ވެރިކަން ކުރާ ޕާޓީ ޕީޕީއެމް ދެބައިވެ، ރައީސް ޔާމީނަށް ނިސްބަތްވާ ފެކްޝަނަކާއި އެމަނިކުފާނުގެ ބޭބޭފުޅު، ކުރީގެ ރައީސް މައުމޫނަށް ނިސްބަތްވާ ފެކްޝަނެއް އުފެދި ކުރިއަށް އޮތް ލޯކަލް ކައުންސިލް އިންތިޚާބުގައި މައުމޫނަށް ސަޕޯޓު ކުރާ މީހުން ޕީޕީއެމް ޓިކެޓް ދޫކޮަށް އަމިއްލަ ގޮތުން ނިކުންނަން ނިންމައިފިއެވެ.
ޕާޓީގެ ސެކެޓްރީ ޖެނެރަލް އަބްދުﷲ އަލީމް ވިދާޅުވެފައިވަނީ ޕާޓީ ޓިކެޓުގައި އިންތިޚާބުގައި ވާދަކުރުމަށް 257 ފޯމު ހުށައަޅާފައިވާ ކަމަށެވެ. އެހެންނަމަވެސް މިހާރު ޕާޓީގެ އެތެރޭގެ ހާލަތު ގޯސްވެފައިވާ މިންވަރުގެ ސަބަބުން އޭގެ ތެރެއިން ގިނަ ބޭފުޅުން ޕާޓީ ޓިކެޓް ދޫކޮށް، އަމިއްލަ ގޮތުން އިންތިޚާބުގައި ވާދަކުރުމަށް ނިންމާފައިވާކަމަށް އަލީމް ވިދާޅުވިއެވެ.
އެގޮތުން 'އައްޑޫލައިވް' އަށް މައުލޫމާތު ލިބިފައިވާގޮތުން މެދުހެންވޭރު ދާއިރާއަށް ޕީޕީއެމްގެ ޓިކެޓުގައި ވާދަކުރުމަށް ނިންމާފައިވާ އެޕާޓީގެ ޒުވާނުންގެ ގޮފީގެ ކުރީގެ ރައީސް އިބްރާހިމް ނާޒިމް ވަނީ ޕާޓީގެ ޓިކެޓު ދޫކޮށް އަމިއްލަ ގޮތުގައި ދާއިރާއަށް ކުރިމަތިލުމަށް ނިންމާފައެވެ. އޭނާ ދެކޭގޮތުގައި އޭނާގެ ދާއިރާގެ ރައްޔިތުންނަކީ ރައީސް މައުމޫނަށް އަދިވެސް ވަރަށް ބޮޑަށް އިހުތިރާމް ކުރައްވައި ގަދަރު ކުރައްވާ މީހުންނަށް ވެފައި އިންތިޚާބު ކާމިޔާބު ވާނީ އަމިއްލަ ގޮތުން ކުރިމަތި ލުމުން ކަމަށެވެ.
ނާޒިމްގެ އިތުރުން ނ.ވެލިދޫ ދާއިރާއަށް ޕީޕީއެމްގެ ޓިކެޓުގައި ވާދަކުރުމަށް ނިންމާފައިވާ މުހައްމަދު އިރުފާންވެސް ވަނީ ޕާޓީ ޓިކެޓު ދޫކޮށް އަމިއްލަ ގޮތުން ކުރިމަތިލުމަށް ނިންމާފައެވެ. މެދުހެންވޭރު ދާއިރާގެ ރައްޔިތުންނެކޭ އެއްފަދައިން ވެލިދޫ ދާއިރާގެ ރައްޔިތުންގެ މެދުގައިވެސް ރައީސް ޔާމީނުގެ ސަޕޯޓު ގެއްލިފައިވާ ކަމަށް އިރުފާން އިޝާރާތް ކޮށްފައިވާއިރު އޭނާ ވަނީ ރައީސް ޔާމީނުގެ ޓީމާއެކު އިންތިޚާބުގައި ކުރިއަށް ދިއުމަށް ބޭނުން ނުވާ ކަމަށެވެ.
އަމިއްލަ ގޮތުން ވާދަކުރައްވާ ޕީޕީއެމްގެ މެމްބަރުން ޕާޓީގެ ރައީސް މައުމޫން އަބްދުލް ގައްޔޫމުގެ ތާއީދާއެކު އިންތިޚާބުގައި ނިކުތުމަށް ގަސްދުކޮށްފައިވެއެވެ. ރައީސް މައުމޫނަކީ މިދިޔަ ލޯކަލް ކައުންސިލް އިންތިޚާބާއި ރައްޔިތުންގެ މަޖިލީހުގެ އިންތިޚާބުގެ އިތުރުން ރިޔާސީ އިންތިޚާބުގައިވެސް ޕީޕީއެމްގެ ޓިކެޓުގައި ވާދަކުރެއްވި ބޭފުޅުންނަށް ކެމްޕޭން ކުރައްވައި ރައްޔިތުންގެ ތާއީދު ހޯއްދަވުމުގައި މުހިއްމު ރޯލެއް ކުޅުއްވާފައިވާ ބޭފުޅެކެވެ.