ނިދާގަޑީގައި ސްމާޓްފޯންއާއި ޓެބްލެޓް ބޭނުންކުރާ ކުދިންނަށް އެކަށީގެންވާ މިންވަރަށް ނިދި ނުލިބުމުގެ ފުރުސަތު ދެގުނަ އިތުރު ކަމަށް އާ ދިރާސާއަކުން ދައްކައިފިއެވެ. އަދި އޭގެ ސަބަބުން މާބޮޑަށް ފަލަވުމާއި ކެއުމްބުއިމުގެ އާދައަށް ނޭދެވޭ އަސަރުތައް ކުރާނެކަމަށްވެސް އެދިރާސާއިން ބުނެއެވެ.
ޔޫކޭގެ ކާޑިފް ޔުނިވާސިޓީގެ ދިރާސާވެރިން، 1،25،198 ކުދިންގެ މައްޗަށް ބިނާކޮށް ކުރިން ޝާއިރުކުރެވިފައިވާ 20 ދިރާސާތަކަށް ބިނާކޮށް ނިންމާފައިވަނީ ނިދުމުގެ ކޮލިޓީއާއި ދުވާލު ނިދިއައުމުގައި ސްމާޓްފޯންއާއި ޓެބްލެޓްތައް ރޭގަނޑު ބޭނުންކުރުން ވަރަށް ބޮޑު ރޯލެއް އަދާކުރާ ކަމަށެވެ.
"އަޅުގަނޑުމެން ދިރާސާއަކީ އެންމެ ފުރަތަމަ ކުރިން ކުރެވިފައިވާ ދިރާސާތައް ޔަޤީންކޮށް، އަދި މީޑިއާ ޑިވައިސްތަކުގެ ސަބަބުން ނިދުމުގެ ދިގުމިނަށާއި ކޮލިޓީއަށް ކުރާ ނޭދެވޭ އަސަރުތަކަށް އިތުރު ހެއްކެއް"، ކާޑިފް ޔުނިވާސިޓީގެ ބެން ކާޓާ ވިދާޅުވިއެވެ.
"ނިންޏަކީ އާންމުކޮށް އޭގެ މުހިންމުކަން ކުޑަކުރެވިފައިވާ އެހެންނަމަވެސް ކުޑަކުދިންގެ ހެދިބޮޑުވުމަށް ވަރަށް މުހިންމު ކަމެއް. އާދަވެގެން ހަމަ ނިދި ނުލިބޭނަމަ ވަރަށް ގިނަ ސިއްހީ މައްސަލަތައް ކުރިމަތިވޭ"، ކާޓާ ވިދާޅުވިއެވެ.
އޭނާ ވިދާޅުވީ ސްމާޓްފޯންއާއި ޓެބްލެޓްފަދަ ފަސޭހައިން ބޭނުންކޮށްލެވޭ މީޑިއާ ޑިވައިސްތައް މަޝްހޫރުވާ މިންވަރު އިތުރުވުމުގެ ސަބަބުން ކުޑަކުދިންގެ މެދުގައި ހަމަ ނިދި ނުލިބުމުގެ މައްސަލަ އިތުރަށް ގޯސްވެގެން ދާނެކަމަށެވެ.
ދިރާސާއިން ދައްކާ ގޮތުގައި ރޭގަނޑު ގަޑީގައި ކުދިންގެ ނިދާ އާދަތައް ރަނގަޅު ކުރުމަށްޓަކައި މައިންބަފައިން، މުދައްރިސުން އަދި ސިއްހީ މާހިރުންގެ އެއްބާރުލުންވެސް މުހިންމު ކަމަށެވެ.
މިހާރުގެ ހިސަބުތަކުން ދައްކާ ގޮތުގައި 72 އިންސައްތަ ކުޑަކުދިންނާއި 89 އިންސައްތަ ފުރާވަރުގެ ކުދިން ނިދާ މާހައުލުގައި މަދުވެގެން އެއް ޑިވައިސް އޮވެއެވެ. އަދި އެ ޑިވައިސްތަކަކީ ގިނައިން ނިދާ ގަޑީގައި ބޭނުންކުރާ އެއްޗެހިއެވެ.
ނިދާ ގަޑި ލަސްކޮށް އަދި އެގަޑިއަށް ހުރަސް އަޅައި އަދި ސިކުނޑި އެލާޓްކުރުމަކީ އެޑިވައިސްތަކުގެ ސަބަބުން ކުރާ ނޭދެވޭ އަސަރުތަކެވެ.
ކުޑައިރު ނިދުމުގައި އުނދަގޫތައް ދިމާވުމަކީ ޖިސްމާނީގޮތުން އަދި ނަފްސާނީގޮތުން ގިނަގުނަ ނުރައްކާތެރި ސިއްހީ މައްސަލަތައް ކުރިމަތިކުރުވާ ކަމެކެވެ. އޭގެ ތެރޭގައި މާބޮޑަށް ފަލަވުން، ދިފާއީބާރު ދަށްވުން އަދި ނަފްސާނީ މައްސަލަތައްވެސް ހިމެނެއެވެ.