ކޮންމެ ފަހަރަކު އާ ފެންފުޅިއެއް ގަތުމަކީ ޚަރަދު ބޮޑު ކަމެކެވެ. އަދި ހަމަ މިނަރަލް ވޯޓާ ޕްލާސްޓިކް ފުޅިތަކަކީ ބޭނުންކުރުން ރަނގަޅު އެއްޗެއްވެސް ނޫނެވެ. އެހެންކަމުން ބޭނުންކުރަން އެންމެ ރަނގަޅީ ދަގަނޑު ފުޅިތަކެވެ. ފެންފުޅިއަކީ ވަރަށް މުހިންމު އެއްޗަކަށް ވާއިރު، އެފުޅި ރަނގަޅު ގޮތުގައި ތާހިރުކަންމަތީ ބެލެހެއްޓުމަކީ ވަރަށް މުހިންމު ކަމެކެވެ. އަބަދުވެސް ސާފުތާހިރު ތަންތާނގައި ފެންފުޅި ބަހައްޓާށެވެ. އެއީ ލޮލަށް ނުފެންނަ ވަރުގެ ބެކްޓީރިއާތައް ހުރެދާނެތީއެވެ.
1. ފާހާނާއަށް ދާއިރު ފެންފުޅި ހިފައިގެން ނުދާށެވެ. ފާހާނާއަކީ ވަރަށް ގިނައިން ޖަރާސީމު ހުންނާނެ ތަނެކެވެ.
2. ފެންފުޅި ރައްޓެހިންނާއި ނުވަތަ އާއިލާގެ މީހުންނާއިވެސް ހިއްސާ ނުކުރާށެވެ.
3. ފެން އަޅަން ބޭނުންކުރާ ފުޅި ވަކިން ބަހައްޓާށެވެ. އެފުޅި ޖޫސްފަދަ އެއްޗެހި އެޅުމަށް ބޭނުންނުކުރާށެވެ.
4. އަބަދުވެސް ފެންފުޅި ރަނގަޅަށް ދޮވެ ސާފުކުރަން ވާނެއެވެ. ކަސްރަތު ކުރަންދާ ތަނާއި ވަޒީފާ އަދާކުރާ މާހައުލަކީ ގިނަ މީހުން އުޅުމުގެ ސަބަބުން ބެކްޓީރިއާތައް ގިނައިން ހުންނާނެ ތަންތަނެވެ. އެހެންކަމުން އެ ބެކްޓީރިއާތައް ފުޅީގެ އެތެރޭގައި ހަރުލުމަކީ އެކަށީގެންވާ ކަމެކެވެ. ވީމާ، ފެންފުޅީގެ އެތެރެއާއި މަތި އަބަދުވެސް ރަނގަޅަށް ދޮންނަން ހަނދާން ކުރާށެވެ.
5. ފެންފުޅި ބިންމަތީގައި ނުބަހައްޓާށެވެ. އެއީ ބިންމަތީގައި ހުންނަ ޖަރާސީމު ފުޅިއަށް އެރުމުގެ ފުރުސަތު އޮތުމުންނެވެ.
6. ހޫނުވެގެން އުޅޭ ވަގުތުތަކުގައި މޫނު ފިނިކުރުމަށް ފެންފުޅި ބޭނުން ނުކުރާށެވެ. އެއީ ދާހިއްލުމުގެ ސަބަބުން ގައިގައި ހުންނަ ޖަރާސީމުތައް ފެންފުޅީގެ ތެރެއަށް ގޮސްދާނެތީއެވެ.