ގަން އިންޓަނެޝަނަލް އެއާޕޯޓް އޮންނަ ގަމުގައި ގާއިމުކޮށްފައިވާ ސީ ޕްލޭންގެ އޮޕަރޭޝަންތައް ރަސްމީކޮށް ލޯންޗްކޮށްފި އެވެ.
އެ މަޝްރޫއު ލޯންޗްކޮށްފައި ވަނީ ލަންޑަނުގައި މިހާރު ކުރިއަށްދާ ޑަބްލިޔުޓީއެމް ފެއާގަ އެވެ.
ފެއާގެ ތެރޭގައި ކުރިއަށްގެން ދިޔަ ޚާއްސަ ރަސްމިއްޔާތެއްގައި އެ މަޝްރޫއު ލޯންޗްކޮށް ދެއްވީ ރާއްޖޭން އިނގިރޭސިވިލާތަށް ކަނޑައަޅުއްވާފައި ހުންނަވާ ސަފީރު އަހުމަދު ޝިޢާނާ އާއި އެމްއެމްޕީއާރްސީގެ އެކްޓިންގ މެނެޖިން ޑިރެކްޓަރު ހާރިސް މުހައްމަދެވެ.
ގަމުގައި ސީޕްލޭން އޮޕަރޭޓް ކުރުމުގެ ހުއްދަ ޓްރާންސް މޯލްޑިވިއަން އެއާވޭސް، (ޓީއެމްއޭ) ހަވާލުކޮށްފައި ވަނީ މިދިޔަ އޯގަސްޓް 16، 2017 ގަ އެވެ.
ލަންޑަންގައި ބޭއްވި މި ރަސްމިއްޔާތުގައި ޓީއެމް.އޭގެ ޗެއާމަން ރިޖަޑް ސަލްޑާނާ ވިދާޅުވީ، އައްޑޫގައި އަލަށް ތަޢާރަފު ކުރެވިގެންދާ ސީ ޕްލޭންގެ ޚިދުމަތާއެކު، އެ ސަރަޙައްދުގައި ފަތުރުވެރިކަން އިޝްތިޙާރު ކުރުމަށް ކުރަމުންދާ މަސައްކަތްތަކަށް އިތުރު ކުރިއެރުންތަކެއް ލިބިގެން ދާނެ ކަމަށެވެ. އަދި ގަން އިންޓަނޭޝަނަލް އެއަޕޯޓް ތަރައްޤީ ކުރުމުގެ މަޝްރޫޢާ އެކު، ކުރިއަށް އޮތް ތަނުގައި އެ ސަރަޙައްދަ ޒިޔާރާތް ކުރާ ފަތުރުވެރިންގެ ނިސްބަތް ގިނަވެ، ސީޕްލޭންގެ ޚިދުމަތަށް އޮންނަ ޑިމާންޑް އިތުރުވެގެންދާނެ ކަމަށް ޤަބޫލު ކުރައްވާ ކަމަށެވެ.
ޓީއެމްްއޭ އިން އަދި ބުނީ ގަން އެއާޕޯޓް ތަރައްޤީ ކުރެވޭ މިންވަރަކުން، ފޮޓޯ ފްލައިޓްގެ ޚިދުމަތާއި، މެޑިކަލް އިވެކުއޭޝަންގެ ޚިދުމަތް ފަދަ ޓީއެމްއޭ އިން މިހާރު ވެސް ދެމުން އަންނަ ޚިދުމަތްތައް ތަޢާރަފު ކުރަމުން ގެންދާނެ ކަމަށެވެ.
އަދި ސަރަޙައްދުގެ ޓްރެފިކް ޖާގަ ދިން މިންވަރަކުން ފުވައްމުލަކާއި، ހުވަދު އަތޮޅުގެ ރަށްތަކަށް ވެސް ދަތުރުކުރުމަށް ހަމަޖެހިފައިވާ ކަމަށް ޓީއެމްއޭއިން ބުންޏެވެ.
ލަންޑަންގެ ފެއާގެ ތެރޭގައި ވަނީޫ ގަން އިންޓަރނޭޝަނަލް އެއާޕޯޓް ތަރައްޤީ ކުރުމަށް ކުރަމުންދާ މަސައްކަތްތައް ދައްކުވައިދޭ ޚާއްސަ ވީޑިއޯ ޕްރެޒެންޓޭޝަނެއް ވެސް ދައްކާލައިފަ އެވެ.