ޕީޕީއެމްގެ މުސްތަޝާރު ރައީސް އަބްދުﷲ ޔާމީންގެ ފެކްޝަނުން "އަސްލު ޖަލްސާ" ނަމުގައި މާދަމާ ރޭ ކާނިވަލުގައި ޖަލްސާއެއް ބާއްވަން މިވަނީ ނިންމައިފަ އެވެ.
ރައީސް ޔާމީން ފެކްޝަނުން ޕާޓީގެ އަހަރީ ދުވަސް ފާހަގަކުރުމުގެ ޖަލްސާ ބާއްވާއިރު، ޕާޓީގެ ރައީސް މައުމޫން އަބްދުލްގައްޔޫމް ފެކްޝަނުން ބާއްވަން އުޅުނު ޖަލްސާއަށް ފުލުހުން ނެރެގެން ވަނީ ހުރަސްއަޅައިފަ އެވެ.
ރައީސް މައުމޫންގެ ޖަލްސާއަށް ގިނަ އަދަދަކަށް އެމަނިކްފާނަށް ތާއިދުކުރާ ފަރާތްތަކުން ދިއުމަށް މަސައްކަތްކުރިނަމަވެސް ، ފުލުހުންވަނީ މަގުބަންދުކޮށް މީހުން ހުއްޓުވާފައެވެ.އަދި އެސަރަހައްދަށް ޖަމާވަމުންދިޔަ މީހުން ދުރަށް ޖެއްސުމަށްފަހު ، ޖަލްސާ ބާއްވާ ސަރައްހައްދާއި ކައިރިވެސް ނުވެވޭނެހެން ހުރިހާ މަގުތަކެއް ފުލުހުން ބަންދުކުރިއެވެ.
ރައީސް މައުމޫންގެ ޖަލްސާއަށް ގިނަ އަދަދަކަށް މީހުން ދިއުމަށް މަސައްކަތްކުރީ އެކަމަށް ގޮވާލާ އެފެކްޝަނުން ކުރި އެންމެ އިއުލާނަކާއި ގުޅިގެންނެވެ. އާންމުކޮށް ސިޔާސީ ޖަލްސާތަކަށް އައުމަށް އަޑުގަދަކުރާއިން މާލެތެރޭގައި ގޮވިނަމަވެސް، މައުމޫންގެ ފެކްޝަނުން އެގޮތަށް އަމަލުކޮށްފައިނުވެއެވެ.
ނަމަވެސް ރައީސް ޔާމީންގެ ފެކްޝަނުން ބާއްވާ ޖަލްސާއަށް މީހުން ގެނައުމަށް ބޮޑެތި މަސައްކަތްތަކެއް ކުރަމުންދާތަން މިދަނީ ފެންނަމުންނެވެ.
"އަސްލު" ޖަލްސާގެ ނަމުގައި ބާއްވާ ޖަލްސާއަށް ސަރުކާރާއި ސަރުކާރު ހިއްސާވާ ކުންފުނިތަކުގެ މުވައްޒަފުން ދާން އަންގައި، ނުދާ މީހުންނާ ދޭތެރޭ ފިޔަވަޅު އަޅާނެ ކަމުގެ އިންޒާރުވެސް މިހާރު ދީފައިވާ ކަމަށް ބައެއް ކުންފުނިތަކުގެ މުވައްޒަފުން ބުނަމުންދެއެވެ. އަދި ހާޒިރީ ބަލައި ޖަލްސާ އަށް ނުދާ މުވައްޒަފުންނާ ދޭތެރޭ ފިޔަވަޅު އަޅާނެ ކަން އަންގާފައިވާ ކަމަށް މައުލޫމާތު ލިބިފައިވެއެވެ.
މީގެއިތުރުން ސަރުކާރުގެ މިނިސްޓްރީއަކުން މުވައްޒަފުންނަށް ރަސްމީކޮށް ޖަލްސާއަށް ދާން އަންގާފައިވާ މެމޯއެއް ސޯޝަލް މީޑިއާގައި ވަނީ އާއްމުވެފައެވެ. މި މެމޯގައި މާދަމާ ރޭ 8:45 އަށް އެ މިނިސްޓްރީގެ ހުރިހާ މުވައްޒަފުން ކާނިވާ ސަރަހައްދަށް ދާން މިނިސްޓަރު އެދިވަޑައިގަންނަވާ ކަމަށް ބުނެފައިވެއެވެ.
އެނގިފައިވާގޮތުން ބަލިވުމުގެ ސަބަބުން ޖަލްސާ އަށް ދާން އުޒުރުވެރިވާ މީހުން، ސަލާން ސެޓްފިކެޓް ހުށަހަޅަން ވެސް ބައެއް ކުންފުނިތަކުން އަންގާފައިވެ އެވެ.
ނަމަވެސް އެއްވެސް ބަޔަކަށް ޖަލްސާއަށް އައުމަށް މަޖުބޫރުކުރާކަމަށް ދެކެވޭ ވާހަކަ ރައީސް ޔާމީން ފެކްޝަނުން ދޮގުކުރެ އެވެ.
ރައީސް މައުމޫން އަށް ތާއިދުކުރާ ފަރާތްތަކުން ބުނެފައިވަނީ އެމަނިކްފާނު ބާއްވަން އުޅުނު ޖަލްސާއަށް އައުމަށް ގޮވާލުމުގެ އިތުރުން ، އެހެން އެއްވެސް ކަމެއް މީހުން ގެނައުމަށް ކޮށްފައިނުވާނެކަމަށެވެ. ނަމަވެސް ރައީސް ޔާމީންގެ ފެކްޝަން ޖަލްސާއަށް މީހުން ގެނައުމަށް ބޮޑެތި ޚަރަދުތައްކޮށް ، މަޖުބޫރުންވެސް މީހުން ގެނައުމަށް މަސައްކަތްކުރާކަމަށް އެފަރާތްތަކުން ތުހުމަތު ކުރެއެވެ.