އިންޒާރުދީފައިވާ ލިޔުންތަކެއް އަމީނީމަގުގައި ހުންނަ ފުލުހުންގެ މަރުކަޒެއް ކަމުގައިވާ އިސްކަންދަރުކޮށި ތެރެއަށް އެޅި މައްސަލައިގެ ތަހުގީގު ފުލުހުން ފަށައިފި އެވެ.
އިސްކަންދަރުކޮށީގައި ހުންނަ އިމާރާތުގެ ލިފްޓް ކައިރިއަށާއި ސިޑި މައްޗަށާއި ޕްރޮފެޝަނަލް ސްޓޭންޑަޑް ޑިޕާޓްމަންޓްގެ ދޮރުމައްޗަށް އަޅާފައިވާ ލިޔުންތަކާއި ގުޅިގެން އެރޭ ޑިއުޓީ ޝިފްޓް ތަކުގައި ތިބި ފުލުހުންނާއި އެހެން ފުލުހުންނާވެސް މިހާރު ސުވާލުކުރަމުންދާކަމަށް ސުވާލުކުރެވުނު ބައެއް ފުލުހުން މައުލޫމާތު ދީފައިވެއެވެ.
އިސްކަންދަރު ކޮއްޓަށް އަޅާފައިވާ ކަމަށް ސޯޝަލް މީޑިއާގައި ފެތުރި ލިޔުންތަކުގައި ބުނެފައި ވަނީ "ދިވެހި ފުލުހުންނަކީ ދިވެހިރާއްޖޭގެ ސަރުކާރުގެ ސިޔާސީ އެޖެންޑާ ދިފާއުކުރަން ތިބި ބައެއް ނޫން، ސަރުކާރު ހިންގާ ޕާޓީގެ އެއް ފަޅިން ބާއްވާ ސިޔާސީ ޖަލްސާއެއްގެ ބޮޑުކަން ދައްކަން ދިވެހި ފުލުހުން ކުލަ ހެދުމުގައި ފޮނުވަން އުޅޭ އުޅުން އަހަރެމެން ކުށްވެރިކުރަން" ކަމަށެވެ.
އެ ލިޔުމުގައި އިޝާރާތްކޮށްފައި އެ ވަނީ ކާނިވާ ސަރަހައްދުގައި ރައީސް ޔާމީންގެ ފެކްޝަނުން ބޭއްވި ޖަލްސާއަށް ނިސްބަތްކޮށެވެ.
ސަރުކާރާ މެދު ހިތްހަމަނުޖެހޭ ބަޔަކު އެޅި އެ ލިޔުންތަކާ ގުޅިގެން ސުވާލުކުރުމުން ފުލުހުންގެ މީޑިއާ އިން އެއްވެސް ވާހަކައެއް ނުދެއްކިކަމަށް ބައެއް ނޫސްތަކުން ކުރިން ރިޕޯޓް ކޮށްފައިވެއެވެ.
ފުލުހުންގެ ތެރޭގައި މިފަދަ ތަހުގީގެއް ފެށިގެން ކުރިއަށްދަނީ ސަރުކާރުން ސިޔާސީ ކަންކަމުގައި ފުލުހުންގެ ބޭނުން ނަހަމަގޮތުގައި ހިފަމުންދާކަމަށްބުނެ ގިނައަދަދެއްގެ ފުލުހުން އެކަމާއި ހިތްހަމަނުޖެހުން ފާޅުކުރި އަޑު ފެތުރިފައި ވަނިކޮށެވެ. އަދި މީގެކުރިން އެތައް ފަހަރެއްގެ މަތިން ފުލުހުން ސިޔާސީ ކަންކަމުގައި ބޭނުންކުރާކަމުގެ ތުހުމަތު އިދިކޮޅު ފަރާތްތަކުން ސަރުކާރުގެ މައްޗަށް ކޮށްފައިވެއެވެ.