ވިލުފުށި ދާއިރާގެ މެމްބަރު ރިޔާޒް ރަޝީދުގެ ފޮޓޯ ތަކެއް ހެދި ކަމަށް ތުހުމަތު ކުރެވިގެން މީހެއްގެ ފޯނު ފުލުހުންގެ ބެލުމުގެ ދަށަށް ގެންގޮސްފި އެވެ.
ކްރިމިނަލް ކޯޓުން ނެރުނު އަމުރެއްގެ ދަށުން ފުލުހުން ތ.ވިލުފުށީ ދުންފިނިގޭ އާބިދު މުހައްމަދުގެ ފޯނު ފުލުހުން އަތުލާފައިވަނީ މިދިޔަ ހޮނިހިރު ދުވަހުގައެވެ.
ކްރިމިނަލް ކޯޓުގެ އިސް ގާޒީ އަބްދުލް ބާރީ ޔޫސުފް ނެރުއްވި އަމުރުގައި ވަނީ އާބިދުގެ ފޯނު ކޯލުތަކާއި މެސެޖުތަކުގެ ތަފްސީލު ހޯދުމަށެވެ.
އަދި އާބިދުގެ ނަމުގައި ރަޖިސްޓްރީ ކޮށްފައިވާ ސިމް ތަކާއި މެމޮރީ ކާޑު އަދި އެހެނިހެންވެސް އިލެކްޓްރޯނިކް ސާމާނު ބަލައި މައްސަލައަށް ހެކި ހޯދުމަށް މިދިޔަ މަހުގެ 28 ވަނަ ދުވަހުން ފެށިގެން އެއް މަސް ދުވަހަށް ފުލުހުންގެ އަތުގައި ބެހެއްޓުމަށް އަމުރު ކޮށްފައިވެއެވެ.
"އައްޑޫ ލައިވް" އަށް މައުލޫމާތު ލިބިފައިވާ ގޮތުގައި ރިޔާޒް ރަޝީދުގެ މޫނު ބޭނުންކޮށްގެން ފޮޓޯތައް އެޑިޓުކޮށް ވިލުފުށީ ފްރެންޑްސް ނަމުގައި ހަދާފައި އޮތް ވައިބާ ގްރޫޕަކާއި އިތުރު ސޯޝަލް މީޑިޔާ ފޯރަމް ތަކުގައި ޕޯސްޓު ކޮށްފައިވެއެވެ.
އަދި މިމައްސަލަ ތަހުގީގު ކުރަމުންދާ ކަމަށް ފުލުހުންގެ މީޑިޔާ އޮފިޝަލް ވަނީ ކަށަވަރު ކޮށްދެއްވާފައެވެ.