަނޑުގައި އުފެދޭ ފަނި މަރާލަދޭ އެއްޗެކެވެ.
4. މުރަނގަ ތޮޅި
ހޫނު މޫސުމުގެ ކުރީކޮޅު ފެތުރިގެންދާ ފާނަބަސަންދަކީ ހަމަ އެދުވަސްވަރު އުފެދޭ މުރަނގަ ތޮޅިން ރަނގަޅުކޮށްދޭ ބައްޔެކެވެ. މުރަނގަ ތޮޅީގެ އޮށާއި މަލަކީ އެފަދަ މޫސުމީ ބަލިތަކުން ސަލާމަތްވުމަށްޓަކައި ކެއުން މުހިންމު އެއްޗެހިއެވެ.
5. ނީމް ފަތް
ނީމްއަކީ ލޭ ސާފުކޮށްދިނުމާއި އެކިއެކި ހަންގަނޑަށް ޖެހޭ ބަލިތަކާއި އިންފެކްޝަންތަކުން ސަލާމަތްވުމަށް އެހީވެދޭ އެއްޗެކެވެ. އެހެންކަމުން، ކޮންމެ ދުވަހަކު ނީމް ގަހުގެ ފަތް ކެއުމަކީ ވަރަށް ރަނގަޅު އާދައެކެވެ.
6. ރީނދޫ
ރީނދޫއާއި ކެލްސިއަމް ކާބޮނޭޓް އެއްކޮށްފައި، ގައިގެ ފްރެކްޗަރުވެފައިވާ ތަންތަނަށާއި ކަށިތައް ހުޅުހުޅުން ނެއްޓިފައިވާ ސަރަހައްދުތަކުގައި އުނގުޅުމަކީ ރަނގަޅު ކަމެކެވެ. އަދި ހަމަ އެހެންމެ ކަރަށް ތަދުވަނީނަމަ، ރީނދޫ ހޫނު ކިރަށް އަޅައިގެން ބުއިމަކީވެސް އެދެވިގެންވާ ކަމެކެވެ. ޖަރާސީމާއި ހަނގުރާމަ ކުރުމަށް އެހީވެދޭ ރީނދޫއަކީ ރިނައިޓިސް، ރޯނގާ، ރިންގްވޯމް އަދި އަލްސާއަށް ވެސް އޮތް ފަރުވާއެކެވެ.
7. އިނގުރު
ކެއްސުމާއި، ބޭރަށް ހިނގުން އަދި މޭމަތީގެ އިންފެކްޝަންތަކުން ސަލާމަތްވުމަށް އިނގުރުއަކީ ވަރަށް ފައިދާހުރި އެއްޗެކެވެ. ފެނުގްރީކް ޕައުޑަރާއި މާމުއިއާއި އެއްކޮށްގެން ތާޒާ އިނގުރު ޖޫސް ބުއިމަކީ ކެއްސުމަށް އޮތް ހައްލެކެވެ.
8. މާމުއި
މާމުއިއަކީ ވަރަށް ގިނަ އެންޓިބައޮޓިކް މާއްދާތައް އެކުލެވިގެންވާ އެއްޗެކެވެ. ކަރުގެ އިންފެކްޝަންތަކަށް މާމުއިއަކީ ރަނގަޅު އެއްޗެއްކަން އެންމެންނަށްވެސް އިނގޭއިރު، މާމުއީގެ އިތުރު ބޭނުންތައްވެސް ހުރެއެވެ. އެގޮތުން އަނގައިގައި އުފެދޭ އަލްސާތައް ރަނގަޅު ކުރުމަށްޓަކައި ބޯރެކްސްއާއި ގްލައިސިރިންއާއި އެއްކޮށްގެން މާމުއި ބޭނުން ކުރެވިދާނެއެވެ. ހަމަ އެހެންމެ ގައިގެ ތަންތަން ކެނޑިގެންނާއި އަނގައިގެންނާއި އަދި ކަންފަތުގެ އިންފެކްޝަންތައް ރަނގަޅު ކުރުމަށްވެސް މާމުއި ބޭނުންކުރެއެވެ.
9. ލުނބޯ
ކުރީ ޒަމާނުގައި ލުނބޯ ބޭނުން ކުރެވުނީ ކޮލެރާ ބައްޔަށް އޮތް ފަރުވާއެއްގެ ގޮތުގައެވެ. ހޫނު ލުނބޯ ފެނަށް ކުޑަ ހަކުރު ކޮޅަކާއި ލޮނު ކޮޅެއް އަޅައިގެން ބުއިމަކީ ބޭރަށް ހިނގާނަމަ ރަނގަޅުކަމެކެވެ. ކަރުގެ އިންފެކްޝަންތަކަށް، ލުނބޯ ފަނި ގިރައިގެން އޭގެތެރެއަށް މާމުއި އަޅައިގެން ބޯށެވެ. އިންފެކްޝަންތަކުގެ ސަބަބުން ޖެހޭ ބަލިތަކާއި ދެކޮޅަށް ދިފާޢީ ބާރު އިތުރު ކުރުމަށްޓަކައި، ހުސް ބަނޑާއި ލުނބޯ ފަނި ތަށްޓެއް ބޯލާށެވެ.
10. ކާޑް ނުވަތަ ޔޯގަޓް
ޕްރޯ-ބައޮޓިކްއިން ފުރިގެންވާ ކާޑްއަކީ ހަޖަމު ކުރުމުގެ ނިޒާމަށް ރަނގަޅު އެއްޗަކަށްވުމުގެ އިތުރުން، ބަނޑަށް ތަދުވުން ރަނގަޅުކޮށްދޭ އަދި އިންފެކްޝަންތަކާއި ދެކޮޅަށް ހަނގުރާމަކޮށްދޭ އެއްޗެއްވެސް މެއެވެ. ކާޑް އަދި ބަޓާމިލްކްގައި ހިމެނޭ ލެކްޓިކް އެސިޑްއަކީ އެޕެންޑިސައިޓިސް، ޑައިރިއާ އަދި ޑިސެންޓެރީ ޖެހުމަށް މަގުފަހިކޮށްދޭ ޖަރާސީމުތަކާއި ދެކޮޅަށް ހަނގުރާމަ ކުރާ އެއްޗެކެވެ.