އަންނަ އަހަރަށް ހުށަހެޅި ދައުލަތުގެ ބަޖެޓަކީ އިންސާފުވެރި ބަޖަޓެއް ނޫން ކަމަށާއި ބަޖެޓް ފާސް ކުރަން ވޯޓު ނުދެއްވާނެ ކަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެމްބަރު އަލީ ނިޒާރު ރޭ ވިދާޅުވެއްޖެ އެވެ.
ރާއްޖެ ޓީވީ "ފަލަ ސުރުހީ" ގައި އޭނާ ވިދާޅުވީ އެމްޑީޕީން ޕާޓީން ދައުލަތުގެ ބަޖެޓް ފާސްކުރުމާ މެދު ކޮންމެ ވިޕްލައިނެއް ނެރުނު ކަމުގައި ވިޔަސް ބަޖެޓް ފާސް ކުރުމަށް ވޯޓު ނުދެއްވާނެ ކަމަށެވެ.
އަދި އެ ނިންމުން ނިންމާފައި ވަނީ ރައީސް އަބްދުﷲ ޔާމީންގެ ސަރުކާރުން ވޭތުވެ ދިޔަ ދެ އަހަރުގައި ރައްޔިތުން މަޖިލީހުން ފާސްކޮށްފައިވާ ބަޖެޓްތަކުގައި އައްޑޫގެ ތަރައްގީ އަށް ކުރިއަށް ގެންދަން ނިންމާފައިވާ އެއްވެސް ކަމެއްގެ އަމަލީ މަސައްކަތް ފަށާފައި ނުވާތީ ދާއިރާ ރައްޔިތުންގެ ޙައްގުގައި ކަމަށް ނިޒާރު ވިދާޅުވިއެވެ.
"އެމްޑީޕީން ކޮންމެ ގޮތަކަށް ވޯޓް ދޭން ނިންމިޔަސް އަޅުގަނޑެއް މި ބަޖެޓަށް ވޯޓެއް ނުދޭނަން" އޭނާ ވިދާޅުވި އެވެ.
ނިޒާރު އަދި ވިދާޅުވީ ފިނޭންސް މިނިސްޓަރު އަހުމަދު މުނައްވަރު ބޮޑެތި އަދަދުތަކެއް ޖަހާފައި ހުށައަޅާފައިވާ ބަޖެޓަކީ އިންސާފުވެރި ބަޖެޓެއް ނޫން ކަމަށެވެ.
ބަޖެޓުގައި މަޝްރޫއުތައް ހިންގުމަށް ބޮޑަތި ޙަރަދުތައް ކުރުމަށް ސަރުކާރުން ޖަހާފައި ވަނީ ޕީޕީއެމްގެ ރައްޔިތުންގެ މަޖިލީހުގެ މެމްބަރުން ނިސްބަތްވާ ރަށްތަކަށް ކަމަށް ވިދާޅުވި އެވެ.
އެގޮތުން ބަޖެޓުގައި އައްޑު އަށް 180 މިލިއަން ރުފިޔާ ކަނޑައަޅާފައިވާ އިރު އެ ފައިސާގެ ބޮޑު ބައެއް ހަރަދު ވަނީ މިހާރު އައްޑޫގައި ހިނގަމުންދާ މަޝްރޫއުތަކަށް ކަމަށް ނިޒާރު ފާހަގަ ކުރެއްވި އެވެ.
އެގޮތުން އައްޑޫގެ ފެނާއި ނަރުދަމާ ގާއިމްވެފައި ނެތުމަކީ ސަރުކާރުގެ ވެރިން ލަދުވެތިވާން ޖެހިފައިވާ ކަމެއް ކަމަށް އޭނާ ވިދާޅުވިއެވެ.
"ސިޔާސަތެއް ނެތް. ހަމަ އަދަދުތަކެއް ދައްކައިގެން ރައްޔިތުން ނިކަމެތިކުރުން ނޫން ކަމެއް ބަޖެޓަކުން ނުފެނޭ." ނިޒާރު ވިދާޅުވި އެވެ.
އޭނާ ނިޒާރު ވިދާޅުވީ ސަރުކާރުން ހުށައަޅާފައިވާ ބަޖެޓަކީ ހަމަހަމަ އުސޫލުތަކުން ބަހާލެވިގެން އަަދަދުތައް ކަނޑައަޅާފައިވާ ބަޖެޓެއް ނޫން ކަމަށެވެ.
ނިޒާރު ވިދާޅުވީ އަންނަ އަހަރަށް ލަފާކޮށް ހުށަހެޅި 26.7 ބިލިއަން ރުފިޔާގެ ބަޖެޓްގައިވާ ގޮތުން ދިވެހި ގިނަ ރައްޔިތުންގެ އަސާސީ ކަންކަން ވެސް ފުރިހަމަކޮށްލެވޭ ބަޖެޓް ނޫން ކަމަށެވެ.