ފެނަކަ ކޯޕަރޭޝަނަށް ޑޮލަރު ގަންނަން ދިން 1 މިލިއަން ޑޮލަރަށްވާ 17 މިލިއަން ރުފިޔާ ނުލިބިވާ މައްސަލާގައި ޗެކް ދޫކުރި ލޯންޗް ކުންފުންޏާއި އަދި ޗެކް އިޝޫކުރި މޮރިޝަސް ކޮމާޝަލް ބޭންކާއިގެން ކޯޓަށް ދާން އެކުންފުނީގެ ކުރީގެ މެނޭޖިން ޑިރެކްޓަރ މުހައްމަދު ނިމާލް ނިންމައިފިއެވެ.
ނިމާލް ރާއްޖޭގެ ބައެއް މީޑިއާތަކަށް ވިދާޅުވީ، މި މައްސަލަ ކުރިއަށް ދެ ދުވަހެއްގެ ތެރޭގައި ސިވިލް ކޯޓަށް ހުށަހަޅުއްވާނެކަމަށެވެ.
ނިމާލް ވިދާޅުވީ، ލޯންޗް ކުންފުންޏަށް ޑޮލަރު ގަތުމަށް ޗެކް ހަވާލު ކުރީ، ލޯންޗުގެ ހިދުމަތް ދޭ ކުންފުނިން ދޫކުރި ޗެކުގައި އެމްސީބީގެ ތައްގަނޑު ޖެހުމަށް ފަހު އަދި ފެނަކައިގެ މުވައްޒަފަކު ބޭންކަށް ފޮނުވައިގެން އެ ޗެކުގެ ސައްހަކަން ބޭންކު މެދުވެރިކޮށް ކަށަވަރުކުރުމަށް ފަހު ކަމަށެވެ. އެހެންވެ ފައިސާ ގެއްލުމުގެ މައްސަލާގައި ބޭންކްގެ އިހްމާލެއްވާ ކަމަށް ގަބޫލް ކުރައްވާކަމަށް ނިމާލް ވިދާޅުވިއެވެ.
ފެނަކަ ކޯޕަރޭޝަނުން 17 މިލިއަން ރުފިޔާ ގެއްލުނު މައްސަލަ ފަޅާ އަރާފައިވަނީ އެކުންފުންޏަށް ލިބެން ޖެހޭ 1 މިލިއަން ޑޮލަރު ނުލިބި، ޗެކް ބައުންސްވުމާއި ގުޅިގެންނެވެ. މި މައްސަލަ ފުލުހުންނާއި އޭސީސީން ބަލަމުންދާ ވާހަކަތަކެއް އަޑުއިވިފައިވަނިކޮށް، ނިމާލް ވަނީ ފެނަކަ ކޯޕަރޭޝަންގެ މެނޭޖިން ޑިރެކްޓަރ ކަމުން ވަކިކޮށްފައެވެ.
ނިމާލް ވިދާޅުވީ ކުންފުނިން މިހާ ގިނަ އަދަދެއްގެ ފައިސާ ގެއްލުމާއި ގުޅިގެން އެފައިސާ ހޯދައި ދިނުމަކީ އަމިއްލަ ޒިއްމާއެއްކަމަށް ގަބޫލް ކުރައްވާކަމަށެވެ.
މިހާރު ޓޫރިޒަމް މިނިސްޓަރކަމުގެ ނައިބަކަށް ހުންނެވި ނިމާލް ވިދާޅުވީ ޑޮލަރު ގަންނަން ހިންގި މުއާމަލާތުގައި އެއްވެސް ކަރަޕްޝަންގެ އަމަލެއް ނުހިމެނޭއިރު، ޑޮލަރު ނުލިބުނު މައްސަލަ ފުލުހަށް ހުށަހެޅީވެސް އަމިއްލައަށްކަމަށެވެ. އަދި ބަޔަކު ކޮންމެ ވާހަކައެއް ދެއްކިޔަސް އެކަމަކަށް މިވަގުތު އެއްޗެއް ބުންނަން ބޭނުން ނޫންކަމަށެވެ.