ޒުވާނުންނަށް ހާއްސަކޮށްގެން ދިރާގުން މުޅިން ހިލޭ ބައިނަލްއަގުވާމީ ފެންވަރުގައި އޮންލައިން ކޯސްތަކެއް ހެދުމުގެ ފުރުސަތު ހުޅުވާލައިފި އެވެ.
އެގޮތުން އެ ކޯސްތައް ހެދުމަށްޓަކައި ދިރާގުން އެއްބަސްވެފައި ވަނީ އަޔަލެންޑްގެ އޮންލައިން ބޭސްޑް ހަޔާ އެޑިއުކޭޝަން އިންސްޓިޓިއުޝަން ޝޯ އެކަޑަމީ އާ އެކުގަ އެވެ.
ދިރާުގެ މެނޭޖަ ޕަބްލިކް ރިލޭޝަންސް އިބްރާހިމް އިމްޖާދު ޖަލީލް ވިދާޅުވީ މިއަދު ދިރާގުން ފަހިކޮށް ދިނީ، ތައުލީމީ ގޮތުން މީހާ ކުރިއެރުވުމަށް ރާއްޖެޭން ބޭރަށް ދިއުމާއި ބޮޑެތި މަރުކަޒުތަކާ ގުޅުމުގެ ބަދަލުގައި، އޮންލައިންކޮށް، ކޮންމެ ތަނެއްގައި ހުރެގެން ވެސް ކިޔެވޭނެ ފުރުސަތެއް ކަމަށެވެ.
ޝޯ އެކެޑަމން ހުށަހަޅާ ޑިޕްލޮމާ ޕްރޮގްރާމްތައްތަކުގެ ތެރޭގައި ބިއުޓީ، ހެލްތު އެންޑް ފިޓްނަސް، ޑިޕްލޮމާ އިން ވެއިޓް ލޮސް، ޕާސަނަލް ނިއުޓްރިޝަން، ސްޕޯޓްސް ނިއުޓްރިޝަން، ޗައިލްޑް ނިއުޓްރިޝަން، ކިޑްސް ކޯޑިންގް، ވެބް ޑިވެލޮޕްމެންޓް، ވެބް ޑިޒައިން، ގްރެފިކް ޑިޒައިން، މޯބައިލް އެޕް ޑިވެލޮޕްމެންޓް، ޑިޖިޓަލް މާކެޓިން، ސޯޝަލް މީޑިއާ މާކެޓިން، ޑިޕްލޮމާ އިން ވައިރަލް މާކެޓިން، ކެރިއާ އެޑްވާންސްމަންޓް، ފައިނޭންޝަލް ޓްރޭޑިން، އިންވެސްޓްމެންޓް، ފޮޓޯގްރަފީ، ފޮޓޯޝޮޕް، ވެޑިންގް ފޮޓޯގްރަފީ، ލައިޓްރޫމް އަދި ގިޓާ ހިމެނެ އެވެ.
މި ހުރިހާ ޕްރޮގްރާމެއްގެ އަގު އުޅެނީ 395 ޕައުންޑުގަ އެވެ.
އެހެން ނަމަވެސް ދިރާގުން ފަހިކޮށްދޭ ފުރުސަތާ އެކު ޝޯ އެކެޑަމީ މެދުވެރިކޮށް ކޮންމެ ދިވެއްސަކު ހަދާ ފުރަތަމަ ކޯސް، އެއްވެސް އަގަކާ ނުލައި ހިލޭ ހެދޭނެ އެވެ.
އެކަމަކު އިތުރަށް ހަދާ ކޯސްތަކަށް އަގު ދައްކަން ޖެހޭނެ ކަމަށް ދިރާގުން ބުންޏެވެ.
ކޯސް އޮންނަ ވަގުތު އަންގައިދީ، ރިމަންޑާއެއްގެ ގޮތުން ޝޯ އެކަޑެމީން އީމެއިލް ވެސް ފޮނުވައި ދޭނެ އެވެ. އަދި ލައިވް ކްލާހުގައި ބައިވެރިނުވެވިއްޖެ ނަމަ، އެ ކްލާހުގެ ރިކޯޑިން ފަހުން ބަލައިލުމުގެ ފުރުސަތު ވެސް ލިބޭނެ އެވެ.
ކޯސް ފުރިހަމަ ކުރުމުން ޝޯ އެކެޑަމީން ސެޓްފިކޭޓް ދޭނެ އެވެ.