މީގެ 50 އަހަރަށް ވުރެ ގިނަ ދުވަސް ކުރިން އިނގިރޭސިން ގަމުގައި ތާރު އަޅައިގެން ހެދި މަގުތަކުގެ ތެރެއިން ގަމުގެ މައި މަގު ގަން އެއާޕޯޓް ތަރައްގީ ކުރަން ކުރިއަށް ގެންދިޔަ މަޝްރޫއުގެ މަސައްކަތް ކުރަމުން ދިޔަ އިރު، ބޮޑެތި ހެވީ ވެހިކަލްތައް ދުއްވުމުގެ ސަބަބުން ވަރަށް ބޮޑަށް ހަލާކުވެފައިވާތީ މަގު ހެދުމުގެ މަސައްކަތް ފަށައިފި އެވެ.
މި މަސައްކަތް ކުރަނީ އެއާޕޯޓްގެ ރަންވޭގެ މަސައްކަތް ކުރި ޑެންމާކުގެ ހޯގާޑު ކުންފުނިންނެވެ.
އެއާޕޯޓްގެ މަސައްކަޔް ދާދި ފަހުން ނިންމާލި އިރު، ގަމުގެ މައި މަގުގެ ތާރުގަނޑު ވަަރަށް ބޮޑަށް ހަލާކުވެ، ވަޅުގަަނޑުތައް ހެދި އަޑިގުޑަންތައް ގިނަވެ، ދުއްވާ މީހުންނަށް ބޮޑެތި ތަކުލީފުތަކާ ކުރިމަތިލާން ޖެހިފައިވެ އެވެ.
ގަމަކީ އެއާޕޯޓް އޮންނަ ތަނަކަށްވާތީ، ގަމަކީ ވަަރަށް ގިނަ އަދަދަކަށް ވެހިކަލް ދުއްވަން ޖެހޭ ރަށެއް ވެސް މެ އެވެ.
ގަމުގެ ބެލެނިވެރި ފަރާތް ކަމަށްވާ އައްޑޫ އިންޓަނެޝަނަލް އެއާޕޯޓް ކޮމްޕެނީ (އޭއައިއޭ) ގެ އޮފިޝަލަކު މިއަދު ވިދާޅުވީ، ހޯގާޑުން އޮތީ ކުރިން ވެސް މަގުން ހަލާކުވި ސަރަހައްދު ހަދައި ދޭ ގޮތަށް އެއްބަސްވެފައި ކަމަށެވެ.
އެގޮތުން ގަމުގައި ކުރިން ހިންގި ސަވާހިލި ފިހާރަ ހުންނަ ގޯޅި ސަރަހައްދުން ފެށިގެން ވެސް، މޯލްޑިވިއަންގެ އޮފީސް ހުންނަ ސަރަހައްދާ ހަމައަށް މަގު ހަދާ ގޮތަށް ވަނީ ހަމަޖެހިފަ އެވެ.
މި މަސައްކަތް ފެށިގެން މިހާރު ކުރިއަށްދާ އިރު، އީކްއޭޓަ ވިލެޖްގެ މައި ގޭޓަ ދިމާލުން ގޮސް، ޑައިވިން ސްކޫލާ ހަމައަށް ބަންދުކޮށް، ތާރުގަނޑު ކޮނެގެން މިހާރު އަންނަނީ ނަގަމުންނެވެ.
އެހެންވެ މިހާރު އެއާޕޯޓާ ދިމާއަށް ކުރަން ޖެހެނީ ރަތްގެއާ ދިމާލުން އޮންނަ މަގުންނެވެ.
އޭއައިއޭ އިން ބުނީ މަގު ހެދުމުގެ މަސައްކަތް ހޯގާޑުން ކުރިއަށް ގެންދާނީ ވެހިކަލްތަކަށް ދުއްވަން ދަތި ނުވާނެ ގޮތަކަށް ބައި ބަޔަށް ބަހާލައިގެން ކަމަށެވެ.
"މި މަސައްކަތް ނިމޭނެ ކަމަށް ލަފާ ކުރެވެނީ ދެ މަސް ދުވަހުގެ ތެރޭގައި،" އޮފިޝަލް ވިދާޅުވި އެވެ.
އެއާޕޯޓްގެ ރަންވޭގެ މަސައްކަތް ކުރަމުން ދިޔަ އިރު، އެކަމަށް ބޭނުންވާ ސާމާނު ގަމުގެ ބޮޑު ފާލަމަށް ބާލަމުން ދަނިކޮށް މިދިޔަ އަހަރުގެ ތެރޭގައި ފާލަމުގެ މެދުން ކަހަލަ ގޮތަކަށް ބޮޑު ސަރަހައްދެއް ބިންދައިގެން ގޮސްފައިވެ އެވެ. އަދި ފާލަމުގެ ކޮޅުންނާއި އަރިމަތިން ވެސް ބައެއް ތަންތަން ހަލާކުވި އެވެ.
އެހެން ނަމަވެސް އެ ތަންތަން މިހާރު ވަނީ އަލުން މަރާމާތުކޮށްފަ އެވެ.
ގަމުގެ މަގު ހަދަން ފެށި އިރު، ޒުވާނުންގެ ވޮލީ ކޯޓާ ދިމާލުން އޮތް ސަރަހައްދުގައި ބޮޑެތި ވަޅުގަނޑުތައް ހެދި ދުއްވަން ދަތިވާ ވަަަރަށް ހަލާކުވެފައިވެ އެވެ.
އެހެން ނަަމަވެސް އެ މަގު ހޯގާޑުން ހަަދަން ހަމަޖެހިފައެއް ނުވެ އެވެ.